1 Samuel 9 - La Sainte Bible en Langue Yipunu

Saul na baburu abamatsiemuga

¹ Vamaba muisi Benjamin diina diandi Quich muana dibaala uAbiel muana dibaala uSeror muana dibaala uBekorat muana dibaala uAfia muana dibaala umuisi Benjamin. Amaba yisina.

² Amaba na muana udibaala diina diandi Saul, mufudu agumaba muboti, amaba tindi muboti ne uviolila baIsrael botsu nesi usakama wandi.

³ Yilumbu yimosi baburu baQuich taji Saul bamatsiemuga, kabogu Quich amaruma muana andi Saul rie: Bonga musalitsi umosi wendanu uyenaromba baburu.

⁴ Amavioyila o mukongu uEfraim no bulongu buChalicha, basamabalaba guna. Bamamuevioga o bulongu buChaalim, basamaba guna wandi; bamatsiengila bulongu buBenjamin ne nana basamabalaba.

⁵ Banotola o bulongu buSouf, avana Saul amanengilila musalitsi andi rie: Tʼwendi tuyenagabuga mu mbari taji ami akelibana baburu noba na murima o julu mu diambu dietu.

⁶ Musalitsi amamutsingula rie: O musiengi egugu uvu mubiyitsi aguiyitsu; motsu ama evosi melabini. Tʼwendi ombu gandi tanguji otulonsa yiari ayi tuwenda.

⁷ Saul amawivula musalitsi andi rie: Pa tuwenda, yima yi tumubeyila? Tuisaa na yima mu komi tsietu na tuisaa na yima uvega mubiyitsi. Yima yi yivu netu?

⁸ Musalitsi amamuetsingula Saul rie: Nyina mua mbongu; nyurungula umuvega tsionyi mbana otulonsa agu tuwendasana.

⁹ (O Israel, va kala ava bamayemoyilanga na Nsambi bamavosanga rie: Ruganu tʼwendianu ombu mubiyitsi, diwendi rie: Oyijabi adiuba o gusu.)

¹⁰ Saul amatsingula musalitsi andi rie: Guna ndunga; ruga tʼwendi! Kabogu bamawenda o musiengi agu mubiyitsi amaba.

¹¹ Ava bamawendilanga o musiengi bamabenguna na banumba abamawenda o utega mamba, bamabawivula rie: Mubiyitsi aji vava?

¹² Bamabawaka rie: Nyiina aji vana; tumba lensanu nowenda mu mbari lopala epali o musiengi, jivu temu aji batu bovagula pagu va mbura jiyingitsi.

¹³ Ava dutolila o musiengi dumurasuna nesi akawenda o uji o mbura jiyingitsi; mu mbari batu bagoleji te na otola, vengu jandi olevagula pagu; va julu vana obanengila o uji. Kabogu lensanu, dumurasuna va diweru diedidi.

Saul ubenguna ebenguni na Samuel

¹⁴ Bamawenda, banotola o musiengi bamabenguna na Samuel agumaretsama uwenda o mbura yingitsi.

¹⁵ Yilumbu yimosi ne Saul akatola Fumu amalubusa Samuel rie:

¹⁶ Mugesa va diweru diedidi nyusindiga muisi bulongu buBenjamin ombu gagu, gukamubiatsa yivunda yibatu bami mu mbari migamu miogu mimagulunu te nʼombu gami.

¹⁷ Ava Samuel amalabila Saul, Fumu amamutsingula rie: Adina la dibaala adi nyimagutsingula; jandi agurumanga batu bami.

¹⁸ Saul amakueka ombu Samuel va dikotulu dimusiengi na amamuwivula rie: Kokolu tsiagu, ndonsi agu mubiyitsi etsanini.

¹⁹ Samuel amawaka Saul rie: Menu. Rela o mbura jiyingitsi, namunyi guji nami. Mugesa nyuguganina na nyugutsingula ama guirondi ujaba.

²⁰ Tuka bilumbu birieru baburu batsiemuyilanga guyakambulu mu dionyi, bamalabana. Biotsu biIsrael bidufunu duneni binyi? Tsia abiagu na bisi ndagu taji agu?

²¹ Saul amawaka rie: Menu ngaa muisi Benjamin agumapalila mu mua yifumba yigeyi yiIsrael? Na mukuta ami ugaa tindi ugeyi va gari mikuta miotsu miyifumba yiBenjamin? Kabogu dibandu yi guiposili nana?

²² Samuel amakotisa Saul na musalitsi o ndagu na amabavega yitsiga yiduyitsu va gari abamanengulu, bamaba bebeli magumarieru mababaala.

²³ Samuel amaruma musalitsi rie: Bega abi nyimaguvega ava nyimavosila rie: Bisueyi.

²⁴ Mulambitsi amabega yinansa yinsima ayimabaala na biotsu bisusu na amabivega Saul. Samuel amavosa rie: Laba abibi bimagusuegulu, janganga va mosi na aba nyimanengila. Yilumbu yieni Saul amaji va mosi na Samuel.

²⁵ Bamarambuyila o mbura yingitsi na bamawenda o musiengi na Samuel na Saul bamamata va julu muansa avana bamamoyilanga.

Samuel ubiatsa ebiatsi Saul kaga jiIsrael

²⁶ Kedi jineni Saul na musalitsi andi bamarambuga; yika wisi uibandi urenduga Samuel amanengila Saul rie: Ruga tʼwendianu. Saul amasogama jogu botsu babeji na Samuel.

²⁷ Banotola o disogumunu dimusiengi, Samuel amatsingula Saul rie: Ruma musalitsi agu urela. Kabogu musalitsi amarela o gusu. Samuel amamuevosa rie: Sikama, nyirondi ugujabisa adi Fumu evosi.