2 Bakaga 6 - La Sainte Bible en Langue Yipunu

Diumbi adimatsiemuga dimamuelabana

¹ Yilumbu yimosi dibuli dibabiyitsi bamatsingula Elisee rie: Guluati, mbura aji tuibenguni nagu jivu jigeyi.

² Tʼwendianu te no Jourdain; avana mutu mutu obonga mukambu umosi mbana tuyemirungila mbura jiubengunina. Elisee amawaka rie: Wendanu.

³ Mutu mosi amavosa rie: Kokolu tsiagu gugowenda netu? Elisee amawaka rie: Nyuwenda.

⁴ Kabogu amawenda nogu. Banotola va disimu dimujamba uJourdain, bamatabula miri.

⁵ Ava umosi amawangilanga mukambu, diumbi dimabonduga mu mamba. Ainagamuga rie: Ngeba menua! Fumu ami, usomba nyimadisomba!

⁶ Elisee amamuwivula rie: Mbura yi ditsibonduyila? Amamulasa mbura. Mbana Elisee amatabula yibuku yimuiri na amayibuaga va mbura eni, vana vana diumbi dimatsagama. Mbana

⁷ Elisee amavosa rie: Dibongi! Mbana amadibonga.

Elisee ugaanga egaangi bagora baSyrie

⁸ Va temu eni kaga jiSyrie amatoga divita na baIsrael na amalonsa bivunda biandi bibagora rie: Milaku miami avava miuba.

⁹ Tumba Elisee amatinda mutu uyetsingula kaga jiIsrael rie: Kebana guyavioga va mbura eni mu mbari bagora baSyrie aguna bovaga milaku.

¹⁰ Kaga jiIsrael amasindiga batu uyeketanga mbura aji Elisee amamulonsa.

¹¹ Dionyi dimalabana kumbu tsipuela. Murima ukaga jiSyrie umapupusu; amanengila bivunda biandi bibagora na amabawivula rie: Dibandu yi gugetubulili mutu etu aguvu mbatsi kaga jiIsrael?

¹² Yivunda yiandi yibagora yimosi amawaka rie: Vagaa mutu! Tumba Elisee mubiyitsi aguvu o Israel orungula uyetsingulanga kaga jiIsrael posulu tsiagu tsiotsu ne atsi guivosi o tangi agu.

¹³ Kaga jiSyrie amavosa rie: Wendanu yelabananu mbura aji avu, nyuyemugaanga. Bamayemutsingula rie: Elisee aji o Dotan.

¹⁴ Kaga amatinda bakabala na makalu na dibuli dineni dibagora abamatola mukolu na bamakanda musiengi.

¹⁵ Musalitsi uElisee amarelama kedi jineni na amapala na amalaba dibuli dibagora dimakanda musiengi na bakabala na makalu. Mbana musalitsi eni amagamuga rie: Aa fumu ami, yika tsie tuvayila?

¹⁶ Elisee amawaka rie: Guyalaba goma! Abavu netu babaviolili ufuna.

¹⁷ Elisee amasambila rie: Fumu dibula misu mandi yiri olaba. Fumu amadibula misu mamusalitsi uElisee; amalaba bakabala bapuela bapuela o julu mukongu na makalu yiari na yiari biElisee.

¹⁸ Bagora baSyrie bamakueka ombu Elisee, kabogu Elisee amasambila Fumu dusambu duedudu rie: Kokolu tsiagu vaga bagora bebaba bidunga. Nsambi amabavaga bidunga nana Elisee amavosila.

¹⁹ Elisee amavosa na bagora rie: Nsila tsiri vava na musiengi tsiri gugu; ndukianu nyudubega ombu mutu agu duirombi. Kabogu Elisee amababega o Samarie.

²⁰ Ava bamatolila o Samarie Elisee amamuesambila rie: Fumu dibula misu mabatu bebaba yiri bolaba! Fumu amadibula misu mogu na bamalaba yiri bavu o Samarie.

²¹ Kaga jiIsrael anobalaba amawivula Elisee rie: Tata ami nyubaboka?

²² Elisee amawaka rie: Guyababoka. Na kala gugebokisa aba bagora bagu bekotisi o tsugu; baveyi biguji na mamba yiri boji nonu; mbana boyenawenda ombu kaga ogu.

²³ Kaga jiIsrael amabalambisila mulambu uneni na bamaji nonu; mbana amabaganina na bamayenagabuga ombu kaga ogu. Kabogu bagora baSyrie basamamuegabuga o bulongu buIsrael.

Dungosu dunsala o Samarie

²⁴ Adina dinovioga Ben-Hadad, kaga jiSyrie amagukiga bagora bandi botsu, bamawenda na bamayekanda Samarie.

²⁵ Dungosu dunsala dumaba o Samarie; dungosu dueni dumaba tindi duneni nesi muru buru umasumbusu na magumidunana dumbongu na mibondu mimabembi mimasumbusu na mbongu yiranu.

²⁶ Yilumbu yimosi kaga jiIsrael amavioga va julu yivaga na mugetu amamugamuyila rie: Aa fumu ami kaga, kwamusi!

²⁷ Amawaka rie: Pa Fumu ageguwamusi na yi nyuguwamusila? Tsia vagaa biguji nesi malamu?

²⁸ Mbana kaga amamuwivula rie: Diambu yi divu nagu? Mugetu eni amawaka rie: Mugetu egugu atsiponda rie: Peyi muana agu udibaala! Tukamuji namunyi, mugesa tukaji aguami.

²⁹ Tutsilamba muana ami na tumamuji. Yilumbu ayimubeji nsimuvonda rie: Bega muana agu udibaala tukamuji. Tumba amasuega muana andi.

³⁰ Kaga anogulu posulu tsimugetu eni amapasa biduaru biandi ava amayenavioyilanga va julu yivaga; batu abamaba o gari yivaga bamalaba yiri amaduara siela o tsi biduaru biandi.

³¹ Kaga amagamuga rie: Nsambi akilisi na mangolu mandi motsu pa ngotabula Elisee muana dibaala uChafat muru namunyi.

Elisee utubula etubuli disukusulu didungosu dunsala

³² Kabogu Elisee amabenguna o ndagu andi na bivunda bimusiengi. Kaga amatinda yilumbi ombu gandi. Tumba nesi yilumbi yikatola Elisee amatsingula bivunda rie: Duilabi yiri yikongu yieni etindi mutu uyetabula muru ami? Guluanu! Ava yilumbi oruyila dukadibiga yiabutsu, duyamukotisa. Mikindu mifumu andi migegulunu va nsima andi?

³³ Uvosa mbe akivosa na yilumbi yimatola ombu Elisee na amavosa rie: Diguga diedidi diruyili ombu Fumu. Diambu yi Fumu omuepayila?