1 Samuel 8 - La Sainte Bible en Langue Yipunu

BaIsrael bamaronda kaga

¹ Samuel anonuna, amasola baana bandi bababaala bansonsi o Israel.

² Muana andi dibaala agutsomi diina diandi Joel, agumubeji diina diandi Abia; jogu bamaba bansonsi o Bercheba.

³ Baana bababaala baSamuel basamaduka bifu bitaji ogu; bamatsimbu uduka busina, bamasinga ufutu usuega dibi na bamalensa dusungugu.

⁴ Bivunda biotsu biIsrael bamabenguna mbana bamayerasuna Samuel o Rama na bamamutsingula rie:

⁵ Tuilabi yiri gumanuna na baana bagu bageduki bifu biagu. Kabogu tusolili kaga ajiututabulilanga bunsonsi nana divu o malongu masusu.

⁶ Samuel asamalaba ubueji ava amagululu bamavosa rie: Tusolili kaga ajiututabulilanga bunsonsi. Samuel amasambila Fumu.

⁷ Fumu amatsingula Samuel rie: Gukagululu baIsrael motsu ama boguwivula; tsiri ndeju agubeliyili nsima, menu beliyili nsima yiri ngomuebarumanga.

⁸ Beguvayili dedi mosi nana bamapayilanga ubandila ava nyimabapalisila o Egypte te na namunyi; bamandiyila nsima uyenasalilanga bansambi bangana.

⁹ Kabogu gukagulu diufi diogu tumba balubusi na bajabisi musuga ukaga ajiubarumanga.

Musuga ukaga

¹⁰ Samuel amayetsingula mambu motsu maFumu ombu abamamuvonda kaga.

¹¹ Amavosa rie: Guluanu nana kaga eni oduruminanga. Ongasisa baana benu bababaala bagora; obanangiga o makalu mandi na mu bakabala bandi yiri jogu boyenarelanga va gusu dikalu diandi;

¹² obavega bivunda bibatosini na bimagumaramaranu. Basusu ovega yisalu ufutsa manungi mandi notsonsiga migunu miandi notula bitogulu nesi makalu mandi.

¹³ Obonga baana benu babagetu ubavaga bavayitsi bamiyombu na balambitsi na bavayitsi bamapa.

¹⁴ Obonga biasi biboti bimanungi menu na manungi menu amebendisi mfuga tsirayisan na mioliva na obivega ombu baneni bandi.

¹⁵ Obonga yimosi mu digumi bimbutu tsibivaru bienu na mirayisan mienu na obivega ombu baneni bandi.

¹⁶ Obonga basalitsi benu bababaala na babagetu na bafudu benu ababoti na baburu benu na obisalisa mu bisalu biandi.

¹⁷ Obonga yimosi mu digumi mu migamba mienu na jenu beni duba baviga bandi.

¹⁸ Mbana dugamuga mu diambu dikaga aji jenu beni dumasola, tumba Fumu agodugulu.

¹⁹ Batu bamabusa diufi diSamuel, bamavosa rie: Nesi, tuna nsala kaga!

²⁰ Jetu wetu tuba nana malongu masusu. Kaga etu otutabulilanga bunsonsi, jandi oba muru etu na otubeganga o mavita.

²¹ Samuel anogulu motsu mana, amamuematsingula Fumu.

²² Fumu amatsingula Samuel rie: Gulu adi beguwivuli, basolili kaga. Samuel amatsingula baIsrael rie: Gabuganu, mutu mutu o musiengi andi.