1 Samuel 25 - La Sainte Bible en Langue Yipunu

Nabal amabusa ugabila David biguji

¹ Va temu eni Samuel amafu. BaIsrael botsu bamagukama umulila; bamamutsiga vana mbura andi o Rama. Mbana David wandi amawenda o kumu jiParan.

² O yiari yiMaon umaba dibaala adimaba tindi yisina, busina buandi bumaba o Karmel; amaba na tosini yirieru tsibindombu na tosini mosi jibinsabi. Amawenda o Karmel uyefuga migamba miandi.

³ Dibaala dieni diina diandi Nabal na diina dimugatsi andi Abigail agumaba na tindi diela na amaba tindi muboti; mulumi andi amaba mutu uranga na amaba na bifu bibi. Amaba muisi uyifumba yiCaleb.

⁴ Ava David amabila o kumu amagulu Nabal ufuga efuyi bindombu biandi.

⁵ Amasindiga yigumi yibadukitsi bandi ombu Nabal; amabaruma rie: Wendanu o Karmel ombu Nabal. Dukamuwivula misamu.

⁶ Dukamuveyila mambolu nesi bisi ndagu andi nesi abandi botsu.

⁷ Dukavosa rie: David amagulu yiri guvu na bafuyitsi babindombu. Babungulitsi bagu babindombu bamaleba netu; tusamabalasa maguga ne temu mosi na basamapatulu ne yima yimosi temu jiotsu aji bamabila o Karmel.

⁸ Diwivuli basalitsi bagu, jogu bogutsingula. Kabogu David eguwivuli rie: Vayila badukitsi bami maboti wandi mu mbari tumabenguna yikuma na yilumbu yifeta. Kokolu, tuveyi, jetu na David abi gurungula utugabila.

⁹ Ava badukitsi baDavid bamatolila, bamatsingula Nabal mambu meni motsu mu diina diDavid; mbana bamaviva.

¹⁰ Nabal amawivula badukitsi baDavid rie: David lʼanyi? Anyi avu muana uJesse? Namunyi vavu baviga bapuela aberini bafumu bogu.

¹¹ Nyubonga biguji biami na mamba mami na bimitsi biami abi nyimabokila bafuyitsi bami babindombu nobivega ombu batu aba ngejabi agunyi beruyisini?

¹² Badukitsi baDavid bamayenagabuga na bamatsingula David mambu maNabal.

¹³ Mbana David amatsingula badukitsi bandi rie: Mutu mutu aduari dijenga diandi! Mutu mutu amaduara dijenga diandi. David wandi amaduara dijenga diandi; kama jina tsibabaala bamawenda nandi. Kama beji bamasiala ukelisa bima.

Abigail amagabila David biguji

¹⁴ Musalitsi umosi uNabal amayetsingula Abigail mugatsi uNabal rie: Gulu David amatinda bilumbi abimarambuyila o kumu uyevega mbolu ombu fumu etu, jandi asamabadila.

¹⁵ Jetu tumalaba yiri bamaba batu baboti; jogu basamatulasa maguga na basamatupatula yima temu tsiotsu atsi tumaba nogu o misiru miogu.

¹⁶ Nyangu na mukolu jogu bamaba nderi bivaga bietu, temu jiotsu aji tumaba nogu ava tumayenabungulilanga migamba o yiari yiogu.

¹⁷ Jaba na buranga nolaba adi guvaga; dubungu dumulumi agu na dubisi ndagu andi dumatabulu kala, avu mutu uranga agogaru utugulu.

¹⁸ Abigail amalensa ubonga kama beji tsimapa na tsuva beji tsimalamu na bindombu biranu bilambu na bietsu biranu biputu tsigangu na kama jibisaga birayisan migumuga na kama beji tsifiga tsigumuga. Amabilongila va baburu,

¹⁹ mbana amaruma basalitsi bandi rie: Relanu o gusu ami, nyuyenadudukanga. Asamaditsingula mulumi andi Nabal.

²⁰ Amanangama mu buru na amavindama mukongu o musuega; David na badukitsi bandi bamavindama wandi. Bamasundila ubenguna.

²¹ David abanotasa rie: Yika kulini nyimakelisila biotsu bidibaala dieni o kumu, ne yimosi mu biandi yigaatsiemuga; amakabusila dibi mu diboti.

²² Nsambi na mangolu mandi motsu akilisi pa nyulasa ne dibaala dimosi diNabal ditebugulu diwisi!

²³ Ava Abigail amalabila David amalensa nosunduga va buru; amagudama va gusu David na amavosa rie:

²⁴ Kokolu fumu, mbela jivu va julu muru ami! Nsingisi uvosa nagu na leguluati mambu mami.

²⁵ Kokolu fumu guyakipa ubiva uNabal aguvu mutu ubi, avu dedi na diina diandi; divindugulu didiina diandi divu: yiduka, ngensa buduka buvu nandi. Nyisamalaba batu aba gumasindiga.

²⁶ Fumu jaʼ beni ejabi na ndeʼ wandi guijabi Fumu amagugubitsa uruga uyiwitila malungu nokegabusila pila. Bavinitsi bagu na jogu aberombisi ugutsoyisa babi dedi na Nabal.

²⁷ Laba mua muensili agu nsigubeyila agu gugabila badukitsi bagu.

²⁸ Kokolu tsiagu tanda dibi diami! Nyijabi yiri Fumu owakisa bufumu ombu mukuta agu mu mbari guitoyi mavita mandi. Anyi egulabi na dibi?

²⁹ Fumu, mutu amaretsama na yinombu yiandi ugubingisa, erondi uguboka; tumba Fumu Nsambi agu ogukelisanga tumba obuaga bavinitsi bagu dedi mosi nana yilangandaji yitindi mamanyi.

³⁰ Ava Fumu oguvayila maboti motsu ama amavangana nagu na anoguvaga sefu jiIsrael,

³¹ disawelimina yiri gulaba munyongu nesi murima utsira mu mbari gumawitila malungu mangana na gumakegabusila pila. Ava Fumu oguvayila maboti, gukatangimina!

³² David amatsingula Abigail rie: Diboti ombu Fumu Nsambi Israel agutsigusindiga namunyi uyenambengusana.

³³ Diboti ombu gagu, Nsambi agugabili miula, gutsikubitsa uwitila malungu namunyi na ngaamuegabusila pila!

³⁴ Tumba Fumu Nsambi Israel agumakubitsa uguvaga dibi ejabi! Mbe gugaalensa uyenambengusana mbe vagosiala ne dibaala dimosi diNabal ne wisi akatebuga.

³⁵ David amawaka abi Abigail amamubeyila na amamutsingula rie: Wenda na buranga; nyimagulu ndembugulu tsiagu.

Dufu duNabal. David uwela eweli Abigail

³⁶ Ava Abigail amagabuyila ombu Nabal amamurasuna umenga emengi o ndagu andi tindi mumengu ukaga. Nabal amaba na tindi nsangu nesi dilangi kabogu Abigail asamamutsingula misamu te na kedi.

³⁷ Tumba kedi dilangi diNabal dinosaguga, mugatsi andi amamutsingula motsu; Nabal amatabuga nyambu na nyuru tsiandi yika ugala nderi dimanyi.

³⁸ Yigumi yibilumbu binovioga Fumu amamuedimba Nabal na amafu.

³⁹ David anogulu yiri Nabal amafu, amavosa rie: Diboti ombu Fumu agumakusulila yisonyi yibisiengu biNabal na amakubitsa uvaga dibi! Fumu amanangusa Nabal mbivulu tsiandi va julu muru andi. David amasindiga bilumbi ombu Abigail umuwivula umuwela.

⁴⁰ Bilumbi biDavid bimatola ombu Abigail o Karmel na bimamutsingula rie: David amatusindiga ombu gagu uyigulanda uba mugatsi andi.

⁴¹ Amarelama, amagudama va tsi na amavosa rie: Labati, nyivu muviga andi, nyususa nesi makulu mabasalitsi bandi.

⁴² Abigail amasogama vana vana, amanangama va julu buru na amayevetsugu na banumba baranu; amayenadukanga bilumbi biDavid na amakota nandi.

⁴³ David amalewela Ahinoam muisi Jizreel; kabogu botsu babeji bamaba bagatsi bandi.

⁴⁴ Saul amamuewetsa muana andi Mikal, agumaleba mugatsi uDavid na Palti muisi Gallim muana dibaala uLaich.