1 Samuel 5 - La Sainte Bible en Langue Yipunu

Yigara yipangini ombu baPhilistin

¹ BaPhilistin bamabonga yigara yipangini yiNsambi na bamayigusula o Eben-Ezer na bamayibega o Asdod.

² BaPhilistin banobonga yigara yipangini yiNsambi bamayibega o ndagu Dagon agumaba nsambi ogu. Bamayisunsa va mugula yitumba yiDagon.

³ Kedi ava bisi Asdod bamarambuyila bamarasuna yitumba yiDagon yimaba yigudama va tsi va gusu yigara yipangini yiFumu. Bamayigabusa va mbura andi.

⁴ Kedi mosi bamamuerasuna yitumba yiDagon va tsi va gusu yigara yipangini yiFumu; muru na miogu miotsu mibeji bimapakuga na bimaba va yilemondi, yitumba yiDagon yimaba yika yibingili yibingili.

⁵ La dibandu te na namunyi bavagulitsi bapagu baDagon nesi botsu abekoti o ndagu andi o Asdod bagetsiarili yilemondi.

⁶ Fumu amalasa bisi Asdod tindi maguga; amabanamusu mavugu, jogu na abamatsananga yiari na yiari biAsdod.

⁷ Bisi Asdod banolaba nana divu bamavosa rie: Yigara yipangini yiNsambi Israel yiyatsana ombu getu mu mbari etulasi maguga na elasi nsambi etu Dagon maguga wandi.

⁸ Bamanengila bivunda biotsu bibaPhilistin na bamabawivula rie: Yi tuvaga na yigara yipangini yiNsambi Israel? Bivunda bamawaka rie: Bayevetsiga yigara yipangini yiNsambi Israel o Gat. Kabogu bamayevetsiga yigara yipangini yiIsrael.

⁹ Tumba banoyeyivetsiga, Fumu amalasa bisi musiengi maguga na vamaba dubungu duneni; amanamusu bisi musiengi mavugu nesi bangebi nesi bivunda.

¹⁰ Mbana bamatinda yigara yipangini yiNsambi o Ecron. Yinotola, bisi Ecron bamagamuga rie: Bebeyi yigara yipangini yiNsambi ombu getu uyitubokisa?

¹¹ Kabogu bamanengila bivunda biotsu bibaPhilistin na bamabatsingula rie: Gabusanu yigara yipangini yiNsambi Israel. Yigabuyi o mbura andi yiri yigotubokisa! O musiengi uotsu umaba dubungu duneni, Nsambi amabalasa tindi maguga.

¹² Abasamaboku, bamanamu mavugu na migamu mibisi musiengi mimagulunu te no julu.