2 Bakaga 12 - La Sainte Bible en Langue Yipunu

Joas, kaga ju Juda

¹ Joas amaba na yisambuali yibilima ava amabandila urumanga. Yilima yimusambuali yidurumu duJehu kaga jiIsrael,

² Joas amabanda durumu duJuda na amarumanga magumana mabilima o Jerusalem. Diina dinguji andi Sibia muisi Bercheba.

³ Joas amavaganga amamalasanga Fumu ubejji mu mbari amalonsu na Yoyada muvagulitsi upagu.

⁴ Dimosi buandi asamapansa mbura tsiduyitsu; batu bamamuevagulanga pagu tsiunyensa na bima bimbunga jiboti va mbura tsiduyitsu.

Joas ulonda elondi Ndagu Nsambi

⁵ Joas amatsingula bavagulitsi bapagu rie: Mbongu tsiotsu atsikoti o Ndagu Nsambi atsimavegu na baIsrael botsu abamasansumu na atsimaruyila ukobula batu na yisingu yimuvagulitsi upagu na atsi batu bamavega na tondini o Ndagu Fumu,

⁶ kadi muvagulitsi upagu otsiwakisa ombu batu abejabi yisalu ulonda; balondi mbura la mbura tsiNdagu Nsambi atsimabiva.

⁷ Tumba dimalabana yiri yilima yimagumabeji na birieru bidurumu dukaga Joas bavagulitsi bapagu mbe basakalonda ne mbura mosi.

⁸ Kaga Joas amanengila Yoyada muvagulitsi upagu na bavagulitsi bapagu basusu mbana amabawivula rie: Dibandu yi dugaalondila mbura atsimabiva muna Ndagu Nsambi? Kabogu dugomuedila mbongu tsikala tumba dutsisalisa ulondila Ndagu Nsambi.

⁹ Bavagulitsi bapagu bamasinga yiri bagodila mbongu tsibatu na yisalu yiulonda Ndagu Nsambi yigoba va julu tsimiuru miogu.

¹⁰ Mbana Yoyada muvagulitsi upagu amabonga yigara na amayitoba diluta va yidibutsu mbana amayisunsa va mugula uyinyensulu yipagu o yiari yimabaala va mbura aji bamavioyilanga ukota o Ndagu Nsambi. Bavagulitsi bapagu abamakelisanga makotulu bamapodula mbongu tsiotsu atsi batu bamabeganga o Ndagu Nsambi muna.

¹¹ Ava bamalabila yiri mbongu tsipuela tsimaba o yigara bamanengila musonitsi ukaga na yivunda yibavagulitsi bapagu; bamatalanga mbongu atsimaba o yigara o Ndagu Nsambi.

¹² Banotala mbongu bamatsiwakisa ombu jogu abamarumanga bisalu biNdagu Nsambi.

¹³ Bamasalisa mbongu tsieni ufuta basarpati na basalitsi botsu abamasalanga o Ndagu Nsambi, nesi bamason nesi bapakitsi bamamanyi nosumba tsimbi na mamanyi wandi abimalondulu Ndagu Nsambi nofuta biotsu bisusu ujilondila.

¹⁴ Tumba na mbongu atsi bamabeganga o Ndagu Nsambi basamatsisalisa uvaga nesi nsienga jilora jivema nesi dibaga nesi dimoyi nesi mumbanda nesi yisalu yiotsu yilora vo yilora jivema.

¹⁵ Mbongu tsieni tsimasalusu na basalitsi yika ulondila Ndagu Nsambi.

¹⁶ Basamawivulanga babaala abamasalisanga mbongu tsieni ubalasa nana bamatsisalisilanga mu mbari bamabavayila yitu.

¹⁷ Mbongu tsipagu tsimbela na pagu tsiduliomusu tsimapodulu o yigara; tsiotsu tsina tsimaba tsibavagulitsi bapagu.

Disukusulu didirumu duJoas

¹⁸ Hazael kaga jiSyrie amawenda na amatumuna bisi Gat, amagubonga mbana amaba na ditasa uyetumuna bisi Jerusalem.

¹⁹ Joas kaga jiJuda amagukiga bima biotsu biyingitsi abimavegu kala na bataji bandi: Josaphat na Joram na Ahazia nesi jaʼ beni va mosi na lora tsiotsu atsimaba o bilundulu biNdagu Nsambi na bindagu kaga na amatinda biotsu bina ombu Hazael kaga jiSyrie; kabogu asamamuetumina bisi Jerusalem.

²⁰ Misamu misusu miJoas mimasonugu mu dibuku diBisalu bibaKaga baJuda.

²¹ Bivunda biandi bibagora bamamutungila fundu; bamaboka Joas o Bet-Millo.

²² Yozabad muana dibaala uChimeat na Yehozabad muana dibaala uChomer, basalitsi bandi bamamudimba na amafu. Bamamutsiga o musiengi uDavid. Amassia muana andi udibaala amaruma va yivinga yiandi.