2 Bakaga 20 - La Sainte Bible en Langue YipunuUbela na ubeluga uEzekias ( Es 38.1-8 ; 2 Mis 32.24 ) 1 Va temu eni Ezekias amabela diambu. Esaie mubiyitsi, muana dibaala uAmots amawenda ombu gandi uyemutsingula rie: Fumu jandi rie: Kunsama mu mbari yika ufu guifu; gugomuebeluga. 2 Ezekias amageluga o yibaga, mbana amasambila Fumu dusambu duedudu rie: 3 Aa Fumu, rangimina yiri nyimawendanga sungingi va gusu agu na usigamana murima usunda na nyimavaganga yika maboti va gusu agu! Ezekias amalila tindi ulila. 4 Esaie amapala na mbe asakananga dulombili dugari Fumu amavosa nandi rie: 5 Gabuga yetsingula Ezekias sefu jibatu bami rie: Fumu agu, Nsambi taji agu David, jandi rie: Nyimagulu dusambu duagu na nyimalaba matsanga magu. Guluati, nyugubelusa; yilumbu ayimurieru guwenda o Ndagu Nsambi. 6 Nyugubuesa yigumi na bilima biranu. Nyuguwaka kalala, jenu na Jerusalem ombu kaga jiAssyrie. Nyukelisa musiengi egugu mu diambu dimeʼ beni na dimusalitsi ami David. 7 Esaie amavosa rie: Bonga mubanda umifiga. Bamagupieta va julu disieyi mbana Ezekias amabeluga. 8 Ezekias amawivula mubiyitsi rie: Yilimba yi yiunjabisa yiri Fumu ombelusa na yiri nyuwenda yilumbu ayimurieru o Ndagu Nsambi? 9 Esaie amavosa rie: Yilimba ayi Fumu oguvega ugujabisa yiri odugusu adi amavosa ayiyi: yidumbitsi yiuwenda yigumi yitaka o gusu vo o nsima; yi guirondi; o gusu vo o nsima? 10 Ezekias amawaka rie: Digaa diranga pa yidumbitsi yiuwenda yigumi yitaka o gusu; uviolila ubueji pa yiugabuga yigumi yitaka mansinsima. 11 Mbana Esaie mubiyitsi amasambila Fumu agumagabusa yidumbitsi yigumi yitaka mansinsima mu yikadi yiAhaz. Ezekias udila edili bilumbi biBabylone ( Es 39 ) 12 Va temu eni wandi Merodak-Baladan muana dibaala uBaladan agumaba kaga jiBabylone amatinda muganda na musangulu ombu Ezekias mu mbari amagulu ubela ebeli. 13 Ezekias amadila bilumbi na amabilasa yilundulu yiandi, yilora jivema na yilora na bima bimbunga jiboti na matsi madufunu duneni na yilundulu yibitogulu na biotsu abimaba o bilundulu biandi; Ezekias amabilasa biotsu nesi bindagu andi nesi bibufumu buandi buotsu. 14 Esaie mubiyitsi amamuewenda ombu kaga Ezekias uyemuwivula rie: Diambu yi batu bebaba batsigutsingula na agunyi batsirugasana? Ezekias amawaka rie: Bamarambuyila vala o Babylone. 15 Esaie amamuewivula rie: Yi batsilaba o ndagu agu? Ezekias amawaka rie: Batsilaba biotsu abivu o ndagu ami; vagaa ne yima yimosi mu bilundulu biami ayi ngaabalasa. 16 Mbana Esaie amatsingula Ezekias rie: Leguluati diambu diFumu! 17 Yilumbu yimosi bosuvila biagu biotsu o Babylone ubandila na abi bataji bagu bamagukiga te na binamunyi. Fumu jandi rie: Vagosiala ne yimosi. 18 Na bobonga baana bagu bababaala aba ndeʼ beni gumabura ubavaga mivangu o ndagu kaga jiBabylone. 19 Ezekias bamawaka Easie rie: Diambu diFumu adi gutsivosa divu diboti. Adi amatasa rie: Voba duvotsu na tuba sui yitsingu yiami yiotsu. 20 Misamu misusu miEzekias na motsu ama amavaga na nana amavayila ditanga utolisa mamba o Jerusalem mimasonugu mu Dibuku diBisalu bibaKaga baJuda. 21 Ezekias amafu. Manasse muana andi udibaala amaruma va yivinga yiandi. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon