2 Bakaga 22 - La Sainte Bible en Langue Yipunu

Josias, kaga jiJuda

¹ Josias amaba na yinana yibilima ava amabandila uba kaga, amaruma magumarieru na yilima yimosi o Jerusalem. Diina dinguji andi Yedida muana mugetu uAdaya muisi Boscat.

² Josias amavaganga amamalasa Fumu ubueji na amadukanga bifu bitaji andi David; asamagungisa ne yimosi ne yisusu.

Yivunda yibavagulitsi bapagu amalaba dibuku dimigaga

³ Yilumbu yimosi mu yilima yiyigumi na yinana bidurumu duandi Josias amasindiga Chafan muana dibaala uAssalia mutegula uMechoullam agumaba musonitsi o Ndagu Nsambi.

⁴ Amamuruma rie: Wenda ombu Hilquia yivunda yibavagulitsi bapagu nomutsingula rie: Tala mbongu atsimabegu o Ndagu Nsambi atsi bakelisi bamakotulu bamadila ombu batu.

⁵ Bowakisa mbongu tsieni ombu jogu abesali bisalu biotsu biNdagu Nsambi. Botsisalisa ufuta jogu abelondi Ndagu:

⁶ nesi basarpati nesi bamason nesi basalitsi basusu; nosumba tsimbi na mamanyi biwelimina ulondila Ndagu.

⁷ Tumba bayabawivula ubalasa nana bamatsisalisila mu mbari bavu basigama.

⁸ Mbana Hilquia yivunda yibavagulitsi bapagu amatsingula Chafan musonitsi rie: Nyimalaba dibuku dimigaga o Ndagu Nsambi. Hilquia amawakisa Chafan dibuku; amadiranga.

⁹ Mbana Chafan musonitsi amayedendula motsu ombu kaga rie: Bavagulitsi bamagukiga mbongu atsibetsi o Ndagu na bamatsiwakisa ombu jogu abelondi Ndagu Nsambi.

¹⁰ Chefan musonitsi amamuetsingula kaga rie: Hilquia yivunda yibavagulitsi bapagu amapega dibuku.

Chafan amadiranga va gusu kaga. Josias na Houlda mubiyitsi umugetu

¹¹ Ava kaga Josias amagululu mambu madibuku dimigaga amapasa biduaru biandi.

¹² Kaga amaruma Hilquia yivunda yibavagulitsi bapagu na Ahicam muana dibaala uChafan na Akbor muana dibaala uMikaya na Chafan na Assaya musonitsi ususu ukaga rie:

¹³ Yewivula Fumu mu diambu diami na dibaJuda botsu mu diambu dimambu ama tumagulu mu dibuku adimabolu. Bataji betu basamadedila mambu madibuku diedidi na basamaduka motsu amamatutsingula muna; diurungula uba yiri Fumu ana tindi kabu netu.

¹⁴ Hilquia yivunda yibavagulitsi bapagu na Ahicam na Akbor na Chafan na Assaya bamawenda ombu mubiyitsi umugetu diina diandi Houlda agumaba mugatsi Challoum muana dibaala uTicva mutegula uHaras agumaba mukelisi ubiduaru. Amatsaninanga o Jerusalem o yiari yisusu yimusiengi.

¹⁵ Banomana uvosa nandi amabatsingula rie: Fumu Nsambi Israel jandi rie: Yetsingulanu dibaala aditsidusindiga ombu gami rie:

¹⁶ Fumu jandi rie: Guluanu, nyulasa mbura ejiji nesi batu abetsani vava maguga dedi mosi nana dutsigululu mambu madibuku adi kaga jiJuda amarangisa.

¹⁷ Bisi Jerusalem bamambusa na bamavagulila bansambi bangana bima bimbunga jiboti, bamanyoyisa na bisalu biogu biotsu, nyimanyoyila bisi mbura eni tindi kabu, jionyi jigosaguga.

¹⁸ Tumba dukatsingula kaga jiJuda agumadusindiga uyekwivula uwivula Fumu, Fumu Nsambi Israel jandi rie: Gumagulu bulumbi budibuku.

¹⁹ Gumagulu na buranga adi nyimavosa mu diambu diJerusalem na dibatu abetsani muna; mukilu ogu uba uneni te na diina diogu diusalusu uwarisa milogu. Gumakalula diela, gumasinga mbela agu te na gumapasa biduaru biagu na gumalila. Meʼ wami nyimagugulu, nyisingi amagu;

²⁰ la dibandu dufu duagu dugobila na mambu na gugolaba maguga motsu ama nyulasa bisi Jerusalem. Yivunda yibavagulitsi bapagu na bambatsi bandi bamayetsingula kaga kabusulu eni.