2 Bakaga 2 - La Sainte Bible en Langue Yipunu

Nsambi umatisa ematisi Elie. Elisee yivinga yiandi

¹ Mambu amamalabana muna yilumbu ayi Fumu amamatisila Elie o julu mu yimbongila amama:

² Elie amatsingula Elisee rie: Kokolu tsiagu siala vava mu mbari Fumu ensindiyi o Bethel. Tumba Elisee amawaka rie: Fumu jaʼ beni ejabi na ndeʼ beni guijabi! Ngokakana nagu.

³ Dibuli dibabiyitsi abamaba o Bethel bamayebengusana Elisee na bamamuwivula rie: Guijabi yiri Fumu omatisa fumu agu o julu namunyi? Amawaka rie: Nyidijabi; duyamue divosa.

⁴ Elie amamutsingula rie: Kokolu tsiagu Elisee, siala vava mu mbari Fumu ensindiyi o Jericho. Tumba Elisee amawaka rie: Fumu jaʼ beni ejabi na ndeʼ beni guijabi! Ngokakana nagu. Bamatola o Jericho.

⁵ Dibuli dibabiyitsi abamaba o Jericho bamabambana na Elisee na bamamuwivula rie: Guijabi yiri Fumu omatisa fumu agu o julu namunyi? Amawaka rie: Nyidijabi, duyamuedivosa.

⁶ Elie amamutsingula rie: Kokolu tsiagu, siala vava mu mbari Fumu ensindiyi o Jourdain. Tumba Elisee amawaka rie: Fumu jaʼ beni ejabi na ndeʼ beni guijabi! Ngokakana nagu. Bamayenawenda jogu botsu babeji.

⁷ Magumaranu mababiyitsi bamabaduka na bamasikama mua vala, usungasana nogu; Elie na Elisee bamasikama va disimu dimujamba Jourdain.

⁸ Mbana Elie amavula yijungi yiandi, amayifuriga na amadimba mamba; mamakegaba yiari na yiari, botsu babeji bamavioga va mbura jikamuga.

⁹ Banosabuga Elie amatsingula Elisee rie: Pondi ayi guirondi yiri nyuguvayila ne Fumu akakakasana nagu. Elisee amawaka rie: Kokolu tsiagu, peyi makabu mabeji mamangolu magu mamubiyitsi.

¹⁰ Elie amavosa rie: Guivondi diambu divura. Tumba pa guindabi ava nyimatili o julu, dionyi diuguvagulu; pa tsiri nana digoguvagulu.

¹¹ Bamamuebuesa uwenda noyenavosanga; sundila dikalu dimuji na bakabala bamuji bimabakakasana jogu botsu babeji; Elie amamatusu o julu va gari yimbongila.

¹² Elisee anodilaba amagamuganga rie: Tata ami! Tata ami! Dikalu diIsrael na mubeyitsi andi! Anolaba yiri agatsi amavula biduaru biandi na amabipasa biasi bibeji.

¹³ Mbana amabola yijungi ayi Elie amabondusa. Va julu vana amayenagabuga na amasikama va disimu diJourdain;

¹⁴ amabonga yijungi ayi Elie amabondusa amayedimba mu mamba na amawivula rie: Fumu Nsambi Elie aka? Mbana amadimba mamba amamakegaba yiari na yiari na amasabuga.

¹⁵ Dibuli dibabiyitsi abamaba o Jericho va nsungisini bamadilabilila na bamavosa rie: Yinyunyi yimubiyitsi ayibetsi na Elie yivu na Elisee! Bamayemubengusana na bamagudama va tsi va gusu andi.

¹⁶ Bamamutsingula rie: Va gari etu vavu magumaranu bababaala abavu na mangolu; guirondi yiri boyeromba fumu agu? Tumba Elisee amabagabusila rie: Dayabasindiga.

¹⁷ Tumba yitsingu yineni bamamutsotsa; kabogu Elisee amavosa rie: Ka basindiyianu. Bamasindiga magumaranu mababaala abamayeromba Elie mu bilumbu birieru na basamamulaba.

¹⁸ Ava bamagabuyila ombu Elisee o Jericho amabawivula rie: Ngaadutsingula rie: Duyawenda?

Elisee ubuejisa ebuejisi yileka yiJericho

¹⁹ Bisi Jericho bamatsingula Elisee rie: Musiengi egugu uvu uboti nana guilabili tumba mamba magaa maboti na bivaru bigebendi buranga.

²⁰ Elisee amavosa rie: Mbeyilianu yipela yigona, dukapodula musayi muna. Bamamuvega yionyi.

²¹ Amawenda o yileka na amakuka musayi muna mbana amavosa rie: Fumu jandi rie: Nyimabuejisa mamba memama; magomuerombisa nesi dufu nesi bunguma.

²² Mamba meni mamabueji te na namunyi nana Elisee amatubulila.

Nsambi ukilisa ekilisi badesitsi

²³ Elisee amarambuyila vana Jericho uwenda o Bethel; ava amawendilanga baana bageyi bamapala mu musiengi na bamamudesa. Bamagamuganga rie: Divenda! Divenda!

²⁴ Amageluga ubagengila na amabaloga mu diina diFumu. Mbana ursa beji bimapala va musiru na bimaji magumana na baana beni babeji.

²⁵ Elisee anorambuga vana amawenda o mukongu uCarmel, aguna amagabuyila o Samarie.