1 Timothee 3 - La Sainte Bible en Langue Yipunu

Bivunda bidibundu

¹ Mbembu ejiji jivu jingensa: pa mutu erondi uba yivunda yidibundu erondi yisalu yiboti.

² Yivunda ayaba na nsiembu; abi na mugatsi umosi; abi sui; abi sikiri; abi usunda mu nsanunu andi; abi na yisagumunu; ajabi ulonsa.

³ Ayalanga na ayaba na dikasi tumba abi mumbosi na mungo duvotsu. Ayaba na nsala mbongu.

⁴ Vengu oruma ndagu andi na buranga na akelisi baana bandi o tsi durumu duandi na abalonsi uba na businginyi;

⁵ pa mutu agejabi uruma batu bandi tsie orungulila ukelisa dibundu diNsambi?

⁶ Ayaba agutsigobulu yika namapapa mu mbari oba na dunangu na obelusu nana diabu amabelusulu.

⁷ Na vengu osingusulu bumbeji buwelimina na jogu abagaa na muyitsa etu yiri agosutusu nogaangu na bifu bidiabu.

Bawamusi badibundu

⁸ Abewamusi mu yisalu yidibundu babi na businginyi wandi, bayaba na mabeʼ mabeji na bayaba na nsala malamu; bayaba na jiba

⁹ na bawarisi yitu yiogu; bawarisi malongi mangensa na mayitu; bayaba na mbela tsiotsu.

¹⁰ Pa bamalasa yiri bagaa na mbela mbana bokota o yisalu.

¹¹ Munongu mosi bagatsi bogu vengu boba na businginyi; bayaba babeyitsi bamatamba; babi sui na babi basigama mu mambu motsu.

¹² Abewamusi mu yisalu yidibundu babi na mugatsi umoʼ umosi, bajabi uruma baana bogu buranga;

¹³ mu mbari jogu abedugusu yisalu yiogu na buranga boyitsu na boba na musuga uvosa mambu mayitu ayivu netu mu mbari tumafubana mirima na Jesus Christ.

Yimaga yimuyitsa etu

^14-15 Nyirondi ugulaba namapapa tumba tanguji ngoleruga. Nyigusonini mu mbari tanguji nyutsinga na nyirondi yiri gujaba nanavengu tutsanina mu dibundu adivu diNsambi aguvu monyu na adivu nderi dikutu na diwarisi ngensa.

¹⁶ Ka muna yimaga yi yivu mu muyitsa etu! Jandi amakaluga mutu na dusungugu duandi dumalasu na Yinyunyi yiNsambi, amalabana na biansa, amasamunu o malongu motsu, amavagulu yitu na bisi butamba na amamatusu o julu.