1 Samuel 4 - La Sainte Bible en Langue Yipunu

¹ Samuel amamatsingulanga baIsrael botsu. Yilumbu yimosi baIsrael bamayebengusana baPhilistin ubatoyisa. Bamayevaga milaku bebeli na Eben-Ezer na baPhilistin bamavaga milaku va Afec.

Yigara yipangini ombu bavinitsi

² BaPhilistin bamakunsama utoyisa baIsrael mbana bamatoga. BaIsrael bamabetsu na baPhilistin abamaboka bebeli na tosini jina tsibagora.

³ BaIsrael banogabuga o milaku bivunda bamawivula rie: Dibandu yi Fumu atsisingisa namunyi yiri tubetsu na baPhilistin? Tʼwendianu o Silo uyebonga yigara yipangini jiFumu, yiruyi ombu getu utuwaka kalala ombu bavinitsi betu.

⁴ Kabogu bamatinda bilumbi o Silo na bamabaruma ubega yigara yipangini yiFumu ayimaba va gari bibagunu bibiansa. Baana babeji bababaala baHeli: Hofni na Pinhas, bamayevetsiga yigara yipangini yiNsambi.

⁵ Ava yigara yipangini yiFumu yimatolila o milaku mibaIsrael, bagora bamagamuga na nsangu te na butamba buotsu yika usisana.

⁶ Ava baPhilistin bamagululu migamu mieni bamawivusana rie: Dibandu yi baHebreu begamuyili na nsangu o milaku miogu? Ava bamagululu yiri yigara yipangini yiFumu yimatola o milaku mibaIsrael,

⁷ baPhilistin bamagaangu na goma mu mbari bamajaba yiri Nsambi amatola o milaku miogu. Bamavosa rie: Ka muna ubiva gu, tulaba! Tusakalaba diambu dimunongu egugu na kala.

⁸ Ka muna ubiva gu! Anyi otuwaka kalala ombu Nsambi eni aguvu na mangolu? Tsiri Nsambi eni agumanamusu bisi Egypte bivunga bimunongu na munongu o kumu?

⁹ Jenu baPhilistin, warisanu mirima na maninanu mangolu menu yiri dugoba baviga baHebreu nana jogu bamalebila baviga betu. Kodu na kodu, mangolu dedi, mbeyianu? Toganu!

¹⁰ BaPhilistin bamatoga na baIsrael bamabetsu. Mutu mutu amarina o ndagu andi. Dubungu dumaba duneni: baPhilistin bamabokisa magumarieru matosini tsibagora baIsrael.

¹¹ BaPhilistin bamabapatula yigara yipangini yiNsambi na baana babeji bababaala baHeli: Hofni na Pinhas bamafu.

Dufu duHeli na duboji buandi

¹² Muna yilumbu yieni muisi Benjamin amarina divita, na amatola o Silo, biduaru biandi bimayenapapasiga na muru andi umabasa de na butamba.

¹³ Ava amaiolila amarasuna Heli uviva evivi, atsana va mugula nsila mu mbari amaba na murima o julu mu diambu diyigara yipangini yiNsambi. Ava dibaaladieni amatolila o musiengi amavosa misamu na bisi musiengi botsu bamagamuganga.

¹⁴ Ava Heli amagululu migamu mieni amawivula rie: Nduku ajina, divindugulu yi? Mutu amasundila uyetsingula Heli misamu.

¹⁵ Kabogu Heli amaba na magumidufu na yinana yibilima, amaba tumuu na asamamuelabanga.

¹⁶ Dibaala dieni amatsingula Heli rie: Nyiruyili o divita, namunyi nsirina guna. Mbana Heli amamuwivula rie: Mambu tsie mevioyili guna?

¹⁷ Jandi agumabega misamu amavosa rie: BaIsrael bamarina baPhilistin na batu bamabetsu tindi ubetsu; nesi baana bagu babeji bababaala, Hofni na Pinhas bamafu, na yigara yipangini yiNsambi yimabapatulu.

¹⁸ Yika emani uvosa diambu diyigara yipangini yiNsambi, Heli amabonduga va yitsiga yiandi va dikotulu diNdagu Nsambi; amaloguga kingu na amafu, amaba tindi yinunu na amatsira. Amaba nsonsi o Israel magumana mabilima.

¹⁹ Boji buandi, diwendi rie: mugatsi Pinhas amaba na dimi adimaba o mburu. Anogulu misamu miyigara yipangini na dufu duboji buandi na dumulumi andi amakebuaga va tsi na amabura; misongu mimamusutusu.

²⁰ Mugetu eni mbe asakafu, bagetu abamamuburisa bamavosa nandi rie: Guyalaba keri gumabura muana dibaala! Tumba asamabawaka na asamadikipa.

²¹ Amaluga muana, Ikabod, amavosa rie: Bundumba buIsrael bumagusulu! Amadivosila mu diambu diyigara yipangini yiNsambi ayimabapatulu na didufu duboji buandi na dumulumi andi.

²² Amavosa rie: Bundumba buIsrael bumagusulu mu mbari bavinitsi bamatupatula yigara yipangini yiNsambi.