2 Corinthiens 3 - La Sainte Bible en Langue Yipunu

Basalitsi bapangini jigona

¹ Yi duigulu? Jetu tuinyemi? Diwendi rie: vengu turuga na miganda amiutujabisa ombu genu?

² Nesi, jenu beni duji nderi muganda etu, muganda agumasonu va mirima mietu. Muganda agu mutu uotsu orungula ulaba nesi uranga jaʼ beni.

³ Dilabini yiri Christ jaʼ beni amasona muganda egugu na amagutinda netu. Muganda usamasonu na ndimba va miganda tumba umasonu va mirima na mangolu maYinyunyi yiNsambi aguvu monyu.

⁴ Tuna bukidi uvosa nana mu mbari tuivayili Nsambi yitu mu diina diJesus Christ.

⁵ Mbe ka jetu beni tugorungula usala yisalu yieyiyi. Mangolu metu meruyili ombu Nsambi.

⁶ Jandi beni amatuvaga basalitsi nana divu diwelimina na pangini jigona. Pangini eni jisamasonu nana migaga mimasonugulu tumba jivu Yinyunyi yiNsambi. Migaga mirombisi mutu dufu tumba Yinyunyi yieni eveyi monyu.

⁷ Va temu migaga mimarendu va mamanyi Nsambi amalasa bundumba buandi. Diuleba bundumba bumasiegama, yinsi yiMoise yimalula vedi vedi te na batu baIsrael basamarungula umugengila. Kabogu pa migaga amimarombisa batu ufu mimavegu na bundumba

⁸ ka muna bundumba bu buvu na yisalu yi Yinyunyi yiNsambi.

⁹ Pa yisalu yimigaga ayimarombisa batu mbela yimaba na bundumba kabogu ayiutuvega ndunga yivu na bundumba abuviolila!

¹⁰ Kabogu turungula uvosa rie: Bundumba bupangini abuvu buviolila buidiamisi bundumba bumigaga.

¹¹ Pa yisalu ayimatsiemuga yimaba na bundumba kabogu ayiutsinga mutubu yiuba na bundumba buviolila.

¹² Mu mbari tuna ditasa diedidi, tuna bukidi.

¹³ Tugaa nana Moise amabila omagumbanga yinsi yiandi tsanda yiri baIsrael bagorungula umugengila ava ulula umasiemina.

¹⁴ Dingensa mirima miogu mimagala; na te na namunyi baji nderi misu mogu mamagumbu ava berangili miganda mipangini jijulu. Yika mutu efubini murima na Christ avana tsanda eni jivulu.

¹⁵ Te na namunyi ava berangili miganda miMoise mirima miogu mikivu migala.

¹⁶ Mu mbari Bisonu bisonugu rie: Tsanda ajimadibiga yinsi yiMoise jimavulu ava amagabuyila ombu Fumu.

¹⁷ Ava bevosili rie: Fumu, diwendi rie: Yinyunyi yiFumu. Ava Yinyunyi avu avana vavu musuga uotsu.

¹⁸ Mu mbari tugaa na tsanda ajiutudibiyi, binsi bietu biulasa bundumba buFumu. Mbana Yinyunyi yiFumu otukalusa mu yibagunu yiandi te na tuba na tindi bundumba buandi.