1 Timothee 6 - La Sainte Bible en Langue Yipunu

¹ Jogu abavu basalitsi bagengili fumu tsiogu na babiyitsi yiri diina diNsambi na malongi mandi biuyitsu wandi.

² Na jogu abavu batu baNsambi bayabalensa mu mbari bavu baana bataji tumba babasalili ne uviolila mu mbari abesalulu baji aba Nsambi na aba durondu. Lonsa mambu memama nomawarisanga.

Malongi mamfurulu na busina abuvu bungensa

³ Uotsu oyilonsi malongi mamfurulu na agelonsi mambu mangensa maFumu etu Jesus Christ na mamuyitsa etu

⁴ ana dunangu duneni na agejabi diambu. Ewivuli bivu bikulini na etumuni paga; motsu mana mebeyi diwavi

⁵ na mitsundu na dilensa na mitsoki mikulini tsibatu abagaa na matasa mawelimina na abamavinda ngensa. Berondi usalila muyitsa udila busina.

⁶ Dingensa muyitsa uirunguli uvaga mutu yisina pa eguvayili yitu.

⁷ Yima yi tumabega ava tumakotila o bulongu buebubu? Yima yi yiuwenda ava tuipalili? Yigatsi!

⁸ Kabogu pa tuna biguji nesi biduaru adina diwelimina.

⁹ Tumba jogu aberondi busina bomangu puela nesi ugaangu na nsala tsibi tsibuduka atsiubabega o dubungu.

¹⁰ Durondu dumbongu duvu dibandu dimabi motsu na bamosi banotsidila bamabunsa yitu na baji mu maguga maneni.

Malongi ombu Timothee jaʼ beni

¹¹ Tumba ndeʼ mutu Nsambi, rina mambu meni motsu. Sola uba usungama nobagunu na Nsambi noba na yitu na durondu na pugu nobanganga sui.

¹² Nyirondiubagusuna yitu yiagu nananderi guivovini, kabogu wara na gusaku, diwendi rie: monyu umutubu. Ava Nsambi amagusolila amaronda uguvega monyu eni na ndeʼ beni gumagusingisila bumbeji va gusu bambeji bapuela.

¹³ Mu diina diNsambi oyiveyi monyu na mu diina diJesus Christ omavosa bumbeji buboti va gusu Ponce Pilate, nyigurumi rie:

¹⁴ Kekelisa na guyaba na mbela te na Fumu Jesus Christ olabana.

¹⁵ Dulasu dueni dumakunsu na Nsambi mu temu jiwelimina, jandi ojivu Kaga mosi buandi avu Kaga jibakaga na Fumu jibafumu.

¹⁶ Jandi pinsa ana monyu agugevioyi; ana bundumba buneni abu mutu asakalaba na bugorungula ulabu; na ana duyitsu na mangolu mamutubu! Amen!

¹⁷ Lonsa bisina bitemu ejiji yiri bayaba na dunangu na ditasa diogu diyaba mu busina abuinyambini tumba bavayili Nsambi yitu, jandi oyituveyi bima biotsu ne uviosulila.

¹⁸ Balonsi uvaga maboti na usalanga bisalu biboti nogabilanga batu.

¹⁹ Pa bevayingi nana bevayi nderi besueyi busina abulabana o gusu, diwendi rie: bodila monyu aguvu tindi monyu.

²⁰ Timothee, kelisa motsu amamaguvegu. Busa posulu tsidisabu na mitsundu ami bamosi besalisi ulasa dujabu adugaa tindi dujabu.

²¹ Mu dionyi bamosi bamabunsa yitu yiogu. Maboti maNsambi mabi nagu!