1 Samuel 22 - La Sainte Bible en Langue Yipunu

David na badukitsi bandi

¹ David amagusuga o Gat; amarina o malima maAdoullam. Baana bataji bandi na bisi ndagu taji andi botsu bamadigulu, kabogu bamawenda ombu gandi!

² Botsu abamaba na munyongu na abamaba na miganu nesi abasamalabanga ubueji, botsu bamawenda ombu gandi na jandi amaba yivunda yiogu; abamafubana nandi bamaba kama jina tsibabaala.

³ Avana David amarambuyila uwenda o Mispe o bulongu buMoab. Amavosa na kaga jiMoab rie: Kokolu tsiagu, singisa taji ami na nguji ami utsana nagu te na nyujaba adi Nsambi opayila.

⁴ Amababega ombu kaga jiMoab na bamatsananga nandi temu tsiotsu atsi David amaba o yisuemunu yiandi.

⁵ Yilumbu yimosi Gad, mubiyitsi amatsingula David rie: Guyatsana o yisuemunu yiagu wenda o bulongu buJuda. David amayenawenda na amatola o musiru uHeret.

Saul amabokisa bavagulitsi bapagu baNob

⁶ Saul amajaba mbura aji David na batu bandi bamaba. Va temu eni Saul amaba atsana va julu mukongu o tsi tamariska o Guibea na dikongu diandi va dikaka na basalitsi bandi botsu bamaba nandi.

⁷ Saul amatsingula basalitsi bandi abamaba nandi rie: Jenu baBenjamin, guluanu! Muana uJesse oduvega nungi tsimfuga tsirayisan? Je oduvaga, jenu botsu bivunda bibatosini na bibakama?

⁸ Amana mamadurombisa utungila fundu? Dibandu yi ne mutu mosi asamandubusila yiri muana ami na muana uJesse bamatsokasana tsongi? Dibandu yi ne mutu mosi va gari enu agelabi uvura va mosi nami? Dibandu yi mutu asamansingulila yiri muana ami amasibisa mutu eni utambila mirambu?

⁹ Doeg muisi Edom agumaba mu dibuli dibasalitsi baSaul amawaka rie: Yilumbu yimosi nyimalaba muana Jesse eruyi o Nob ombu Ahimelek muana uAhitoub.

¹⁰ Ahimelek amamuwivulila Fumu, amamuvega biguji na dijenga diGoliath, muPhilistin.

¹¹ Kaga amasindiga batu unengila Ahimelek muana uAhitoub agumaba muvagulitsi upagu na bisi ndagu andi botsu: bamaba bavagulitsi bapagu o Nob. Jogu botsu bamawagula kaga.

¹² Saul amavosa rie: Kabogu gumaruga muana uAhitoub? Jandi amawagula rie: Nyiina fumu!

¹³ Saul amamuwivula rie: Dibandu yi jenu na muana uJesse dumatungila fundu? Dibandu yi gumamuveyila biguji na dijenga? Gumamuwivulila Nsambi yiri odila mangolu utambila mirambu nana evayili namunyi?

¹⁴ Ahimelek amawivula kaga rie: Anyi va gari basalitsi bagu botsu orungula ubagusunu na David aguvu tindi usigama? Anyi avu boji buagu? Anyi eviolili botsu uduka maruma magu? Anyi eyitsu o ndagu agu?

¹⁵ Je yika namunyi nyimabanda umuwivulila Nsambi? Viaga! Nyisamaba na ditasa ugutungila fundu! Guyapega mbela nesi bisi ndagu ami; ngaajaba ne diambu dimosi.

¹⁶ Kaga amavosa rie: Ahimelek jenu na bisi ndagu agu botsu, dufu!

¹⁷ Mbana kaga amaruma bagora abamaba nandi rie: Wendanu yebokanu bavagulitsi bapagu baFumu mu mbari bavu kingu mosi na David; jogu bamajaba na buranga yiri urina erini na basamandubusa. Tumba bagora bakaga basamaronda uboka bavagulitsi bapagu baFumu.

¹⁸ Mbana kaga amaruma Doeg rie: Weʼ yeboka bavagulitsi bapagu. Kabogu Doeg muisi Edom amaboka bavagulitsi bapagu: magumidunana na baranu abamaba na musuga uduaranga yilinga yiyijungi yibuvagulitsi bupagu.

¹⁹ Saul amabokisa bisi musiengi Nob wandi agu bavagulitsi bapagu bamatsaninanga; diwendi rie: nesi babaala nesi bagetu nesi bangebi nesi baana bageyi nesi bangombi nesi baburu nesi bindombu nesi binsabi.

²⁰ Muana umosi uAhimelek, mutegula uAhitoub amarina; diina diandi Abiatar, amayesuema ombu David.

²¹ Amayetsingula David rie: Saul amabokisa bavagulitsi bapagu baFumu.

²² David amatsingula Abiatar rie: Muna yilumbu yieni nyinolaba Doeg muisi Edom nyimatasa rie: Agotamba nolubusa Saul. Kabogu dufu dubisi ndagu agu botsu duvu va julu muru ami.

²³ Tsana nami, guyalaba goma, oyirondi umboka erondi uguboka wandi; pa guji nami gugaa na diambu.