2 Bakaga 3 - La Sainte Bible en Langue Yipunu

Joram, kaga jiIsrael

¹ Joram muana dibaala uAchab amaruma o Israel mu yilima yiyigumi na yinana biJosaphat kaga jiJuda. Amarumanga yigumi na bilima bebeji o Samarie.

² Amavaga amasamalasa Fumu ubueji tumba tsiri nana taji andi amavaga;

³ tumba amakevega uvaganga masumu maJeroboam muana dibaala uNebat agumarombisa baIsrael uvaga masumu na asamaronda ukalula diela.

Divita na bisi Moab

⁴ Mecha kaga jiMoab amaba na migamba na amafutila kaga jiIsrael dumandu dukama tosini tsibaana babindombu na kama tosini tsibalumbi babindombu na mionyi mibionyi.

⁵ Ava dufu duAchab kaga jiMoab Mecha amabusa urumu na kaga jiIsrael.

⁶ Mbana kaga Joram amagusuga o Samarie na amagukiga Israel jiotsu.

⁷ Amasogama na amatinda yilumbi uyetsingula Josaphat kaga jiJuda rie: Kaga jiMoab amambusa. Gugowenda nami uyetoyisa bisi Moab? Josaphat amawagula rie: Tʼwendi, jetu nagu na batu betu na bakabala betu.

⁸ Mbana amawivula rie: Nsila yi tuvioyila? Joram amawagula rie: Muna nsila kumu jiEdom.

⁹ Kaga jiIsrael na kaga jiJuda na kaga jiEdom bamawenda; banomana yisambuali yibilumbu mu muendu, mamba mamasuka unuisa bagora na bibilu.

¹⁰ Mbana kaga jiIsrael amavosa rie: Ka yia! Fumu amatunengila jetu barieru uyetuwakisa ombu bisi Moab.

¹¹ Tumba Josaphat amawivula rie: Avava vagaa mubiyitsi ne umosi yiri otuwivulila Fumu? Musalitsi umosi ukaga jiIsrael amawaka rie: Elisee muana dibaala uChafat agumaba mbatsi jimurima uElie aji vava.

¹² Josaphat amavosa rie: Mbembu Nsambi jigoba nandi? Kaga jiIsrael na kaga jiJuda na kaga jiEdom bamawenda ombu Elisee.

¹³ Elisee amawivula kaga jiIsrael rie: Diambu yi divu va gari jetu nagu? Wenda ombu babiyitsi bataji agu na babiyitsi banguji agu. Kaga jiIsrael amamutsingula rie: Nesi! Fumu amatunengila jetu bakaga barieru utuwakisa ombu bisi Moab.

¹⁴ Elisee amavosa rie: Fumu mabadi agu nyivu musalitsi andi jaʼ beni ejabi! Mbe tsiri Josaphat kaga jiJuda mbe ngogukipa na mbe gugondaba.

¹⁵ Mbeyilianu musiyitsi sambi. Ava musiyitsi sambi amasiyilanga Fumu amabasa Elisee mangolu.

¹⁶ Mbana amavosa rie: Fumu jandi rie: Timanu biduna bipuela o yibususu yieyiyi.

¹⁷ Fumu jandi rie: Punga jigovepa na mfula jigonoga ne nana dulaba yibususu yieyiyi yiubasa na mamba monu, jenu dunu na migamba mienu na biruitsi bienu.

¹⁸ Elisee amabuela rie: Tumba dionyi divu diambu digeyi ombu Fumu; oduwakisa bulongu buMoab wandi.

¹⁹ Durungula ubonga misiengi miotsu nesi mikandu nesi mineni na duwangisa miri miotsu miboti na dugulasana bileka biotsu na dubunga manungi motsu na mamanyi.

²⁰ Kabogu kedi va diweru diuvagula pagu jitsangu bamalaba mamba uruga meruyi o nsila jiEdom na bulongu bumabasa nyidu.

²¹ Bisi Moab botsu bamagulu yiri bakaga uruga beruyi ubatumuna, bamanengila botsu abamaba bawelimina unangula mata na bamayeviva va mandilu.

²² Bamarelama kedi jineni, nyangu jinobala bagora baMoab bamalabilila mamba amamabanganga nderi malungu.

²³ Bamagamuga rie: Malungu! Bakaga bamabokasana na majenga; tʼwendianu uyekinda!

²⁴ Tumba banobambana na milaku mibaIsrael, bagora baIsrael bamayebafuangama; kabogu bisi Moab bamarina. Bagora baIsrael bamabaduka te no bulongu buMoab na bamababoka.

²⁵ Bamapansa misiengi, mutu mutu amatinda mamanyi na bamagulasana bileka na bamawanga miri miotsu amiboti. Bango bilangandaji bamatsiengila Quir-Heres na bamagubelisa.

²⁶ Kaga jiMoab anolaba yiri agorungula uwarila divita dieni amagukiga yisambuali yikama tsibagora na bamawendanga na majenga mogu uweliga udila nsila te nombu kaga jiEdom; tumba basamarungula utola.

²⁷ Mbana kaga jiMoab amabonga tsomi andi jidibaala agu mbe amarumanga va yivinga yiandi, amamuvagula pagu jiunyensa va julu yivaga. Dionyi dimaba nsoruru ombu baIsrael te na bamakakana na kaga jiMoab na bamayenagabuga o bulongu buogu.