2 Bakaga 9 - La Sainte Bible en Langue Yipunu

Jehu ubiatsu ebiatsu kaga

¹ Yilumbu yimosi Elisee mubiyitsi amanengila mubiyitsi umosi udibuli dibabiyitsi na amamuruma rie: Warisa tsanda agu na bonga yirura yieyiyi yimatsi nowenda o Ramot o Galaad.

² Ava gutolila gukayelaba Jehu muana dibaala uJosaphat mutegula uNimchi. Gukamugebula va gari baana bataji bandi na gukamubega o yibuku yindagu yisusu.

³ Gukabonga yirura yimatsi na gukayiwitila matsi va julu muru andi mbana gukavosa rie: Fumu jandi rie: Nyugubiatsi kaga jiIsrael! Elisee amabuela rie: Gukadibula diguyi norina, guyasikama muna nsila.

⁴ Mufudu agumaba mubiyitsi amawenda o Ramot o Galaad.

⁵ Ava amatolila amarasuna bivunda bibagora o yibenguna. Amavosa rie: Sefu, nyirondi ugutsingula mua diambu. Jehu amawivula rie: Anyi, menu? Amawaka rie: Nyiina.

⁶ Jehu amaretsama na amakota o gari ndagu; mubiyitsi eni amamuwitila matsi va julu muru na amamutsingula rie: Fumu Nsambi Israel jandi rie: Nyigubiatsi kaga jibatu bami.

⁷ Gubokisa bategula baAchab. Nyugabusilila Jezabel pila jimalungu mabasalitsi bami abamaba babiyitsi na jimalungu mabasalitsi basusu baFumu.

⁸ Mukuta uotsu uAchab ubungana; nyubokisa mutu uotsu umukuta andi nesi muviga nesi fumu.

⁹ Nyuvayila mukuta uAchab dedi mosi nana nyimavayila muskuta uJeroboam muana dibaala uNebat na mukuta uBacha muana dibaala uAhia.

¹⁰ Mbe ka Jezabel agotsigu, bamondi bomuji o nungi jiJizreel. Mubiyitsi anovosa anana amadibula diguyi na amarina.

¹¹ Ava Jehu amagabuyila o yibenguna yibagora bamamuwivula rie: Motsu mewendi buranga? Dibandu yi dilagu dieni atsiruyila ombu gagu? Jehu amabawaka rie: Tsiri diambu! Jenu duijabi babiyitsi bamunongu eni nesi nana bebiyili.

¹² Bamabuela rie: Gufura! Kabogu tutsinguli adi atsibiga! Mbana amavosa rie: Amansingula kana na kana mbana amavosa rie: Fumu jandi rie: Nyigubiatsi kaga jiIsrael.

¹³ Mutu mutu amasunga ubonga biduaru biandi, bamabiwalila Jehu va yikadi; bamasiga mumbanda na bamavosa rie: Jehu avu kaga!

Jehu utunga etungili kaga Joram fundu

¹⁴ Anana Jehu muana dibaala uYochafat mutegula uNimchi amatungila Joram fundu; kabogu Joram na baIsrael botsu bamaba bakunsama o Ramot o Galaad uyetoyisa Hazael kaga jiSyrie.

¹⁵ Tumba kaga Joram amayenagabuga uyebugusu mapura ama bisi Syrie bamamunemisa o Jizreel ava bamatoyila na Hazael kaga jiSyrie. Jehu amavosa rie: Pa duvu dukunsama ne mutu mosi ayagusula o musiengi uyetsingula musamu o Jizreel.

¹⁶ Jehu amanangama va dikalu diandi, amawenda o Jizreel mu mbari Joram amaba guna va tangi ubela na Ahazia kaga jiJuda amawenda uyemulaba.

¹⁷ Watsi agumaba o ndagu jisakama jiJizreel amalabilila bagora baJehu uruga beruyi na amavosa rie: Nyilabi bagora. Joram amamuruma rie: Bonga mubeyitsi ukabala gukamusindiga ubabengusana nobawivula rie: Duna diambu?

¹⁸ Mubeyitsi ukabala amayebengusa Jehu na amavosa rie: Kaga jandi rie: Duna diambu? Jehu amawaka rie: Diambu yi? Nduki! Kabogu watsi amatubula rie: Yilumbi amatola te nombu gogu tumba asakagabuga.

¹⁹ Joram amamuetinda mubeyitsi ukabala ususu, anotola ombu gogu amavosa rie: Kaga jandi rie: Duna diambu? Jehu amawaka rie: Diambu yi? Nduki!

²⁰ Kabogu watsi amatubula rie: Yilumbi amatola te nombu gogu tumba agegabuyi. Jivu nderi mbeyitsi jiJehu mutegula uNimchi mu mbari ebeyi nderi yiduka.

²¹ Mbana Joram amavosa rie: Kunsamanu! Bamakunsa dikalu diandi. Joram kaga jiIsrael na Ahazia kaga jiJuda bamapala, mutu mutu va dikalu diandi uyebengusana Jehu na bamabenguna nandi va nungi jiNabot muisi Jizreel.

Dufu duJoram kaga jiIsrael

²² Yika Joram elabili Jehu amavosa rie: Guna diambu? Jehu amawaka rie: Tuna diambu! Gugelabi bumbembu bunguji agu Jezabel na puela bulosi buandi?

²³ Joram amageluga, ava amarinina amagamuyila Ahazia rie: Tumatsungulu! Tumatsungulu!

²⁴ Tumba Jehu amabonga pita andi na amanonga Joram va masasaga: dubansa dumamutoba murima na amaberuga va dikalu diandi.

²⁵ Jehu amaruma Bidcar, yivunda yiandi yibagora rie: Bonga mfumbi na jibuayi o nungi jiNabot musi Jizreel; rangimina ava jetu nagu tumabila va mosi na babeyitsi babakabala na taji andi Achab, Fumu amamuvayila ndogulu ejiji.

²⁶ Fumu amavosa rie: Masiga nsilaba malungu maNabot na baana bandi bababaala na mu dionyi nyugugabusila pila o nungi ejiji, Fumu agumadivosa! Kabogu jibongi nojibuaga o nungi nana Fumu amavosila.

Dufu duAhazia kaga jiJuda

²⁷ Ahazia kaga jiJuda anolaba dionyi amarinina o yiari yiBet-Gan. Jehu amamuduka na amavosa rie: Na jaʼ wandi mubokianu va dikalu diandi! Bamutsungulila va mukongu uGour va mugula Ibleam. Ahazia amarina te no Meguiddo, avana amayefuila.

²⁸ Basalitsi bamamubega va dikalu te no Jerusalem na bamamutsiga o ngila andi o musiengi uDavid.

²⁹ Ahazia amaba kaga jiJuda mu yilima yiyigumi na yimosi bidurumu duJoram muana dibaala uAchab.

Dufu duJezabel

³⁰ Jehu amakota o Jizreel. Jezabel anodigulu amasona yinsi yiandi na amakunsa nanga tsiandi mbana amakelasa va fenetera.

³¹ Ava Jehu amakotila va dikotulu dimusiengi, Jezabel amamuvosila rie: Mbolua muana uZimri agumabokisa kaga andil.

³² Jehu amabuaga misu o yiari yifenetera na amagamuga rie: Anyi va gari enu avu nami? Anyi? Mivangu mibeji vo mirieru mimamugengila ava mimabambinina na fenetera.

³³ Jehu amavosa rie: Mubuayianu o tsi. Bamamubuaga na malungu mandi mamanyansuga mu yivaga na mu bakabala. Jehu amamunyiga na dikalu diandi.

³⁴ Mbana amakota o ndagu kaga, amaji na amanu na amavosa rie: Labatianu yifufu yieni na mutsiyianu mu mbari avu muana mugetu ukaga.

³⁵ Bamawenda uyemutsiga; tumba bamarasuna yika dubengili duandi na matambi na makaka.

³⁶ Bamagabuga uyetsingula dionyi ombu Jehu agumavosa rie: Mbigulu Fumu aji mubiyitsi Elie muisi Tichebe amabiga rie: Bamondi boji Jezabel o nungi jiJizreel;

³⁷ na mfumbi jiJezabel jiuba misiali misiali o nungi jiJizreel te na mutu agorungula uvosa rie: Ajina mfumbi jiJezabel.