2 Bakaga 16 - La Sainte Bible en Langue Yipunu

Ahaz, kaga jiJuda

¹ Yilima yiyigumi na yisambuali bidurumu duPeca muana dibaala uRemalia, Ahaz muana dibaala uYotam amaba kaga jiJuda.

² Ahaz amaba na magumabeji mabilima ava amabandila uba kaga na amaruma yigumi na bilima bisiamunu o Jerusalem. Amavaga amasamalasa Fumu Nsambi andi ubueji, diwendi rie: asamaduka bifu bitaji andi David.

³ Amadukanga bifu bibakaga baIsrael na amanyensa nesi muana andi udibaala ava amakotila miyitsa mimalongu ama Fumu amabingila baIsrael.

⁴ Amavagulanga pagu na bima bimbunga jiboti va mbura tsiduyitsu va julu tsimikongu na va tsi tsimiri.

⁵ Mbana Ressin kaga jiSyrie na Peca muana dibaala uRemalia agumaba kaga jiIsrael bamawenda uyetumuna bisi Jerusalem. Bamakanda Ahaz tumba basamarungula umubelisa.

⁶ Anobingisa baJuda o musiengi uElath amagugabusa ombu bisi Edom; bisi Edom bamayetsana mutubu.

⁷ Ahaz amatinda bulumbi ombu Teglath-Phalasar kaga jiAssyrie uyemutsingula rie: Menu nyivu musalitsi agu na muana agu udibaala; ruga yikuaka kalala ombu kaga jiSyrie na kaga jiIsrael abetumuni.

⁸ Ahaz amabonga lora jivema na lora abimaba o Ndagu Nsambi na mu bilundulu bindagu kaga; amabitinda mulendu ombu kaga jiAssyrie.

⁹ Kaga jiAssyrie amamugulu; amayetumuna bisi Damas, amagupatula na amabega bisi musiengi eni baviga o Quir na amabokisa Ressin.

¹⁰ Kaga Ahaz amagabuga o Damas ubenguna na Teglath-Phalasar kaga jiAssyrie. Kaga Ahaz anolaba yinyensulu yipagu ayimaba o Damas amasonina Ouria muvagulitsi upagu muganda mu diambu diyinyensulu yieni yipagu nana yimarungulu.

¹¹ Ouria muvagulitsi upagu amarungisa yinyensulu yipagu yigona nana kaga Ahaz amamusonina muganda o Damas; amamana uyirungisa nesi kaga Ahaz akaruyila o Damas.

¹² Ava kaga amaruyila o Damas amalaba yinyensulu yipagu, amakueka na amamata va julu yionyi;

¹³ amanyensisa pagu tsiandi tsimunongu na munongu na amawitila pagu tsiandi tsiunu na malungu mapagu tsiandi tsikabusulu tsimaboti muna.

¹⁴ Amagusula yinyensulu yipagu yikunga va gusu Ndagu Nsambi yiri yigoba va mugula uyinyensulu yipagu yigona; amayiviosa o yiari yibanda yiNdagu Nsambi.

¹⁵ Kaga Ahaz amaruma Ouria muvagulitsi upagu diruma diedidi rie: Nyensanga pagu jiunyensa jikedi na mulendu utsisiga va yinyensulu yipagu ayineni na pagu jiunyensa jikaga na mulendu andi na pagu jiunyensa jibisi bulongu botsu na milendu miogu na gukawitila pagu ogu jiunu muna na gukawitila malungu motsu mapagu tsiunyensa tsimunongu na munongu muna; yinyensulu yipagu yikunga yiukengila.

¹⁶ Ouria muvagulitsi upagu amadedila motsu ama kaga Ahaz amamuruma.

¹⁷ Kaga Ahaz amapansa bisunsulu bibansienga. Amasundusa nsienga ajimaba va julu yigumi na bangombi babeji bakunga na amajisunsa va tsi.

¹⁸ Mu diambu dikaga jiAssyrie amavinsa adimanengulungu dikotulu diTsona adimaba va gari ndagu kaga na Ndagu Nsambi.

¹⁹ Misamu misusu miAhaz na motsu ama amavaga mimasonugu mu Dibuku diBisalu bibaKaga baJuda.

²⁰ Ahaz amafu na amatsigu va mosi na bataji bandi o musiengi uDavid. Ezekias muana andi udibaala amaruma va yivinga yiandi.