2 Bakaga 13 - La Sainte Bible en Langue Yipunu

Joachaz, kaga jiIsrael

¹ Yilima yimagumabeji na birieru bidurumu duJoas muana dibaala uAhazia agumaba kaga jiJuda, Joachaz muana dibaala uJehu amaba kaga jiIsrael o Samarie; amarumanga yigumi na yisambuali yibilima.

² Amavaga amasamalasa Fumu ubueji; asamabusa ne disumu dimosi diJeroboam muana dibaala uNebat agumarombisa baIsrael uvaga masumu.

³ Fumu amanyoyila baIsrael tindi kabu te na amabawakisa ombu Hazael kaga jiSyrie mbana ombu muana andi Ben-Hadad. Yitsingu yineni bamaba o tsi durumu dubisi Syrie.

⁴ La dibandu Joachaz amatatila Fumu. Fumu amamugulu mu mbari amalaba purulu aji kaga jiSyrie amalasa baIsrael,

⁵ Fumu amatindila baIsrael mugobutsi ajimawaka baIsrael kalala ombu bisi Syrie. Ubandila va temu eni baIsrael bamamuetsana nana va kala.

⁶ Tumba basamakaluga diela, bamaduka masumu maJeroboam na bisi ndagu andi abamarombisa baIsrael uvaga masumu; bamasambilanga kosi jiAchera ajimarelugu o Samarie.

⁷ Va disukusulu dimotsu Fumu amasila Joachaz yika magumaranu mababeyitsi babakabala na yigumi yimakalu mamadilu na yigumi yitosini tsibagora; diwendi rie: kaga jiSyrie amababokisa na amabakalusa nderi difufundu.

⁸ Misamu misusu miJoachaz na motsu ama amavaga mimasonugu mu dibuku diBisalu bibaKaga baIsrael.

⁹ Joachaz amafu na bamamutsiga o Samarie. Joas muana andi udibaala amaruma va yivinga yiandi.

Joas, kaga jiIsrael

¹⁰ Yilima yimagumarieru na yisambuali bidurumu duJoas kaga jiJuda, Joas muana dibaala uJoachaz amaba kaga jiIsrael o Samarie, amarumanga yigumi na bilima bisiamunu.

¹¹ Amavaga amasamalasa Fumu ubueji; asamabusa ne disumu dimosi diJeroboam muana dibaala uNebat agumarombisa baIsrael uvaga masumu.

¹² Misamu misusu miJoas na motsu ama amavaga na divita adi amatoga na Amassia kaga jiJuda mamasonugu mu Dibuku diBisalu bibaKaga baIsrael.

¹³ Joas amafu na bamamutsiga o Samarie mbura jimosi na bakaga baIsrael, Jeroboam amaruma va yivinga yiandi.

Elisee ubiga ebiyi mbetsulu jibisi Syrie

¹⁴ Elisee amabela buali abumuboka; mbana Joas kaga jiIsrael amawenda uyemulaba na amalila rie: Tata ami! Tata ami! Dikalu diIsrael na mubeyitsi andi.

¹⁵ Elisee amaruma rie: Bonga pita na mbansa. Kabogu kaga amabonga pita na mbansa.

¹⁶ Mbana Elisee amaruma kaga rie: Duta pita. Anojiduta Elisee amagaanga makaka makaga

¹⁷ na amavosa rie: Dibula fenetera jiyiari ayi wisi epalili. Amajidibula. Elisee amaruma rie: Nonga! Amanonga. Aduna duvu dubansa dundungulu jiFumu. Dubansa dundungulu jibaIsrael na dubetsulu jibisi Syrie. Nyiina, gubelisa bisi Syrie o Afec na dubabunga.

¹⁸ Elisee amamueruma rie: Bonga mbansa tsisusu. Kaga amatsibonga. Elisee amaruma kaga rie: Nonga va tsi. Kaga amanonga kumbu yirieru va tsi mbana amadunda.

¹⁹ Mubiyitsi amamunyoyila kabu na amavosa rie: Mbe gutsinonga kumbu yiranu vo yisiamunu va tsi mbana mbe gubelisa bisi Syrie mutubu; kabogu gubabelisa yika kumbu yirieru.

²⁰ Elisee amafu na bamamutsiga. Yilima na yilima bagora baMoab bamakotanga o bulongu buIsrael.

²¹ Yilumbu yimosi ava bamatsiyilanga mfumbi bamalabilila bagora uruga beruyi kabogu bamabuaga mfumbi o ngila jiElisee mbana bamarina mbangu. Mfumbi jinobemba bivisi biElisee jimasundila urambuga.

Bisi Syrie bamabetsu

²² Hazael kaga jiSyrie amalasanga baIsrael maguga yitsingu yiotsu yidurumu duJoachaz.

²³ Tumba Fumu amabalasa yingeba na amabatanda mu diambu dipangini andi na Abraham na Isaac na Jacob, asamaronda ubabunga; te na namunyi asamabaliyila nsima.

²⁴ Hazael kaga jiSyrie amafu mbana Ben-Hadad muana andi udibaala amaruma va yivinga yiandi.

²⁵ Joas amapatula Ben-Hadad misiengi ami Hazael amapatula taji andi Joachaz o divita. Joas amabelisa Ben-Hadad kumbu yirieru na amamuedila misiengi miIsrael.