1 Samuel 3 - La Sainte Bible en Langue Yipunu

Nsambi usola esoli Samuel uba mubiyitsi

¹ Samuel amasala yisalu yiFumu o tsi durumu duHeli. Va temu eni diufi diFumu disamagugulunungu na biriariamu bisamalalabananga temu na temu.

² Dimaba yiri Heli amabanda ulaba binsiensi, misu yikadimungi nadimungi, amaba asilama va mbura andi.

³ Lambi jiNsambi mbe jisakatsima na Samuel amaba asilama o Ndagu Fumu bebeli na yigara yipangini yiNsambi.

⁴ Mbana Fumu amanengila rie: Samuel. Amawagula rie: Meʼ janduʼgu!

⁵ Amawenda mbangu ombu Heli novosa rie: Meʼ janduʼgu, gutsindengila? Heli amawaka rie: Ngaagunengila; weʼ yesilama. Kabogu amayesilama.

⁶ Fumu amamuenengila rie: Samuel, Samuel. Samuel amarelama na amawenda ombu Heli na amavosa rie: Meʼ janduʼgu, gutsindengila? Heli amawaka rie: Muana ami, ngaagunengila, weʼ yesilama.

⁷ Samuel mbe asakajaba Fumu na mbe asakalonsu mbembu Fumu.

⁸ Fumu amamuenengila kumbu ajimurieru rie: Samuel. Samuel amarelama, amawenda ombu Heli na amavosa rie: Meʼ janduʼgu, gutsindengila? Heli amajaba yiri Fumu agumanengilanga muana.

⁹ Mbana amalonsa Samuel rie: Wenda yesilama; na pa bomuegunengila gukawaka rie: Fumu vosa, musalitsi agu egulu. Kabogu Samuel amayesilama va mbura andi.

¹⁰ Fumu amamueruga vana na amamuemunengila rie: Samuel, Samuel! Samuel amawagula rie: Vosa, musalitsi agu egulu.

¹¹ Mbana Fumu amatsingula Samuel rie: Gulu nyuvaga diambu o Israel adiuswensa matuji mabotsu abodigulu.

¹² Muna yilumbu yieni nyuvayila Heli adi nyimavosa mu diambu dimukuta andi; ngogabusa murima nsima te na nyudidugusu.

¹³ Nyimamulubusa rie: Nyukilisa mukuta agu te na mutubu mu diambu didibi adi ejabi, adi baana bandi bevayingi, bendensingi na agebagandisi.

¹⁴ La dibandu nyilevili pesi mu diambu dimukuta uHeli rie: Dibi diandi digotandu nesi na pagu jiunyensa nesi na pagu jitsangu.

¹⁵ Samuel amasilama te na kedi mbana amasala yisalu yiandi udibula maguyi maNdagu Fumu. Samuel amalaba keri utsingula yiriariamu yieni ombu Heli.

¹⁶ Tumba Heli amanengila Samuel rie: Samuel! Amawaka rie: Meʼ janduʼgu!

¹⁷ Mbana Heli amawivula rie: Diambu yi Fumu atsigutsingula? Guyansueyila diambu. Pa gunsuega ne diambu dimosi adi Fumu atsigutsingula, Nsambi aguvayili ne uviolila adi mbe opayila.

¹⁸ Samuel amamutsingula motsu tsiri usuega diambu. Mbana Heli amavosa rie: Aguna Fumu. Avayi adivu diwelimina.

¹⁹ Samuel amabanguga. Fumu amaba nandi na mambu mandi mamabanganga na tsongu.

²⁰ BaIsrael botsu ubandila o Dan te no Bercheba bamajaba yiri Samuel amaba tindi mubiyitsi uFumu.

²¹ Fumu amakelasanga o Silo; diwendi rie: Amalabana na Samuel o Silo amamujabisa mambu mandi.