2 Bakaga 21 - La Sainte Bible en Langue Yipunu

Manasse, kaga jiJuda

¹ Manasse amaba na yigumi na bilima bibeji ava amabandila uba kaga na amarumanga magumaranu na bilima biranu o Jerusalem. Diina dinguji andi Hefsi-Ba.

² Amavaga amasamalasa Fumu ubueji, amavaga nsoruru tsibisi malongu ama Fumu amabingila baIsrael.

³ Amamuerungulila mbura tsiduyitsu atsi taji andi Ezekias amapansa, amarungila Baal binyensulu bipagu, amavalisa kosi jiAstarte; dedi mosi na Achab kaga jiIsrael amakota muyitsa ubambuelili na tsungi na wisi.

⁴ Amarunga binyensulu bipagu bingana o Ndagu Nsambi diuleba Fumu amavosa rie: Nyutsananga va gari batu bami o Jerusalem.

⁵ Amarunga binyensulu bipagu bibambuelili na tsungi na wisi va ndombili tsiotsu tsibeji tsiNdagu Nsambi.

⁶ Amanyensa muana andi udibaala pagu; amakipanga banganga bamunongu na munongu na amasola batu abamayitsanga binyunyi bibi noresanga. Amaviosulila uvaga amasamalasanga Fumu ubueji umunyoyisa.

⁷ Amavalisa kosi jiAstarte aji amakotisa o Ndagu Nsambi. Diuleba Fumu amatsingula David na muana andi Salomon rie: o Ndagu Nsambi o Jerusalem musiengi agu nyimasola va gari misiengi miyigumi na bifumba bibeji biIsrael; nyuyetsananga mutubu va gari batu.

⁸ Pa baIsrael bekelisi maruma ama nyimabaruma ne migaga ami musalitsi ami Moise amabaruma ukelisa ngomuebasingisa ulinga yiari na yiari bibulongu abu nyimavega bataji bogu.

⁹ Tumba baJuda basamadedila Fumu, bamadutu na Manasse na bamaviolila ne bisi malongu aba Nsambi amabingisila baIsrael uvaga mabi.

¹⁰ Mbana babiyitsi baFumu bamamuvosila mambu memama rie:

¹¹ Manasse, kaga jiJuda amavaga nsoruru tsieni na amaviosulila nesi baAmor abamamureyila na amarombisa baJuda uyitsa bakosi;

¹² la dibandu Fumu Nsambi Israel amavosila rie: Nyulasa Jerusalem na baJuda maguga amobakiga mutu uotsu agumagulu murima.

¹³ Nyubunga Jerusalem nana nyimabungila Samarie na mukilu uAchab dedi mosi nana mutu etsinduli yipela noyigudiga anana nyuvayila Jerusalem.

¹⁴ Nyubusa bansialutsu bami na nyubawakisa ombu bavinitsi bogu abobakinda tindi ubakinda.

¹⁵ Nyudivaga mu mbari batu bami bamavaga amasamandasa ubueji na bamanyoyisa ubanda na yilumbu ayi bataji bogu bamapalila o Egypte te na namunyi.

¹⁶ Manasse amaboka batu bapuela abasamaba na mbela te na malungu mogu mamabasa Jerusalem kodu mosi te na jisusu, va julu vana amavaga masumu amamarombisa baJuda uvaga amasamalasa Fumu ubueji.

¹⁷ Misamu misusu miManasse na motsu ama amavaga na masumu ama amavaga mimasonugu mu Dibuku diBisalu dibaKaga baJuda.

¹⁸ Manasse amafu, amatsigu o nungi va mugula ndagu andi diwendi rie: o nungi jiOuza. Amon muana andi udibaala amaruma va yivinga yiandi.

Amon, kaga jiJuda

¹⁹ Amon amaba na magumabeji na bilima bibeji ava amabandila uba kaga na amaruma bilima bibeji o Jerusalem. Diina dinguji andi Mechoullemet muana mugetu uHarous muisi Yotba.

²⁰ Amon amavaga amasamalasa Fumu ubueji dedi mosi nana taji andi Manasse amavayila.

²¹ Amaduka bifu biotsu bitaji andi, amasalila bakosi aba taji andi amasalila na amagudama va gusu ogu.

²² Amabusa Fumu Nsambi bataji bandi na asamamudukanga.

²³ Baneni baAmon bamamutungila fundu na bamamubokisa o ndagu andi.

²⁴ Tumba baJuda bamabokisa botsu abamatungila kaga Amon fundu mbana bamasola Josias muana andi udibaala kaga va yivinga yiandi.

²⁵ Misamu misusu miAmon na motsu ama amavaga mimasonugu mu Dibuku diBisalu bibaKaga baJuda.

²⁶ Bamutsiga o ngila andi o nungi jiOuza. Josias muana andi udibaala amaruma va yivinga yiandi.