1 Samuel 31 - La Sainte Bible en Langue Yipunu

Dufu duSaul

¹ BaPhilistin bamatoga divita na baIsrael; baIsrael bapuela bamarina baPhilistin na bapuela bamafuila va julu mukongu uGuilboa.

² BaPhilistin bamaduka Saul na baana bandi bababaala na bamaboka Jonatan na Abinadab na Malkichoua.

³ Divita dimagaanga Saul; barela badupalu bamunamusu mbansa te na bamamunemisa agu dufu.

⁴ Mbana Saul amaruma agumaʼbeganga bitogulu biandi rie: Somuna dijenga diagu, ndukuli! BaPhilistin bondukula nonsoyisa! Agumabeyilanga bitogulu amabusa, amagaangu na tindi goma. Kabogu Saul amabonga dijenga diandi na amakebuaga va julu dionyi.

⁵ Jandi agumabeganga bitogulu biSaul anomulaba afu jaʼ wandi amakebuaga va julu dijenga diandi, amafu va mosi nandi.

⁶ Anana ababa bamafuila temu mosi: Saul na baana bandi barieru bababaala na jandi agumabeganga bitogulu biandi na bagora bandi botsu bamafu yilumbu yimosi.

⁷ BaIsrael abamabao yiari yigunu yiyibususu no disimu digunu diJourdain banolaba yiri bagora baIsrael urina berini na Saul na baana bandi bababaala bamafu, jogu wogu bamarina misiengi miogu, baPhilistin bamayetsana muna.

⁸ Ava kedi baPhilistin bamawenda uyevula bamfumbi na bamarasuna bamfumbi baSaul na baana bandi barieru bababaala va julu mukongu uGuilboa.

⁹ Bamatabula muru uSaul na bamabonga bitogulu biandi. Mbana bamanyavisa misamu o bulongu buotsu bubaPhilistin nesi o mandagu mabakosi bogu nombu batu botsu.

¹⁰ Bamakotisa bitogulu biSaul o ndagu nsambi jiAstarte na bamavakiga mfumbi andi mu bibaga biBet-Chean.

¹¹ Ava bisi Yabech o bulongu buGalaad bamagululu nana baPhilistin bamavayila Saul,

¹² bango mangolu bamasogama, bamawenda mukolu uotsu, bamayegusula bamfumbi baSaul na baana bandi mu bibaga biBet-Chean mbana bamagabusila o Yabech agu bamayebanyensila;

¹³ bamabonga migusa na bamamitsiga va tsi tamariska o Yabech. Mbana bamabusa uji te na yisambuali yibilumbu.