2 Bakaga 15 - La Sainte Bible en Langue Yipunu

Azaria, kaga jiJuda

¹ Yilima yimagumabeji na yisambuali bidurumu duJeroboam kaga jiIsrael, Azaria muana dibaala uAmassia kaga jiJuda amarumanga.

² Amaba na yigumi na bilima bisiamunu ava amabandila uba kaga na amarumanga magumaranu na bilima bibeji o Jerusalem. Diina dinguji andi Yekolia muisi Jerusalem.

³ Amavaganga amamalasa Fumu ubueji dedi mosi na taji andi Amassia.

⁴ Dimosi buandi mbura tsiduyitsu tsisamatsiemuga, batu bamamuevagulilanga pagu na bima bimbunga jiboti va mbura tsiduyitsu.

⁵ Fumu amanamusu kaga nyambi ajimatsinga te na dufu duandi, kabogu amatsananga mu ndagu mua vala na batu. Yotam muana dibaala ukaga amarumanga o ndagu andi na amatabutilanga bisi bulongu bunsonsi.

⁶ Misamu misusu miAzaria na motsu ama amavaga mimasonugu mu Dibuku diBisalu bibaKaga baJuda.

⁷ Azaria amafu na bamamutsiga va mbura jimosi na bataji bandi o musiengi uDavid. Yotam muana andi udibaala amarumanga va yivinga yiandi.

Zacharie, kaga jiIsrael

⁸ Yilima yimagumarieru na yinana bidurumu duAzaria kaga jiJuda, Zacharie muana dibaala uJeroboam amaba kaga jiIsrael o Samarie. Amaruma tsungi yisiamunu.

⁹ Amavaga amasamalasa Fumu ubueji dedi mosi nana bataji bandi bamavayilanga. Amavaga masumu maJeroboam muana dibaala uNebat agumarombisa baIsrael uvaga masumu.

¹⁰ Challoum muana dibaala uYabech amamutungila fundu na amamuboka na amaruma va yivinga yiandi.

¹¹ Misamu misusu miZacharie mimasonugu mu Dibuku diBisalu bibaKaga baIsrael.

¹² Anana mambu maFumu mamadugusulu ama amatsingula Jehu rie: Baana bagu bababaala te na dukula dumuina botsananga va yitsiga yibufumu buIsrael.

Challoum, kaga jiIsrael

¹³ Challoum muana dibaala uYabech amaruma mu yilima magumarieru na yifu bidurumu duAzaria kaga jiJuda. Amaruma tsungi mosi o Samarie.

¹⁴ Menahem muana dibaala uGadi amarambuyila o Tirsa na amawenda o Samarie, amayeboka Challoum muana dibaala uYabech guna; amaruma va yivinga yiandi.

¹⁵ Misamu misusu miChalloum na fundu aji amatunga Zacharie mimasonugu mu Dibuku diBisalu bibaKaga baIsrael.

¹⁶ Mbana Menahem amatumuna bisi Tappoua na amaboka batu bapuela ubandila muna nesi te no Tirsa; amadivaga mu mbari basamamusinga; amapasa mioji mibagetu abamaba na mimi.

Menahem, kaga jiIsrael

¹⁷ Yilima yimagumarieni na yifu yidurumu duAzaria kaga jiJuda, Menahem muana dibaala uGadi amaba kaga jiIsrael; amarumanga yigumi yibilima o Samarie.

¹⁸ Amavaga amasamalasa Fumu ubueji, temu andi jiotsu amavaganga masumu maJeroboam muana dibaala uNebat agumarombisa baIsrael uvaga masumu.

¹⁹ Poul kaga jiAssyrie amaruga o bulongu buIsrael; Menahem amavega Poul magumarieru matona tsilora jivema yiri omuwamusa uwarisa bufumu buandi.

²⁰ Menahem amapatula baIsrael mbongu tsieni atsi amafuta kaga jiAssyrie; amabavondila mutu mutu magumaranu malora tsivema. Kaga jiAssyrie amayenagabuga na asamamuesikama mu nsila o bulongu bueni.

²¹ Misamu misusu miMenahem na motsu ama amavaga mimasonugu mu Dibuku diBisalu bibaKaga baIsrael.

²² Menahem amafu, Pecahia muana andi udibaala amaruma va yivinga yiandi.

Pecahia, kaga jiIsrael

²³ Yilima yimagumaranu bidurumu duAzaria kaga jiJuda, Pecahia muana dibaala uMenahem amaba kaga jiIsrael o Samarie. Amaruma bilima bibeji.

²⁴ Amavaga amasamalasa Fumu ubueji; amavaganga masumu maJeroboam muana dibaala uNebat agumarombisa baIsrael uvaga masumu.

²⁵ Peca muana dibaala uRemalia yivunda yiandi yibagora amamutungila fundu; amamuboka va mosi na Argob na Arie o Samarie o ndagu kaga, amaba na magumaranu mabagora abamaba bisi Galaad. Anana amabokisila Pecahia na amaruma va yivinga yiandi.

²⁶ Misamu misusu miPecahia na motsu ama amavaga mimasonugu mu Dibuku diBisalu bibaKaga baIsrael.

Peca, kaga jiIsrael

²⁷ Yilima yimagumaranu na bibeji bidurumu duAzaria kaga jiJuda, Peca muana dibaala uRemalia amaba kaga jiIsrael o Samarie. Amarumanga magumabeji mabilima.

²⁸ Amavaga amasamalasa Fumu ubeji; amavaganga masumu maJeroboam muana dibaala uNebat agumarombisa baIsrael uvaga masumu.

²⁹ Va temu Peca kaga jiIsrael Teglath-Phalasar kaga jiAssyrie amaruga na amabonga misiengi miemimi: Yon na Abel-Bet-Maaca na Yanoa na Quedech na Hassor na yiari yiGalaad na yiGalilee na bulongu buotsu buNeftali; amabega bisi malongu meni bakoli o Assyrie.

³⁰ Osee muana dibaala uEla amatungila Peca fundu na amamubokisa; amaruma va yivinga yiandi mu yilima yimagumabeji bidurumu duYotam muana dibaala uAzaria kaga jiJuda.

³¹ Misamu misusu miPeca na motsu ama amavaga mimasonugu mu Dibuku diBisalu bibaKaga baIsrael.

Yotam, kaga jiJuda

³² Yilima yimubeji yidurumu duPeca muana dibaala uRemalia agumaba kaga jiIsrael, Yotam muana dibaala uAzaria amaba kaga juJuda.

³³ Amaba na magumabeji na bilima biranu ava amabandila uba kaga, amarumanga yigumi na bilima bisiamunu o Jerusalem. Diina dinguji andi Yeroucha muana mugetu uSadoc.

³⁴ Amavaganga amamalasa Fumu ubueji; amavaga dedi mosi na taji andi Azaria.

³⁵ Dimosi buandi mbura tsiduyitsu tsisamatsiemuga, batu bamamuevagulilanga pagu na bima bimbunga jiboti va mbura tsiduyitsu. Yotam amarungulila dikotulu dineni diNdagu Nsambi.

³⁶ Misamu misusu miYotam na motsu ama amavaga mimasonugu mu Dibuku diBisalu bibaKaga baJuda.

³⁷ Vana temu eni Fumu amabanda usingisa Ressin kaga jiSyrie na Peca kaga jiIsrael uyetoyisa bisi Juda.

³⁸ Yotam amafu na amatsigu na bataji bandi o musiengi uDavid. Mbana Ahaz muana andi udibaala amaruma va yivinga yiandi.