2 Corinthiens 5 - La Sainte Bible en Langue Yipunu

¹ Tuijabi rie: Pa ndagu aji tuitsanini va butamba jimapansiga, diwendi rie: nyuru tsietu, Nsambi otuvega ndagu jisusu aji turungula utsanina, diwendi rie: ndagu aji jaʼ beni amaturungila o julu, ajigofu.

² Tumba namunyi tuinyungili na nsala jineni ukota o ndagu ajimaturungulu o julu

³ yiri tugomuesilama mbura na mbura.

⁴ Ava tukivu na nyuru tsietsitsi tuibimingi tsiri mu mbari tuirondi ufu nobuaga nyuru tsietsitsi tumba mu mbari tuna nsala jineni udila nyuru tsijulu yiri atsifu tsiukaluga atsigefu.

⁵ Nsambi jaʼ beni amakunsa motsu mana na amatuvega Yinyunyi yiandi nderi tuga utujabisa nana motsu mobila.

⁶ Kabogu tumawarisa mirima mietu na tuijabi ava tikivu na nyuru tsietsitsi tusakakota o mandagu ama Fumu amaturungila.

⁷ Tuiwendingi na yitu, tugebembitini.

⁸ Tuitsani wandi tumba adi tuirondi viri adidi rie: Tuirondi upala mu mandagu memama uyetsana o mandagu ama Fumu amaturungila.

⁹ Tumba uviolila motsu tuirondi ulasanga Fumu ubueji yeri vava tsi vo yeri tuji o julu.

¹⁰ Jetu tutabululu bunsonsi na Christ na mutu mutu odila adivu diwqlimina na bisalu biandi. Diwendi rie: Pa mutu amasala bisalu biboti ava amabila vava tsi odila maboti; munongu mosi pa amasala bisalu bibi okilusu.

Yikenginyi yimatsiemusu na Christ

¹¹ Kabogu tunotsiyisa goma jiFumu, tuirondi ulubusa basusu yiri jogu wogu bomulaba goma. Ombu Nsambi tumajabunu kala na adi nyilabi jenu wenu duidijabi wandi.

¹² Kabogu tugemueronda udujabisa ametu tumba tuirondi yiri durungula uwagula abekipi nyuru tsibatu tumba bagegengili mirima miogu.

¹³ Tuji batumbalagu? Kabogu tuji nana yika mu diambu dienu.

¹⁴ Durondu duChrist duitusindiyi na tuijabi yiri mutu mosi amafuila batu botsu, diwendi rie: botsu bamafuama mu dufu duandi.

¹⁵ Jandi amafuila botsu yiri jogu abavu monyu bagomuekeruma tumba borumu na jandi omatufuila na omarambuga o dufu.

¹⁶ Kabogu jetu tugomuegengila batu nana bisi butamba bebagengilili. Ne pa kala tumagengila Christ na misu metu namunyi disaa nana.

¹⁷ Pa mutu efubini minima na Christ, ekaluyi nderi mutu ugona avu: motsu magulu mamavioga na magona memavingi.

¹⁸ Motsu mana mamavagu na Nsambi agumavega Christ musuga utsiemusa yikenginyi yiri tuba na dinonga nandi na amatuvega yisalu unonga na basusu wandi.

¹⁹ Bulumbi buetu abubu rie: Nsambi amatsiemusa yikenginyi ava amaveyila Christ musuga unonga na batu. Nsambi asamamuerangimina masumu mogu na jandi amatulasa nana divu diwelimina unonga na batu.

²⁰ Kabogu jetu tuji bilumbi biChrist na bulumbi buetu bumavosu na Nsambi jaʼ beni. Kabogu kokolu tsienu mu diambu diChrist tsiemusanu yikenginyi na banu bambatsi baNsambi.

²¹ Christ asamavaga masumu tumba Nsambi amamufuamisa mu masumu metu yiri ava tufubinina mirima nandi otusungiga na Nsambi.