Biblia Todo Logo
Bìoball air-loidhne

- Sanasan -

1 Samuel 17 - La Sainte Bible en Langue Yipunu


David na Goliath

1 BaPhilistin bamabengusana mabadi mogu utoga divita na bamagukama va Soko aguvu o Juda; bamavaga milaku va gari Soko na Azeca va Efes-Dammim.

2 Saul na mabadi mabaIsrael bamagukama wandi; bamavaga milaku o yibususu yiTerabeta, bamakunsama utoga na baPhilistin.

3 BaPhilistin bamaba o julu mukongu o yiari yimosi na baIsrael bamaba o julu mukongu o yiari yisusu: yibususu yimabakakasana.

4 Gora jimosi amapalila o milaku mibaPhilistin na amakelasa va gari mabadi motsu mabeji. Diina diandi Goliath agumaba muisi Gat; amaba na yirela yimetera yirieru na mua yibuku.

5 Amaduaranga yisiemba yikunga na amaduaranga yikutu yibudilu yimagagala; utsira uyionyi umaba magumasiamunu makilu.

6 Amaduaranga basamberi bakunga na ngubu jikunga va gari masambaka.

7 Pandi jidikongu diandi jimaba nana munongu umubuangitsi na utsira udikongu diandi umaba yisambuali yikilu na yibuku. Jandi agumabeganga ngubu andi amarelanga va gusu andi.

8 Goliath amarelama na amawivula baIsrael rie: Dibandu yi duikunsimini utoga divita? Menu ngaa muPhilistin? Jenu dugaa baviga baSaul? Solanu mutu aguyitoga nami!

9 Pa orungula umbetsa nomboka, tuba baviga benu; tumba pa nyumubelisa nomuboka, duba baviga betu.

10 MuPhilistin amabasovisa rie: Jenu baIsrael duna mutu agurungula utoga nami namunyi?

11 Saul na bagora bandi banogulu posulu tsimuPhilistin eni bamaregama na bamagaangu na goma jineni.

12 Kabogu David amaba muana umuisi Efrata o Bethleem o Juda, diina diandi Jesse agumaba na yinana yibaana bababaala, nesi va temu Saul, dibaala dieni dimanuna kala.

13 Baana barieru batega baJesse bamaduka Saul o divita; abamawenda nandi o utoga divita ababa: Eliab na Abinadab na Chamma.

14 David amaba tindi ngebi. Bivunda birieru banoduka Saul,

15 David amawendanga yigabuyi ombu Saul tumba amatsananga o Bethleem uyekelisa bindombu bitaji andi.

16 Magumana mabilumbu Goliath amalabananga: kedi na tsisiga va gusu dibadi dibaIsrael.

17 Yilumbu yimosi Jesse amaruma muana andi David rie: Bongila baana banguji bagu yietsu yieyiyi yiputu tsigaangu na yigumi yimapa, lensa noyevega baana banguji bagu o milaku;

18 bega na yigumi yieyiyi yifomasa ombu yivunda yiogu yibatosini. Yelabati yeri baana banguji bagu baji buranga. Gukayinsingula misamu miogu.

19 Jogu na Saul na dibadi dibaIsrael botsu bavu o yibususu yimiri miterabeta utoga betoyi na baPhilistin.

20 David amarelama kedi jineni. Amasila bindombu na mukelisi ususu, amanangula mufuna na amasogama nana Jesse amamurumina. Ava amatolila o milaku amarasuna bagora ukunsama bekunsimi uyetoga divita na ugamuga begamuyi migamu midivita.

21 BaIsrael na baPhilistin bamakunsama utoga, dibadi na dibadi disusu.

22 David amawakisa abimaba nandi ombu mutu ubikelisa na amawenda mbangu ombu bagora abamaba batandama. Yika etoli, amawivuia baana banguandi rie: Duji buranga?

23 Ava amavosilanga nogu, Goliath muisi Gat amakueka va gari mabadi motsu mabeji; amavosa mambu ama amalevosanga; David amamagulu.

24 BaIsrael botsu ava bamalabila dibaala dieni bamagabuga mansinsima na goma.

25 Mutu mutu amawivulanga rie: Duilabi dibaala dieni adiruyi? Eruyi umueyisovisa baIsrael! Pa mutu omuboka, kaga omuvega tindi busina na omuwetsa na muana andi umugetu na ndagu taji andi jigomuefuta lepu.

26 David amawivula bagora abamaba bebeli nandi rie: Yi bovayila aguboka muPhilistin eni agugusula yisonyi ombu baIsrael? Yi muPhilistin eni avu, agusarebu eni? Dibandu yi esiengili dibadi diNsambi aguvu monyu?

27 Batu bamavosulila munongu mosi, bamamutsingula rie: Anana bovayila jandi agumuboka.

28 Muana nguji andi Eliab agumamugulu ava evosili na batu beni amanyoyila David tindi kabu. Amawivula rie: Dibandu yi gutsiruyila? Na nyi gutsisila mua bindombu bieni o kumu? Nyijabi dunangu duagu na bikumbu biagu. Gutsiruga uyilaba nana betoyili.

29 David amawaka rie: Diambu yi nsivaga? Yika uwivula nsiwivula.

30 David amamuliyila nsima na amawivula gora jisusu bivu abi amalewivula; amamuwaka nana temu ajitega.

31 Banogulu mambu amamavosu na David, bamayematsingula Saul agumamunengila.

32 David amatsingula Saul rie: Ne mutu mosi ayadeda mu diambu dimuPhilistin eni! Meʼ beni nyuweʼ uyetoga nandi.

33 Saul amatsingula David rie: Gugorungula uyetoga na muPhilistin eni mu mbari guki ngebi na jandi avu muisi mavita ubanda na bufudu buandi.

34 David amatsingula Saul rie: Ava nyimabungulila bindombu bitaji ami pa yimbungu vo ursa yimaruga uyigaanga yimosi mu mugamba

35 nyimayibingisa noyidimba, nyimayipatula yindombu. Pa yimaronda utoga nami nyimayibatiga va mingunga na nyimayidimba te na yimafu.

36 Anana nyimabetsila yimbungu na ursa, nyuvayila muPhilistin agusarebu munongu mosi mu mbari amasienga dibadi diNsambi aguvu monyu.

37 David amamuevosa rie: Fumu agumakwaka kalala mu nyala tsiyimbungu na mu makindi maursa okwaka kalala mu miogu mimuPhilistin wandi. Mbana Saul amatsingula David rie: Ka wendanga, Fumu abi nagu!

38 Saul amaruma mutu uduisa David bikutu biandi, amamuduisa yisiemba yikunga na yikutu yibudilu.

39 Va julu vana amaduara dijenga diSaul na amaweliga uwenda mu mbari mbe asakaweliga na kala. Tumba amatsingula Saul rie: Ngorungula uwenda na bitogulu biebibi, nyisakaguku na bionyi. Amabisila.

40 Amabonga nguangu andi na amasola mamanyi maranu maboti mu mujamba; amamapodula mu kobi andi. Mbana amabonga yilangandaji yiandi; amawenda uyetoga na Goliath.

41 Goliath amakuekanga pesu pesu ombu David na dibaala adimayenabeganga ngubu andi amawendanga va gusu andi.

42 Anolabilila David amamulensa, amamulaba yika muana agumaba tindi muboti na yinsi yiboti.

43 Goliath amagamuyila David rie: Mondi nyivu yiri guiruyi na nguangu ombu gami? MuPhilistin amamuloga na bansambi bandi,

44 na amabuela rie: Ruganga, nyuguboka; batsoli na bibulu bimusiru boji musonyi agu.

45 David amatsingula muPhilistin rie: Guiruyi uyitoga nami na dijenga na dikongu na dibaga; tumba menu nyutoga nagu na diina diFumu mabadi na diNsambi mabadi maIsrael agu ndeʼ gumasienga.

46 Fumu oguwakisa namunyi ombu gami nyugubetsa na nyugutabula muru; namunyi nyuwakisa mfumbi tsibaPhilistin ombu batsoli na bibulu bimusiru. Na bisi butamba buotsu bojaba yiri baIsrael bavu na tindi Nsambi.

47 Dibuli diotsu dibaIsrael bojaba yiri Fumu egobuli tsiri na dijenga vo na dikongu. Avu Fumu divita diedidi. Jandi oduwakisa ombu getu.

48 Yika Goliath ebandi uvioga va gusu David, David amavioga mbangu o mbura aji bamatoyilanga uyebengusana muPhilistin.

49 Amakotisa dikaka mu kobi andi, amabonga dimanyi dimosi na amaditinda na yilangandaji yiandi. Dimanyi dimanamu muPhilistin va mbami andi na dimakota tindi ukota; muPhilistin amaberuga magudama.

50 Anana David amavayila; na yilangandaji na dimanyi dimosi amabelisa muPhilistin, asamasalisa nesi dijenga umuboka.

51 Amawenda mbangu, amayesikama va mbura aji Goliath amaba, amasomuna dijenga mu yisupu yiGoliath na amamutabula muru. BaPhilistin banolaba yiri ngogaga ogu amafu bamarina.

52 Bagora baIsrael na baJuda bamagamuga migamu midivita na bamabingisa baPhilistin te no yibususu nesi o dikotulu dimusiengi uEcron. BaPhilistin bamatsunguga tindi utsunguga, bamayenaberuganga muna nsila jiChaaraim te no Gat nesi te noEcron.

53 BaIsrael bamaruyila o ubingisa baPhilistin na bamakinda milaku miogu.

54 David amabonga muru uGoliath; amayenagubega o Jerusalem; amakotisa bitogulu biandi o ndagu andi jitsanda.


Jonatan utsoka etsoki David tsongi

55 Ava Saul amalabila David ewendi uyebengusana Goliath amawivula Abner yivunda yibagora rie: Mua mufudu eni muana nyi? Abner amawaka rie: Dingensa, ngemujabi.

56 Kaga amaruma rie: Jaba muana nyi avu.

57 David anoboka Goliath amagabuga o milaku; amamubega ombu Saul. (David amaba na muru uPhilistin va dikaka.)

58 Saul amamuwivula rie: Mufudu, ndeʼ muana nyi? David amawaka rie: Muana musalitsi agu Jesse muisi Bethleem.

La sainte Bible en langue Yipunu © Alliance Biblique du Cameroun, 1992.

Bible Society of Cameroon
Lean sinn:



Sanasan