2 Corinthiens 2 - La Sainte Bible en Langue Yipunu

¹ Nyimatabula diambu yiri ngotola ombu genu na munyongu.

² Pa nyutsirisa mi rima mienu na munyongu ami, anyi opotsa mu mbari jetu botsu yika munyongu na munyongu, mbeyianu?

³ Kabogu nyimaledusonina yiri abavu bawelimina usangila nami bagomuelaba yisonyi ava nyuruyila. Nyilabi pa nyina nsangu jenu wenu duilabi nsangu.

⁴ Nyimadusonina na murima utsira na matsanga mapuela tsiri udulasa uvura tumba udujabisa durondu duami.

Oyivayi masumu orungula utandu

⁵ Nyimasona nana udulasa rie: Pa mutu amabiva adina digenemisi yika murima ami tumba na mienu wandi.

⁶ Divu diwelimina yiri dumamukilisa.

⁷ Tumba mutandianu na muwarisianu yiri agokambusu na maguga mandi.

⁸ Kokolu tsienu, mulasianu durondu.

⁹ Nyimadusonina wandi ujaba yiri duna dululu.

¹⁰ Pa jenu dutandila mutu mabi mandi menu wami nyumutanda. Pa nyimatandila mutu mabi mandi nyidivayi va gusu Christ mu diambu dienu

¹¹ yiri Satan agotuviolila mu mbari erondi utubetsa jetu botsu.

Paul elabi uvura o Troas

¹² Ava nyimatolila o Troas uyesamuna Musamu Uboti uChrist, nyimalaba yiri Fumu amakesalila.

¹³ Tumba nyimalaba murima utsira mu mbari nyisamarasuna muana taji etu Tite. La dibandu nyimaganina bisi Troas; nyimawenda o Macedoine.

Oyilungi, elungi mu diambu diChrist

¹⁴ Diboti ombu Nsambi! Tunofubana murima na Christ tuna ndunga na etusalisi unyavisa dujabu duandi mu mbura tsiotsu.

¹⁵ Kabogu jetu tuvu nderi mbunga jiboti jipagu ajimavagulu na Christ ombu Nsambi. Mbunga ajimagulunu na jogu abegobulungu nesi abetsiemuyingi.

¹⁶ Ombu abetsiemuyingi nderi mbunga dufu nombu abegobulungu nderi mbunga duburu. Anyi awelimina?

¹⁷ Jetu tuisamuni yika Mambu maNsambi tugegomi batu umasumba nana basusu bevayili. Tumasindugu na Nsambi kabogu tuji basalitsi baChrist na tugovosa disusu yika adivu diwelimina na Nsambi.