1 Samuel 28 - La Sainte Bible en Langue Yipunu

¹ Vana temu eni baPhilistin bamagukiga bagora na bamavaga dibadi dimosi uyetoyisa baIsrael. Akich amatsingula David rie: Guijabi yiri jenu na badukitsi bagu duwenda nami uyetoga divita.

² David amawaka Akich rie: Gulaba adi nyuvaga. Akich amatsingula David rie: Nyuguvega yisalu, guba mukelisi ami te na mutubu.

Saul uweʼ ewendi ombu mugetu aguikelisi matengu o En-Dor

³ Samuel anofu baIsrael botsu bamamulila na bamamutsiga o musiengi andi o Rama. Va julu vana Saul amagandisa batu ukelisa matengu vo uresa o bufumu buandi.

⁴ BaPhilistin bamagimgasana na bamayevaga milaku va Chounem: Saul amagukiga bagora baIsrael na bamavaga milaku va julu mukongii uGuilboa.

⁵ Banolabilila milaku mibaPhilistin Saul amagaangu na goma te na amaregama tindi uregama.

⁶ Saul amaronda uwivula Fumu tumba asamamuwagula, nesi na mandosi nesi na Urim nesi na babiyitsi.

⁷ Saul amaruma baneni bandi rie: Tombilianu mugetu aguikelisi matengu yiri nyuyemulaba. Bamamutsingula rie: Guluati, o En-Dor uvu mugetu aguikelisi matengu.

⁸ Mbana Saul amakevula biduaru bibukaga na amaduara biduaru bisusu, amayenawenda na babaala babeji. Bamatola mukolu ombu mugetu eni. Saul amamuruma rie: Tesiliati, gukapalisila adi nyirondi ulaba.

⁹ Mugetu eni amamuwaka rie: Ndeʼ guijabi adi Saul amavaga o bulongu buebubu na nana amagandisila abekelisi matengu nesi jogu aberesingi.

¹⁰ Dibandu yi guitambili mirambu, umboka? Saul amaleva pesi na diina diFumu rie: Fumu ejabi! Gugolaba diambu mu dionyi.

¹¹ Mugetu eni amamuwivula rie: Ditengu dinyi guirondi yiri nyugupalisila? Amamuwaka rie: DiSamuel.

¹² Ava mugetu eni amalabila ditengu diSamuel amagamuyila Saul rie: Dibandu yi gumandunsila? Tsia ndeʼ Saul?

¹³ Kaga amamutsingula rie: Guyalaba goma; yi guilabi? Mugetu amatsingula Saul rie: Nyilabi ditengu adipalili o tsi butamba.

¹⁴ Amamuwivula rie: Yinsi yimunongu yi yivu nandi? Mugetu amawaka rie: Yiyinunu ayiruyi agumba yijungi. Saul amajaba yiri la ditengu diSamuel, amakebuaga va tsi na amagudama.

¹⁵ Ditengu diSamuel amawivula Saul rie: Dibandu yi gumansoyisila? Dibandu yi gumandegilila? Saul amawaka rie: Munyongu uneni uvu nami; baPhilistin utoyisa betoyisi, Nsambi amakakana nami; asamakwagula nesi na babiyitsi nesi na mandosi. Nyimagunengila yiri gundonsa adi nyuvaga.

¹⁶ Ditengu diSamuel amawivula rie: Dibandu yi gukwivulili? Gugelabi yiri Fumu amakakana nagu na akavu muvinitsi agu?

¹⁷ Fumu amaguvayila dedi mosi nana nyimagulubusila kala. Fumu amagupatula bukaga ubuvega David.

¹⁸ Gusamadedila diruma diFumu uboka baAmalec botsu la dibandu Fumu egukilisili.

¹⁹ Fumu owakisa jenu na baIsrael ombu baPhilistin, mugesa jenu na baana bagu bababaala dutasuna o mbura aji nyivu; bagora baIsrael bowakusu ombu baPhilistin wandi.

²⁰ Saul amasundila ukebuaga va tsi; mambu maditengu diSamuel mamamureyimisa; va julu vana mangolu mamasuka mu mbari asamaleji yilumbu yimfuimbila na mukolu uotsu.

²¹ Mugetu amabambana ombu Saul na anolaba ukambulu uandi amamutsingula rie: Guluati, nyimagulu diufi diagu na nyimabufuila mu diambu diagu.

²² Tsie gulu ndeʼ wagu diufi diami; leji mua biguji yiri gudila mangolu mbana gukayenawenda.

²³ Tumba Saul amabusa na amavosa rie: Ngoji. Tumba bambatsi na mugetu bamutsotsa te na amasinga uji; anorelama amatsana va tangi.

²⁴ Mugetu eni amalensa uboka muvogulu ngombi uvonga na amabonga fufu na amavaga mapa mageyi.

²⁵ Amabisunsa va gusu Saul na bambatsi bandi; bamaji. Mbana bamaretsama na bamayenawenda vana mukolu eni.