2 Bakaga 24 - La Sainte Bible en Langue Yipunu

¹ Va temu durumu duandi Nabucodonosor kaga jiBabylone amakota o bulongu buJuda. Joaquim amaba o tsi durumu duandi bilima birieru te na amakaluga mumbini.

² Mbana Fumu amatinda batu uyetoga na Joaquim, diwendi rie: bagora baBabylone na baSyrie na baMoab na baAmmon; amabatinda uyebunga Juda nana babiyitsi bamavosila Fumu.

³ Dionyi dimalabana na musuga uFumu agumaronda utsiemusa bufumu buJuda.

⁴ Diwendi rie: Manasse amavaga masumu mapuela mapuela, amabokisa batu bapuela abasamaba na mbela na malungu mogu mamabasa Jerusalem te na Fumu asamagaru utanda monyi.

⁵ Misamu misusu miJoaquim na motsu ama amavaga mimasonugu mu Dibuku diBisalu bibaKaga baJuda.

⁶ Joaquim amafu. Joakin muana andi udibaala amaruma va yivinga yiandi.

⁷ Kaga jiEgypte asamamuerungula upala o bulongu buandi mu mbari kaga jiBabylone amabonga biotsu biandi; ubandila o mujamba uEgypte te no mujamba uEuphrate.

Joakin kaga jiJuda; buviga butega

⁸ Joakin amaba na yigumi na yinana yibilima ava amabandila uba kaga na amaruma tsungi yirieru o Jerusalem. Diina dinguji andi Nehoucheta muana mugetu uElnatan muisi Jerusalem.

⁹ Amavaga amasamalasa Fumu ubueji dedi mosi na taji andi.

¹⁰ Vana temu eni bagora baNabucodonosor kaga jiBabylone bamayetoyisa bisi Jerusalem na bamakanda musiengi.

¹¹ Nabucodonosor jaʼ beni amatola ava bamagukandila.

¹² Mbana Joakin kaga jiJuda amawenda ombu kaga jiBabylone jogu na nguji andi na basalitsi bandi na basefu bandi na mivangu miandi. Kaga jiBabylone amabakotisa botsu o buviga mu yilima yimuranu bidurumu duandi.

¹³ Nana Fumu amavosila aguna amapalisila bilundulu biotsu biNdagu Nsambi na bindagu kaga; amapansa bisalulu biotsu bilora abi kaga Salomon amakotisa o Ndagu Nsambi.

¹⁴ Amabega bisi Jerusalem botsu baviga na basefu botsu na babaala botsu bamangolu; dutalu duogu dumaba yigumi yitosini tsibaviga tsiri utala basarpati na bavayitsi bamangongi; bamasila yika mua batu.

¹⁵ Abamabegu o Babylone ababa: Joakin na nguji andi na bagatsi bandi na baneni bandi va mosi na basefu baJuda.

¹⁶ Dutalu dubatu baneni abamabegu o Babylone dumaba yisambuali yitosini: babaala bamangolu abamaba bawelimina utoga divita; dutalu dubasarpati na bavayitsi bamagongi dumaba tosini.

¹⁷ Kaga jiBabylone amavinsa Mattania kaga va yivinga yikatsi andi Joakin agu jandi amavinsa diina diSedecias.

Sedecias, kaga jiJuda

¹⁸ Sedecias amaba na magumabeji na yilima yimosi ava amabandila uba kaga, amaruma yigumi na yilima yimosi o Jerusalem. Diina dinguji andi Hamoutal muana mugetu uJeremie muisi Libna.

¹⁹ Amavaga amasamalasa Fumu ubueji dedi mosi na Joaquim.

²⁰ Dionyi dimalabana mu diambu dikabu aji Fumu amanyoyila Jerusalem na baJuda, batu aba amaronda utsiemusa va gusu andi. Sedecias amakaluga mumbini ukaga jiBabylone.