2 Bakaga 10 - La Sainte Bible en Langue Yipunu

Ubokisa bebokisi mukuta uAchab

¹ O Samarie umaba magumidusambuali mabaana bababaala baAchab. Jehu amasona miganda ami amatinda o Samarie ombu: bivunda bibagora biJizreel na bivunda na milonsi bibaana baAchab. Mimasonugu rie:

² Mu mbari baana bakaga bavu nenu nesi makalu nesi bakabala nesi bitogulu na duvu o musiengi ukandu

³ kabogu dukasola muana dibaala ukaga aguvu uwelimina, dukamutsanisa va yitsiga yibufumu yitaji andi, kunsamanu ugaga mukuta ukaga.

⁴ Bamagaangu na goma jineni, bamavosa rie: Labatianu, kaga beji tsigaarungula ugagana nandi; yika tsie jetu turungulila ugagana?

⁵ Yivunda yindagu kaga na yivunda yibagora yimusiengi na bivunda na milonsi mibaana baAchab bamatinda bilumbi uyetsingula Jehu rie: Jetu tuvu basalitsi bagu, tuvaga diotsu adi gututsingula; tugosola mutu ususu uba kaga; vaga yika adi guilabi diwelimina.

⁶ Jehu amabasonina muganda agumubeji rie: Pa jenu duvu abami na pa duirondi udedila diufi diami tabulanu baana bakaga miuru, dukamibeyila mugesa va diweru diedidi o Jizreel. Kabogu magumidusambuali mabaana bakaga bamatsana na bivunda biSamarie abimababangusa.

⁷ Ava bamadilila muganda bamanengila baana bakaga na bamatabula magumidusambuali meni miuru; mbana bamasunsa miuru miogu mu bievi na bamabitindila ombu Jehu o Jizreel.

⁸ Yilumbi yimayemutsingula rie: Bamabega miuru mieni. Mbana amaruma rie: Misunsianu maguki mabeji va dikotulu dimusiengi te na kedi.

⁹ Kedi anopala amakelasa ombu batu botsu na amavosa rie: Jenu dugaa na mbela? Mbe ka kaga Joram meʼ nyimamuboka; tumba banyi bamaboka batu bebaba?

¹⁰ Tumba jabanu yiri motsu ama Fumu amavosa mu diambu dibaana baAchab mamalabana; Fumu amadugusu adi musalitsi andi Elie amamuvosila.

¹¹ Mbana Jehu amaboka botsu baAchab aba mbe bamasiala o Jizreel na baneni bandi na tindi bambatsi bandi na bavagulitsi bapagu bandi, asamarinisa ne umosi.

Ubokisa bebokisi baana babakaga baJuda

¹² Mbana Jehu amaretsama uwenda o Samarie. Anotola o ndagu mosi jiyibenguna yibabungulitsi babindombu muna nsila,

¹³ Jehu amabenguna na batu abamaba baana bataji baAhazia kaga jiJuda na amabawivula rie: Jenu banyi? Bamawagula rie: Jetu tuvu baana bataji baAhazia na tuiwendi uyevega mbolu ombu baana bakaga jimugetu Jezabel na baana bakaga basusu.

¹⁴ Jehu amavosa rie: Bagaangianu! Bamabagaanga na bamababoka va mugula uyiduna yiBet-Equed, dutalu duogu dumaba magumana na babeji; Jehu asamarinisa ne umosi.

Jehu ubenguna ebenguni na Yonadab

¹⁵ Jehu amarambuga vana, amabenguna na Yonadab muana dibaala uRekab agumayemubengasana. Amamuvega mbolu na amamuwivula rie: Guji nami nana nyivu nagu? Yonadab amawaka rie: Nyiji nagu. Jehu amabuela rie: Pa guji nami peyi dikaka diagu. Yonadab anomuvega dikaka, Jehu amamumatisa mu dikalu diandi na amavosa rie:

¹⁶ Tʼwendi nyugulasa yiusila yiami ayi nyivayili Fumu. Anana amayenamubeyila mu dikalu diandi.

¹⁷ Jehu amatola o Samarie na amaboka botsu baAchab abamasiala o Samarie, amatsiemusa mukuta eni uotsu dedi mosi nana Fumu amatsingulila mubiyitsi Elie.

Jehu utsiemusa etsiemusi muyitsa uBaal

¹⁸ Mbana amagukiga bisi Samarie botsu novosa rie: Achab amaduka Baal mua pesu, Jehu omuduka tindi uduka.

¹⁹ Ndengililianu babiyitsi botsu baBaal nesi badukitsi bandi botsu nesi bavagulitsi bapagu bandi botsu; ne umosi ayagambu mu mbari nyuvagulila Baal pagu jineni jiunyensa; uotsu agugambu aboku. Jehu amabasoga diela, amaronda uboka badukitsi botsu baBaal.

²⁰ Amaruma rie: Vaganu feta jiuyitsila Baal. Bamajivaga.

²¹ Amatinda bilumbi o Israel jiotsu, badukitsi botsu baBaal bamatola ne umosi asamagambu; bamakota o ndagu Baal te na ndagu andi jimaba jibasa de!

²² Jehu amaruma agumakelisanga bikutu rie: Palisa bikutu biotsu bibadukitsi baBaal. Dibaala dieni amapalisa bikutu biogu.

²³ Mbana Jehu na Yonadab muana dibaala uRekab bamawenda o ndagu Baal mbana bamaruma rie: Pa vavu badukitsi baFumu, bapalisianu; vobanganga yika badukitsi baBaal.

²⁴ Mbana bamakota uvagula pagu tsiunyensa na pagu tsimunongu na munongu. Jehu amasunsa magumidunana mababaala va gusu kana aba amatsingula rie: Jandi agurinisa mutu va gari babaala beni aba nyiduwakisi oboku va yivinga yiandi.

²⁵ Banomana uvagula pagu tsiunyensa Jehu amaruma bagora na bivunda bibagora rie: Kotanu, babokianu ne umosi ayapala. Kabogu bamababoka. Bagora na bivunda bibagora bamababoka na bamabuaga bamfumbi o tsomu dimbu mbana bamagabuga o ndagu Baal.

²⁶ Bamapalisa bitumba bindagu Baal o gusu kana mbana bamabinyensa.

²⁷ Bamaberusa yitumba yiBaal na bamapansa ndagu Baal na bamajivayila mbura unyakila, jionyi jivu te na namunyi.

Jehu, kaga jiIsrael

²⁸ Jehu amatsiemusa muyitsa uBaal va gari baIsrael;

²⁹ tumba asamakalula diela mu diambu dimasumu maJeroboam muana dibaala uNebat agumarombisa baIsrael uvaga masumu na amadukanga bangombi balora abamaba o Bethel no Dan.

³⁰ Fumu amatsingula Jehu rie: Mu mbari gumadugusu amami ukilisa mukuta uAchab kabogu baana bagu bababaala botsana va yitsiga yibufumu yiIsrael te na dukula dumuina.

³¹ Ne nana Jehu asamakalula diela uduka migaga miFumu Nsambi Israel; asamadunda masumu ama Jeroboam amarombisa baIsrael uvaganga.

³² Vana temu eni Fumu amabandila ugeyisa bulongu buIsrael; amasingisa Hazael utoyisa baIsrael o mandilu mogu motsu.

³³ Ubandila o Jourdain o yiari ayi wisi epalili amabelisa bulongu buotsu buGalaad, biari bibaGad na bibaRuben na bibaManasse ubandila o Aroer o mujamba u Amon te no Galaad no Bachan.

³⁴ Misamu misusu miJehu na motsu ama amavaga mamasonugu mu Dibuku diBisalu bibaKaga baIsrael.

³⁵ Jehu amafu na bamutsiga o Samarie. Joachaz muana andi udibaala amaruma va yivinga yiandi.

³⁶ Jehu amarumanga baIsrael magumabeji na yinana yibilima o Samarie.