1 Samuel 18 - La Sainte Bible en Langue Yipunu

¹ David amamana uvosa na Saul. Ubanda va temu eni Jonatan amafubana murima na David na Jonatan amaronda David nana amakerondilanga.

² Muna yilumbu yieni Saul amasikiga David na asamamusingisa ugabuga o ndagu taji andi.

³ Jonatan amatsoka David tsongi mu mbari amamuronda nana amakerondila.

⁴ Amavula yijungi yiandi uyivega David; amamuvega biduaru biandi bidivita: nesi dijenga nesi pita na beleeti.

⁵ David amawendanga na amalinganga mbura tsiotsu atsi Saul amamusindiganga; Saul amamuvaga yivunda yibagora na amalasanga batu botsu ubueji nesi basalitsi baSaul.

Saul uronda erondi uboka David

⁶ Ava bamaruyila va temu aji David amaboka Goliath, bagetu bamapalila o misiengi miotsu miIsrael uyenabengusana Saul; bamawimbilanga noyenayinanga na bamayenasiganga bandungu baminongu na minongu nogamuganga na nsangu.

⁷ Bagetu bamayenawimbilanga rie: Saul amaboka tosini andi, David amaboka yigumi yiandi yitosini.

⁸ Saul amanyoga tindi kabu; duimbu dusamamulasa ubueji. Amavosa rie: Beveyi David yigumi yitosini, bepeyi tosini mosiʼ Yika bufumu buigambu nandi.

⁹ Ubanda muna yilumbu yieni Saul amavina David.

¹⁰ Ava kedi yinyunyi yibi ayimasindugu na Nsambi yimagaanga Saul te na amayenagamuganga o gari ndagu. David amasiganga sambi nana bilumbu bisusu, Saul amaba na dikongu diandi va dikaka.

¹¹ Saul amanangula dikongu diandi na amatasa rie: Nyumunonga nomubatiga na yibaga. Tumba David amakumba yidimbu kumbu beji.

¹² Saul amadumanga David mu mbari Pumu amabanganga na David tumba amakakana nandi.

¹³ Amamukakasana nandi na amamuvaga yivunda yibatosini babagora. David amayenalinganga na bagora bandi temu tsiotsu.

¹⁴ Bisalu biandi biotsu bimabuejingi mu mbari Fumu amabanganga nandi.

¹⁵ Saul anolaba yiri biotsu biDavid bimabuejingi amamulaba goma;

¹⁶ tumba baJuda na baIsrael basusu bamarondanga David mu mbari amalinganga nogu.

Saul uwetsa ewetsi muana andi Mikal na David

¹⁷ Saul amatsingula David rie: Nyuguwetsa na muana ami umugetu agutega Merab; dimosi buandi nsalili na mangolu nowarisa mavita maFumu. Kabogu Saul amatasanga rie: Nyiyaba na mbela jidufu duandi, uviolila ubueji pa dufu duandi dugengila baPhilistin.

¹⁸ David amawivula Saul rie: Je menu nyivu nyiwelimina? Je batu bami bavu bawelimina? Je mukuta utaji ami o Israel uvu uwelimina yiri nyuba boji bukaga?

¹⁹ Tumba temu jimatola aji Merab muana mugetu uSaul mbe amawakusulu o diwela kabogu amawakusu ombu Adriel muisiAbel-Mehola.

²⁰ Mikal muana mugetu ususu uSaul amaronda David. Bamaditsingula Saul, anodigulu amalaba diwelimina.

²¹ Amatasanga rie: Nyuwetsa Mikal nandi yiri oba nderi murambu ombu gandi, adina diumurombisa ugaangu na baPhilistin. (Temu ajimubeji Saul amatsingula David rie: Namunyi guba boji buami.)

²² Saul amavega diruma diedidi ombu baneni bandi rie: Yetsingulanga David o musuega rie: Guilabi yiri kaga egurondi na baneni bandi botsu begurondi wandi: kabogu singa uba boji bukaga.

²³ Baneni baSaul bamayetsingula David mambu meni motsu. David amabawivula rie: Uba boji bukaga uvu mua diambu digeyi? Menu nyivu yijaga na ngaa na diduma.

²⁴ Baneni bamayetsingula kaga motsu ama David amavosa.

²⁵ Saul amavosa rie: Dukayetsingula David rie: Kaga agevondi madila; erondi kama misosu mibaPhilistin ugabusila bavinitsi bandi pila. Saul amatasa yiri David oboku na baPhilistin.

²⁶ Baneni baSaul bamayetsingula David mambu meni. David amasinga uba boji bukaga yika pa amadugusu yisavi yiandi. Ne temu ajimakunsu jikatola,

²⁷ David amawenda na batu bandi na amaboka kama beji tsibabaala babaPhilistin; amabega misosu miogu na amamitala va gusu Saul yiri orungula uba boji buandi. Mbana Saul amamuwetsa na muana andi Mikal.

²⁸ Saul amalaba na amajaba wandi yiri Fumu amaba na David; muana andi Mikal amarondanga David.

²⁹ Saul amasinsa uduma David na amakaluga muvinitsi andi te na mutubu.

³⁰ Ava basefu babaPhilistin bamayenatoyilanga na baIsrael, David amalunganga uviolila baneni basusu baSaul; diina diandi dimadumusu tindi udumusu.