1 Timothee 4 - La Sainte Bible en Langue Yipunu

Balonsi bamfurulu

¹ Tumba Yinyunyi yiNsambi etulasi kengili yiri va temu tsiusitabamosi bobunsa yitu yiogu; bodedila binyunyi bimfurulu na boduka malongi mabayisi.

² Bodunsu na baboti bamiunu na bifutsi abagemuekipa mambu.

³ Batu beni begandisi basusu uwelana na bebagandisi uji biguji bimosi. Tumba Nsambi amabisunda biligu kabogu pa mutu agumavayila Nsambi yitu olemugabusila diboti orungula ubiji.

⁴ Yiotsu ayi Nsambi amayisunda yivu yiboti, vagaa yimosi ayiubusu pa bebiji na kabusulu tsimaboti

⁵ mu mbari Mambu maNsambi na dusambu bibiliomisi.

Musalitsi uboti uJesus Christ

⁶ Pa gulonsa mambu meni ombu baana bataji guba musalitsi uboti uJesus Christ agumalonsu mambu mayitu na malongi maboti ama gumaduka na buranga.

⁷ Busa tsavu tsikulini na bingitsi bibivunda. Wiji ubagunu na Nsambi

⁸ mu mbari usalisa dunyuru divu diwelimina tumba ubagunu na Nsambi diviolili ubueji; uonyi uitulonsi nsanunu tsiwelimina na guituveyi monyu umutubu.

⁹ Adina la diambu dingensa na divu diwelimina uvagulu yitu.

¹⁰ La dibandu tuisalilingi na tuiwarili mu mbari tuna ditasa ombu Nsambi aguvu monyu, jandi aguvu Mugobutsi ubatu botsu sinsa viri abamamuvayila yitu.

¹¹ Samuna nolonsa mambu meni.

¹² Mutu ayalensa bungebi buagu tumba mu motsu, diwendi rie: ne posulu ne nsanunu ne durondu ne yitu ne usiema, lasa ombu botsu amavu mawelimina.

¹³ Kevega uranga Mambu maNsambi nolubusa batu nobalonsa te na vana nyuruyila.

¹⁴ Guyagungisa pegulu ajivu nagu ajimaguvegu ava babiyitsi bamabiyila na ava bivunda bimagusakiyila miogu.

¹⁵ Duka mambu meni nolasa ombu botsu yiri ubanguga guibanguyi.

¹⁶ Guyavinsa bifu biagu na malongi magu na vaganga ama guivayingi mu mbari pa guivayi nana gukegobula na jogu abegugulu bogobulu wandi.