2 Bakaga 8 - La Sainte Bible en Langue Yipunu

Mambu masusu mamugetu agumatsana o Chounem

¹ Yilumbu yimosi Elisee amaruma mugetu agu amarambusa muana andi dibaala dufu rie: Relama yenawendanga jenu na bisi ndagu agu, yetsananu vana mbura aji dulaba; Fumu amatubula dungosu dunsala adubanganga te na yisambuali yibilima.

² Mugetu amavaga adi mubiyitsi amamuruma; amasogama na bisi ndagu andi, bamayestsana yisambuali yibilima o bulongu bubaPhilistin.

³ Yisambuali yibilima binovioga mugetu eni amarambuyila o bulongu bubaPhilistin, amayetatila kaga mu diambu dindagu andi na nungi andi.

⁴ Va temu eni kaga yika umoga emoyi na Guehazi musalitsi uElisee. Amamuwivula rie: Gugonsingula mambu motsu maneni ama Elisee amavaga.

⁵ Ava amatsingulilanga kaga nana Elisee amarambusila muana agumafu, mugetu eni agu Elisee amarambusa muana andi dufu amatola uyetatila kaga mu diambu dindagu andi na nungi andi. Guehazi amagamuga rie: Aa fumu ami, kaga labati mugetu egugu na muana andi udibaala agu Elisee amarambusa o dufu.

⁶ Kabogu kaga amawivula mugetu eni na jandi amamutsingula nana dionyi dimabila. Mbana kaga amaruma mutu rie: Gabusa biotsu abivu bimugetu egugu na biotsu abi mbe amadila ubanda na yilumbu ayi amagusuyila mu dilongu diedidi ta na namunyi.

Elisee na Hazael

⁷ Va temu jisusu Elisee amawenda o Damas. Ben-Hadad kaga jiSyrie amabelanga; bamamulubusa rie: Mubiyitsi aka vava.

⁸ Kaga amaruma Hazael rie: Bonga mulendu nowenda ombu Elisee; akakwivulila Fumu rie: Nyubeluga buali buebubu?

⁹ Hazael amayebengusana Elisee na mulendu; biotsu abimaba biboti biDamas bimabegu na magumana masamo. Anotola ombu gandi amamuwivula rie: Ben-Hadad muana agu udibaala aguvu kaga jiSyrie amansindiga ombu gagu uguwivula rie: Nyubeluga buali buebubu?

¹⁰ Elisee amamugabusila rie: Wenda yemutsingula rie: Gubeluga! Tumba Fumu amandasa yiri ofu.

¹¹ Elisee amasikama na amagengila Hazael yisuisu yitsingu yineni mbana amalila.

¹² Hazael amawivula rie: Dibandu yi guililili? Elisee amawaka rie: Mu mbari nyijabi dibi adi guvayila baIsrael; gunyensa misiengi miogu mikandu na gubokisa bafudu bogu na gutsiarila baana bogu bageyi na gupasa mioji mibagetu bogu aboba na mimi.

¹³ Hazael amawivula rie: Yika tsie, menu agugaa na mangolu nyurungula uvaga mambu mamunongu eni? Elisee amavosa rie: Fumu amandasa yiri ndeʼ guba kaga jiSyrie.

¹⁴ Hazael amaganina Elisee na amagabuga ombu fumu andi agumamuwivula rie: Diambu yi Elisee atsigutsingula? Jandi amawaka rie: Atsinsingula rie: Gubeluga!

¹⁵ Ava kedi Hazael amabonga dimfunga adi amaputiga mu mamba na amakubiga yinsi yikaga umuboka. Kaga amafu, Hazael amaruma va yivinga yiandi.

Joram, kaga ji Juda

¹⁶ Yilima yimuranu yiJoram muana dibaala uAchab kaga jiIsrael, Joram muana dibaala uJosaphat amabanda urumanga o Juda.

¹⁷ Amaba na magumarieru na bilima bibeji ava amabandila uba kaga na amaruma yinana yibilima o Jerusalem.

¹⁸ Amaduka bifu bibi bibakaga baIsrael nana mukuta uAchab umavayila, mugatsi andi amaba muana uAchab; amavaga amasamalasa Fumu ubueji.

¹⁹ Tumba Fumu asamaronda ubunga bufumu buJuda mu diambu dimusalitsi andi David na mu diambu dipangini aji amavangana nandi yiri obanganga na yivinga va gari baana bandi.

²⁰ Va temu jiJoram bisi Edom bamabusila durumu duJuda na bamakesolila kaga jisusu.

²¹ Joram amawenda o Sair na makalu mandi madivita; kaga na bivunda bimakalu bamarelama mukolu na bamakanda bisi Edom abamabatsiengila tumba bagora baJuda bamarina o mandagu mogu.

²² Ubanda va temu eni bisi Edom bamabusa durumu duJuda. Musiengi uLibna wandi umabusa vana temu eni.

²³ Misamu misusu miJoram mimasonugu mu Dibuku diBisalu bibaKaga baJuda.

²⁴ Joram amafu na amatsigu o musiengi uDavid. Ahazia muana andi udibaala amaruma va yivinga yiandi.

Ahazia, kaga jiJuda

²⁵ Yilima yidigumi na bibeji bidurumu duJoram muana dibaala uAchab agumaba kaga jiIsrael, Ahazia muana dibaala uJoram amaba kaga jiJuda.

²⁶ Ahazia amaba na magumabeji na bilima bibeji ava amabandila uba kaga, amaruma yilima yimosi o Jerusalem. Diina dinguji andi Athalie agumaba muana mugetu uOmri kaga jiIsrael.

²⁷ Amaduka bifu bimukuta uAchab na amavaga amasamalasa Fumu ubueji dedi mosi na mukuta uAchab mu mbari amawelana na mukuta eni.

²⁸ Ahazia amawenda na Joram muana dibaala uAchab o divita na Hazael kaga jiSyrie o Ramot o Galaad. Bagora baSyrie bamanemisa kaga jiJoram.

²⁹ Kaga Joram amagabuga o Jizreel uyekebuyisa mapura. Ahazia amawenda uyemulaba mu mbari amabelanga o Jizreel.