1 Samuel 20 - La Sainte Bible en Langue Yipunu

Jonatan urinisa erinisi David

¹ David amarina o Nayot o yiari yiRama. Amarasuna Jonatan na amawivula rie: Diambu yi nyimavaga? Disumu diami yi adi nyimavaga va gusu taji agu adimurumi umboka?

² Jonatan amamuwaka rie: Viaga tsiri nana! Gugofu. Taji ami agevayi ne diambu dimosi dineni nesi digeyi adi agensinguli; dibandu yi taji ami onsueyila diambu diedidi? Digorungula uba!

³ David amamuevosa noleva pesi rie: Taji agu ejabi yiri nyimadila maboti magu na evosi rie: Jonatan ayadijaba, diumutsirisa murima. Fumu jaʼ beni ejabi na ndeʼ beni guidijabi ngaa vala na dufu!

⁴ Jonatan amatsingula David rie: Nyijabi yiri nyuguwamusa.

⁵ David amamuwaka rie: Mugesa uba feta jiyisusungi na mbe nyutsana va mosi uji na kaga; ndundi, nyulesuema o musini te na bilumbu birieru.

⁶ Pa taji agu olaba yiri ngaa vana, gukamutsingula rie: David amakwivula musuga uwenda o musiengi andi o Bethleem; mukuta ogu uotsu bovagula pagu jiyilima.

⁷ Pa ovosa rie: Diwelimina! Ngolaba goma. Tumba pa onyoga kabu, jaba yiri nyuboku.

⁸ Kabogu ndasi durondu duagu; guyalibana tsongi aji gumansoka va gusu Fumu. Tumba pa nyimavaga dibi, mboki ndeʼ beni; dibandu yi nyugutsoyisila ulabana va gusu taji agu?

⁹ Jonatan amawaka rie: Tsiemusa ditasa dieni! Pa nyimagulu yiri dingensa taji ami amatabula diambu uguboka, ngogulubusa?

¹⁰ David amawivula Jonatan rie: Anyi ondubusa pa taji agu oguwaka na bukanyi?

¹¹ Jonatan amanengila David rie: Tʼwendi o musiru. Jogu botsu babeji bamayenawenda o musiru.

¹² Jonatan amatsingula David rie: Fumu Nsambi Israel avu mbeji! Mugesa vo muna mosi nyumoga na taji ami; pa nyilabi yiri agaa na diambu nagu ngogutindila yilumbi ugulubusa?

¹³ Pa taji ami erondi uguvaga dibi, Fumu jaʼ beni opayila dedi mosi, ne uviolila pa ngogulubusa yiri guyenawenda na murima usunda. Fumu abi nagu nana amalebila na taji ami!

¹⁴ O gusu pa nyikivu monyu gukarangimina bumbatsi buetu, yo?

¹⁵ Pa nyufu guyalibana mukuta ami, nesi ava Fumu otsiemusila bavinitsi bagu botsu va butamba.

¹⁶ Anana Jonatan amatsokila David na mukuta andi tsongi; amavosa rie: Fumu agabusili bavinitsi baDavid pila!

¹⁷ Jonatan amawivula David uwarisa pangini nandi mu diambu didurondu duogu; amamurondanga nana amakerondilanga.

¹⁸ Jonatan amamutsingula rie: Mugesa feta jiyisusungi; bolaba yiri gugatsi mu mbari mbura agu jigoba na mutu.

¹⁹ Yilumbu ayimurieru gukawenda o yiari ayina yimbura aji gumasuemina yilumbu ayi gumalabila diambu, gukasikama va mugula dimanyi diEzel.

²⁰ Nyunonga mbansa yirieru o nsima mosi jidimanyi nderi yima nyinongi.

²¹ Mbana nyusindiga mufudu rie: Wenda yebola mbansa. Pa nyumutsingula rie: Laba mbansa tsivu o yiari yigunu yiagu, tsiboli! Mbana tsie ruyi, mu mbari guji sui, gugaa na diambu, Fumu jaʼ beni ejabi.

²² Tumba pa nyutsingula mufudu eni rie: Laba mbansa tsivu o yiari ayina! Yenawendanga mu mbari Fumu egugusuli.

²³ Fumu aji mbeji tuyalibana tsongi aji tumatsokasana.

²⁴ David amasuema o musifu. Jimaba feta jiyisusungi na kaga amatsana uji feta.

²⁵ Kaga amatsana va yitsiga nana na kala va mugula uyibaga, Jonatan amarelama na Abner amatsana va mugula uSaul; tumba yitsiga yiDavid yisamaba na mutu.

²⁶ Yilumbu yieni Saul asaniavosa diambu, amatasa rie: Tanguji David ana diambu! Diurungula uba avu muinsi vo tanguji amabemba yima yimuinsi.

²⁷ Avakedi jiyilumbu yimubeji yifeta jiyisusungi, yitsiga yiDavid yisamamueba mutu. Saul amawivula muana andi Jonatan rie: Dibandu yi David agaaruyilanga masiga o uji na namunyi wandi?

²⁸ Jonatan amawaka Saul rie: David amakwivula musuga uwenda o Bethleem.

²⁹ Amavosa nami rie: Kokolu tsiagu, nsingisi uwenda o musiengi ami mu mbari mukuta etu uyevagula pagu, muana nguji ami amatuma uruga. Pa nyiji mbatsi agu nsingisi uweʼ uyelaba batu bami. La dibandu David agaaruyilanga uji feta agu.

³⁰ Mbana Saul amanyoyila Jonatan tindi kabu na amamutsingula rie: Guji muana ubi na mumbini; ngejabi yiri muana Jesse avu mbatsi agu? Gugelabi yiri yivu yisonyi ombu gagu nombu nguji agu?

³¹ Pa muana Jesse asakaboku, bufumu buagu bugaa na tsongu. Sindiga mutu uyemuromba nomubeyila; aboku!

³² Jonatan amawivula taji andi Saul rie: Dibandu yi obokulu? Diambu yi amavaga?

³³ Saul amatinda Jonatan dikongu diandi na ditasa umuboka. Mbana Jonatan amatsiyisa yiri taji andi ana ditasa dimosi, yika uboka David.

³⁴ Amagusuga va tavula na kabu jineni na amabusa uji biguji mu yilumbu yimubeji yifeta jiyisusungi. Amaba na tindi munyongu mu diambu diDavid agu taji andi amaronda uboka.

³⁵ Ava kedi Jonatan amayenawenda o musiru va mbura aji bamavangana na David, amaba na mua muana dibaala agumawenda nandi.

³⁶ Amaruma muana dibaala rie: Wenda mbangu, yebola mbansa atsi nyutinda. Muana dibaala amawenda mbangu mbana Jonatan amatinda dubansa adumamuvioga va nsila.

³⁷ Ava amatolila va mbura ajimaba dubansa adu Jonatan amatinda, Jonatan amagamuga rie: Dubansa dugaa o gusu agu?

³⁸ Lensa, lensa guyasikama! Muana dibaala uJonatan amabola mbansa mbana amagabuga ombu fumu andi.

³⁹ Muana eni udibaala asamajaba diambu; yika Jonatan na David abamadijabanga.

⁴⁰ Jonatan amavega pita na mbansa ombu muana eni udibaala na amamuruma rie: Yebivetsiga o musiengi.

⁴¹ Muana dibaala anowenda David amaretsama o yiari yitandu mbana amagudama va tsi, amadivaga kumbu yirieru. Mbatsi na mbatsi bamabumbasana na bamalila vamosi; David la viri.

⁴² Jonatan amaganina David rie: Wenda na buranga. Tuyalibana tsongi aji tumatsokasana va gusu Fumu. Fumu atusingisi uba basigama jetu nagu te na mutubu nesi bategula betu!

⁴³ David amarelama na amayenawenda, Jonatan amayenagabuga omusiengi.