1 Timothee 2 - La Sainte Bible en Langue Yipunu

Malongi madusambu

¹ Kabogu dilongi ditega adidi rie: Sambilanu Nsambi mu diambu dibatu botsu tsiri yika tsambu tumba na dulembu na ponditsi na kabusulu tsimaboti.

² Sambilanu wandi mu diambu dibakaga na mu diambu dibarumitsi yiri tutsana sui na buranga na duyitsu duotsu na businginyi.

³ Adina diboti na diwelimina va gusu Nsambi Mugobutsi etu

⁴ oyirondi yiri batu bogobulu nojaba ngensa.

⁵ Mu mbari Nsambi mosi buandi avu na yilumbi yimosi buandi yivu ayibengusini Nsambi na batu la Jesus Christ agumakevega nyiobu jibatu botsu.

⁶ Adina dimalasa yiri Nsambi erondi ugobula botsu.

⁷ La dibandu amansindiyila nana yilumbi na nana mulonsi ombu abagaa baJuif uyenasamunanga malongi mayitu na mangensa. Ngefuri. Ngensa nyivosingi.

⁸ Kokolu, nyirondi yiri babaala basambilingi, diwendi rie: babaala abamakevega ombu Nsambi, abagaa na paga vo mutsundu tumba abavu na nsala jineni usambila.

⁹ Nyirondi wandi yiri bagetu baduari nduaritsi jiwelimina nokesunsa. Bayaviosulila uduara ne uvanda ne usakiga misanga amivu na perala vo milunga vo bipunga nesi uduara biduaru bidufunu duneni.

¹⁰ Tumba babi na bifu biboti nana divu diwelimina ombu bagetu abesali yisalu yiNsambi.

¹¹ Mugetu agulu malongi, noba sui, nokesunsa buranga.

¹² Ngesingisi mugetu ulonsa na ayaruma dibaala tumba vengu otsana sui.

¹³ Mu mbari Adam amareyila usundu mbana Eve.

¹⁴ Va julu vana agumadunsu na nyoga tsiri Adam tumba mugetu. Anodunsu disumu dimakota.

¹⁵ Ne nana anobura, dugobutsu dumalabana. Na bagetu botsu bogobulu pa bewarisingi yitu yiogu. Babi na durondu na babi batu baNsambi na bajabi ukesunsa.