1 Samuel 7 - La Sainte Bible en Langue Yipunu

¹ Bisi Quiriat-Yearim bamawenda bamayelandulila yigara yipangini yiFumu; bamayibega o ndagu jiAbinadab o julu mukongu na bamavega muana andi Elazar yisalu ukelisa yigara yipangini yiFumu.

BaPhilistin bamabetsu. Samuel nsonsi jibaIsrael

² Bilima bipuela bimavioga ubanda na yilumbu ayi yigara yipangini yiFumu yimasunsulu o Quiriat-Yearim. Yiotsu yimagumabeji mabilima baIsrael bamatatilanga Fumu.

³ Samuel amatsingula baIsrael botsu rie: Pa duigabuyi na mirima mienu miotsu ombu Fumu, gusulanu bansambi bangana na kosi jiAstarte, keveganu na murima umosi ombu Fumu nosalila yika jandi. Mbana jandi oduwaka kalala ombu baPhilistin.

⁴ BaIsrael bamagusula bakosi baBaal na baAstarte abimaba nogu na bamasalila yika Fumu.

⁵ Samuel amaruma rie: Bengusananu baIsrael botsu o Mispa mbana nyudusambilila Fumu.

⁶ Kabogu baIsrael bamabenguna o Mispa. Bamayetega mamba ama bamapuga va gusu Fumu na bamabusa uji muna yilumbu yieni, bamavosa rie: Tumavayila Fumu dibi! Samuel amatabulila baIsrael bunsonsi o Mispa.

⁷ BaPhilistin bamagulu yiri baIsrael bamabenguna o Mispa kabogu bivunda bibaPhilistin bamatabula diambu uyetumuna baIsrael. Ava baIsrael bamagululu musamu eni bamalaba baPhilistin goma,

⁸ na bamalenda Samuel rie: Guyadunda ugamuyila Fumu Nsambi etu mu diambu dietu yiri otuwaka kalala ombu baPhilistin.

⁹ Samuel amabonga muana yindombu agukinu mabenyi amaguvagula umfuimbila pagu jiunyensa ombu Fumu. Amagamuyila Fumu mu diambu dibaIsrael na Fumu amamugulu.

¹⁰ Ava Samuel amavagulilapagu jiunyensa, baPhilistin bamabambana uyetumuna baIsrael. Muna yilumbu yieni Fumu amagulusu baPhilistin yidumi yiandi te na amabapansa. BaIsrael bamababelisa.

¹¹ Bagora baIsrael bamarambuyila o Mispa na bamabingisa baPhilistin na bamababelisa te no yiari yiBet-Kar.

¹² Samuel amabonga dimanyi adi amareliga va gari Mispa na Schen, na amadiluga Eben-Ezer, amavosa rie: Fumu amatuwamusa te na mbura ejiji.

¹³ Anana baPhilistin bamasundusulu na basamamueruga o yiari yibaIsrael. Fumu amalasa baPhilistin maguga mu yitsingu yiotsu yiSamuel.

¹⁴ Misiengi ami baPhilistin bamapatula baIsrael mimagabuga o Israel ubandila o Ecron te no Gat na biari biogu biotsu; baIsrael bamamipatula baPhilistin. Duvotsu dumaba va gari baIsrael nabaAmor.

¹⁵ Samuel amaba nsonsi o Israel yitsingu yiandi yiotsu.

¹⁶ Yilima na yilima amayetsiengilanga Bethel na Guilgal na Mispa na amatabulilanga baIsrael bunsonsi mu mbura tsieni tsiotsu.

¹⁷ Mbana amagabuganga o Rama agu ndagu andi jimaba; avana wandi amatabulilanga baIsrael bunsonsi na amarungila Fumu yinyensulu yipagu.