2 Bakaga 5 - La Sainte Bible en Langue Yipunu

Dubelusu duNaaman mungo nyambi

¹ Naaman, yivunda yibagora bakaga jiSyrie amaba mutu muneni nana fumu andi amakakisilanga mu mbari na mangolu mandi Fumu amawakila bisi Syrie kalala. Tumba dibaala dieni adimaba ngogaga amaba na nyambi.

² Bagora baSyrie bamatumunu baIsrael na bamabega muana mugetu ugeyi o bukoli, jandi amasalilanga mugatsi Naaman.

³ Yilumbu yimosi amatsingula fumu andi rie: Aa mbe fumu ami avu bebeli na mubiyitsi aguvu o Samarie mbe mubiyitsi omubelusa nyambi andi.

⁴ Naaman amayetsingula kaga rie: Muana mugetu uIsrael atsivosa kana na kana.

⁵ Kaga jiSyrie amamuruma rie: Wenda o Samarie na nyusonina kaga jiIsrael muganda. Naaman amawenda na kama yirieru tsikilu tsilora jivema na magumasiamunu makilu tsilora na yigumi yibiduaru bifeta.

⁶ Amabeyila kaga jiIsrael muganda agumasonugu rie: Ava gudilila muganda egugu gujaba yiri meʼ beni nsigutindila Naaman, yivunda yiami yibagora; gukamubelusa nyambi andi.

⁷ Kaga jiIsrael anoranga muganda amapasa biduaru biandi na amagamuga rie: Je meʼ nsambi nyivu yiri nyubokisa mutu vo umuvega monyu? Tsie kaga jiSyrie etumini yiri nyubelusa mutu nyambi andi? Dugelabi yiri erondi utoga nami?

⁸ Ava Elisee mubiyitsi amagululu yiri kaga jiIsrael amapasa biduaru biandi amasindiga mutu uyewivula kaga rie: Dibandu yi gumapasila biduaru biagu? Mutindi ombu gami. Mbana ojaba yiri o Israel uvu mubiyitsi.

⁹ Naaman amawenda na kabala tsiandi na dikalu diandi, amasikama va gusu ndagu Elisee.

¹⁰ Elisee amamutindila yilumbi va gusu kana umutsingula rie: Wenda, yebuila yisambuali yikumbu o Jourdain; gubeluga, mukata agu ulioma.

¹¹ Naaman asamalaba ubueji; amayenawenda novosa rie: Guluati, nsitasanga rie: Otasuna jaʼ beni na osambila diina diFumu Nsambi andi, obembisa dikaka diandi va mbura aji nyibeli na nyambi jiubeluga.

¹² Mijamba miDamas: Abana na Parpar migeviolili mijamba miotsu miIsrael? Ngorungula ubuila guna noliomusu? Amayenagabuga na kabu.

¹³ Tumba basalitsi bandi bamabambana nandi na bamamuwivula rie: Tata etu, lesa mbe mubiyitsi atsiguwivula diambu divura mbe gugodivaga? Tambusa na mua diambu digeyi adi atsiguruma rie: Yebuila, gubeluga?

¹⁴ Kabogu Naaman amasunduga na amaputama yisambuali yikumbu o Jourdain nana mubiyitsi amavosila; mukata andi gumakaluga nderi umuana kali na amalioma.

¹⁵ Naaman na batu bandi bamagabuga ombu mubiyitsi. Anotola amakelasa va gusu Elisee na amavosa rie: Mbana nyimajaba vagaa Nsambi jisusu mu butamba buotsu yika o Israel. Kokolu tsiagu singa muensili ami.

¹⁶ Elisee amawaka rie: Fumu jaʼ beni ejabi! Nyivu musalitsi andi! Nsibusa. Naaman amamutsotsa ugubonga tumba Elisee amabusa.

¹⁷ Mbana Naaman amavosa rie: Mu mbari guibusi kabogu singisa yiri bopega mifuna mibeji miburu mibutamba; mu mbari menu ngomuevagulila bansambi bangana pagu tsiunyensa tsimunongu na munongu, nyuvagulila yika Fumu.

¹⁸ Tumba nyiwivuli Fumu utanda; ava fumu ami okotila o ndagu jiRimmon uyesambila vengu nyukota nandi na meʼ wami nyukutama o ndagu jiRimmon; kokolu tsiagu Fumu tandi ava nyukutimina o ndagu jiRimmon.

¹⁹ Elisee amamutsingula rie: Sunsa murima. Naaman amaganina Elisee.

Dibi diGuehazi

²⁰ Naaman anowenda mua vala, Guehazi musalitsi uElisee mubiyitsi amatasa rie: Buduka bufumu ami, atsibusa ufutu na muisi Syrie; Fumu jaʼ beni ejabi nyumuduka mbana nyudila mua yima.

²¹ Guehazi amaduka Naaman mbangu. Naaman anomulabilila emuduki mbangu amasunduga va dikalu diandi uyenamubengusana na amamuwivula rie: Va diambu?

²² Guehazi amawagula rie: Vagaa diambu, fumu ami atsinsindiga ugutsingula rie: Gulu, nyibanorugulu bafudu babeji o yiari yimukongu uEfraim abavu mu dibuli dibabiyitsi; kokolu tsiagu peyi magumarieru makilu tsilora jivema na biduaru bibeji bifeta.

²³ Naaman amavosa rie: Singa ubonga nesi magumasiamunu makilu tsilora jivema. Amatsilongila mu saku beji na amamuvega biduaru bibeji bifeta; amaruma basalitsi bandi babeji uyenabibeyilanga Guehazi.

²⁴ Ava bamatolila o Ofel Guehazi amamuebonga saku na biduaru na amabisunsa o ndagu andi, mbana amagabusa basalitsi baNaaman.

²⁵ Mbana Guehazi amamuegabuga ombu fumu andi. Elisee amamuwivula rie: Guehazi agu gubetsi? Amawaka rie: Ngaabetsi mbura.

²⁶ Tumba Elisee amamuwivula rie: Yinyunyi yiami yigaabetsi nagu ava dibaala dieni atsisunduyila va dikalu diandi uyenagubengusana? Je guna musuga ubonga lora jivema vo biduaru bifeta vo manungi maoliva vo mirayisan vo bindombu vo bangombi vo basalitsi bababaala na babagetu?

²⁷ Nyambi jiNaaman jiugunama, jenu na baana bagu te na mutubu. Vana vana Guehazi amapalila ombu Elisee na nyambi jidugugusa.