2 Bakaga 7 - La Sainte Bible en Langue Yipunu

¹ Elisee amavosa rie: Guluanu mbembu Fumu! Fumu jandi rie: Mugesa va diweru diedidi bosumba yietsu yifufu mu dubongu dumosi nesi bietsu bibeji biorsa o dikasa diSamarie.

² Yivunda yibagora ayimalinganga na kaga temu tsiotsu amawaka Elisee rie: Ne pa Fumu otoba maluta o julu diambu diedidi diulabana? Elisee amawaka rie: Ndeʼ beni gubilaba na misu magu; tumba gugobiji.

Milaku mibagora baSyrie mimasiala mududu

³ Va dikotulu dimusiengi vamaba bibedu binyambi bina abimawivusananga rie: Tutsana vava te na tufu?

⁴ Pa tuna ditasa ukota o musiengi, dungosu dunsala duvu o musiengi wandi na tuyefuila guna; na pa tutsana vava tufu munongu mosi. Tʼwendianu o milaku mibagora baSyrie; pa bagotuboka tuba monyu, pa botubokisa tukafuanu!

⁵ Kabogu ava bimbombori bamawendila o milaku mibagora baSyrie; ava bamatolila o yiari yimilaku mibagora baSyrie bamalaba yiri basatsi.

⁶ Fumu amagulusu nduku jimakalu na bakabala o milaku mibagora baSyrie, diwendi rie: nduku jibagora bapuela na bamatsingusana rie: Guluatianu kaga jiIsrael amanengila bakaga baHitt na bakaga baEgypte uyitoga netu.

⁷ Bamarelama na bamarina ava bimbombori, bamasila milaku: mandagu mamatsanda na bakabala na baburu; miotsu nana mimabila.

⁸ Bibedu binyambi bamatola o yiari yimilaku. Bamakota o ndagu mosi jitsanda, bamaji na bamanu na bamabonga lora jivema na lora na biduaru abi bamayesuega. Bamamuekota o ndagu jisusu jitsanda na bamabonga bima abi bamamueyesuega.

Disukusulu didungosu dunsala

⁹ Mbana bamatsingusana rie: Tugevayi diboti! Yilumbu yinamunyi yivu yilumbu yimusamu uboti; pa tuba sui na pa tukelisa te na wisi utebuga, Nsambi otukilisa. Tʼwendianu tuyetsingulanu bisi ndagu kaga.

¹⁰ Bamawenda na bamatsingula bakelisi badikotulu dimusiengi rie: Jetu tumakota o milaku mibagora baSyrie, tumalaba yiri basatsi, tugaagulu ne diufi dimutu. Tumalaba yika bakabala na baburu batungu na mandagu mamatsanda na bima biotsu muna.

¹¹ Bakelisi badikotulu dimusiengi bamatolisa musamu eni o ndagu kaga.

¹² Kaga amaretsama va gari wisi na amatsingula basalitsi bandi rie: Nyirondi udutsingula adi bagora baSyrie betuvayili. Bejabi tuvu na dungosu dunsala kabogu bamasila milaku miogu uyesuema o musiru, bamatasa rie: ava bopalila o musiengi tubagaanga; tubavinga ukota o musiengi.

¹³ Musalitsi umosi ukaga amawaka rie: Tubongianu bakabala baranu abasakafu na mua batu; pa bofu vagaa diambu, baIsrael botsu wandi yika ufu befu. Tubatindianu mbana tujabanu adi bavinitsi betuvayili.

¹⁴ Kabogu bamabonga makalu mabeji ama bamatunga bakabala babeji; mbana kaga amasindiga bagora uyenarombanga amavu o milaku mibagora baSyrie.

¹⁵ Bamaduka dibondu dibagora te no Jourdain na bamalaba yiri biduaru na bima bibagora baSyrie bimayenabuagungu ava bamayenarininanga; biotsu yika layini. Bilumbi bimagabuga uyetsingula kaga misamu mieni.

¹⁶ Vana vana bisi Samarie bamawenda uyekinda milaku mibagora baSyrie. Nana Fumu amavosila, bamasumba yietsu yifufu nesi bietsu bibeji biorsa na dubongu dumosi.

¹⁷ Kaga amavega yivunda yibagora ayimalinganga nandi temu tsiotsu yisalu ukelisa dikasa adimaba o dikotulu dimusiengi; tumba yivunda yieni yibagora amatsiarulu na amafu nana Elisee amavosila ava kaga jiIsrael amawendila ombu gandi.

¹⁸ Va temu eni Elisee amatsingulila kaga rie: Mugesa ava diweru diedidi bosumba bietsu bibeji biorsa nesi yietsu yimosi yifufu na dubongu dumosi o dikasa diSamarie.

¹⁹ Yivinda yibagora amawivula Elisee rie: Ne pa Fumu otoba maluta o julu diambu diedidi diulabana? Elisee amawaka rie: Ndeʼ beni gubilaba na misu magu tumba gugobiji.

²⁰ Adina dimalabana: batu bamamutsiarila va dikotulu dimusiengi na amafu.