1 Samuel 29 - La Sainte Bible en Langue Yipunu

David amagabusu na baPhilistin

¹ BaPhilistin bamagukiga bagora o Afec na baIsrael bamavaga milaku va mugula uyileka yiJizreel.

² Bivunda bibaPhilistin bamawenda va gusu bakama na batosini, David na badukitsi bandi bamaba va nsima va mosi na Akich.

³ Bivunda bibaPhilistin bamawivula rie: Yisalu yi baHebreu besali vava? Akich amawaka yivunda yibaPhilistin rie: Aguna tsiri David musalitsi uSaul, kaga jiIsrael? Kala kala avu nami, aruyilanga ngemulabi na diambu te na namunyi!

⁴ Tumba bivunda bibaPhilistin bamanyoyila Akich na bamamuruma rie: Gabusa mutu agu, agabuyi va mbura aji gumamusunsa; ayawenda netu o utoga yiri agoba muvinitsi etu ava tuitoyili. Tsiri na miuru mietu omuenongila na Saul?

⁵ Tsiri David eni bamavosila ava bamayenawimbililanga ava bamayenayininanga rie: Saul amaboka tosini andi, David amaboka yigumi yiandi yitosini?

⁶ Akich amanengila David na amatsingula rie: Fumu ejabi! Ndeʼ guvu mutu usungama, nyina nsala agu nana na kala, ubanda ava gumatolila ombu gami te na namunyi nyisamagulaba na diambu; tumba bivunda bagegurondi.

⁷ Gabuga na buranga yiri tugoba na musosi na bivunda bibaPhilistin.

⁸ David amawivula Akich rie: Diambu yi nyimavaga? Diambu yi gumalaba nami yiotsu ayi nyivu nagu te na numunyi? Dionyi diukandisa uyetoga na bavinitsi bakaga aguvu fumu ami?

⁹ Akich amawaka David rie: Nyijabi wandi guvu uwelimina, guvu nderi yiansa yiNsambi ombu gami; tumba bivunda bibaPhilistin bevosi rie: Ayawenda netu o utoga.

¹⁰ Kabogu dukarelama kedi jineni, jenu na badukitsi bagu; yika wisi etebuyi dukayenagabuga.

¹¹ David na badukitsi bandi bamarelama kedi jineni ugabuga o bulongu bubaPhilistin. BaPhilistin bamawenda o Jizreel.