2 Corinthiens 4 - La Sainte Bible en Langue Yipunu

Mambu maYinyunyi yiNsambi mamavegu ombu bifufu

¹ Nsambi na yingeba yiandi amatuvega yisalu yieyiyi la dibandu tugelabili uvura.

² Tumadunda bingitsi ne mambu amelasi yisonyi. Tuitubuli mambu maNsambi na tugesoyi diela na tugefuri. Tuiduki yika ngensa la dibandu tuna nsangu tsiwelimina va gusu Nsambi nesi va gusu batu.

³ Pa bamosi bagegulu Musamu Uboti agu tuisamuni, digewendi rie: botsu, yika jogu abetsiemuyingi.

⁴ Bagemavayili yitu mu mbari nsambi dibi oyitsani vava tsi, amagalisa mirima miogu. Jandi ebadibiyi misu yiri bagolaba yijalala ayiubamonitsa nsila la Musamu Uboti aguilonsi bundumba buChrist abuvu yibagunu yiNsambi.

⁵ Jetu tugelonsi misamu mietu tuisamuni misamu miJesus Christ aguvu Fumu na jetu tuji basalitsi benu mu diambu diChrist.

⁶ Nsambi amavosa rie: Yijalala yiubanga na pisama jimasumu jiutsiemuga! Jandi amadibula matuji metu yiri turungula ujaba Nsambi na bundumba buandi abumasiemisa yinsi yiChrist vedi vedi.

⁷ Jetu atuvu yika bifufu tumadila diambu dineni adi tuikehsi, adina dilasi yiri Nsambi ana mangolu motsu.

⁸ Mirima mietu mimapupusu temu na temu tumba tusakadeda; tumatumuna paga wandi tumba tusakatsiemusa yitu;

⁹ tuna batu bapuela abetuvini tumba tusakagambu na mbatsi; tumatsungugu temu na temu tumba tusakafu.

¹⁰ Mbura tsiotsu atsi tuilingingi tuilingi na dufu, diwendi rie: dufu duJesus yiri mu nyuru tsietu tugulungu monyu wandi, diwendi rie: monyu aguvu na Jesus.

¹¹ Mu mbari yilumbu na yilumbu ne tukivu monyu tuifuangingi mu diambu diJesus yiri monyu aguvu nandi ubanganga mu nyuru tsietu.

¹² Kabogu dufu duvu netu na monyu uvu nenu.

¹³ Bisonu bisonugu rie: Nyimavayila yitu la dibandu nyimavosila nana. Jetu wetu tuna yitu yieni kabogu tumngula uvosa na bukidi.

¹⁴ Tuijabi yiri Nsambi agumarambusa Fumu Jesus o dufu oturambusa munongu mosi va gusu andi.

¹⁵ Tuivayi motsu mu diambu dienu yiri maboti maNsambi monyavanga na mu monyi botsu bogabusilanga Nsambiʼdiboti.

Tuiwendingi na yitu tugebembitini

¹⁶ La dibandu tugededingi. Diuleba tuilabingi maguga na nyuru tsietsitsi, mirima mietu miwaringi yilumbu na yilumbu.

¹⁷ Tumba mua maguga ama tuilabingi magaa na diambu pa tuirangimini bundumba abuvu o gusu, abuna buiviolili mua maguga memama.

¹⁸ Jetu tugekipi mambu amelabini tumba tuikipi amagelabini. Mambu amelabini mevioyingi tumba amagelabini mavu mutubu.