1 Samuel 15 - La Sainte Bible en Langue Yipunu

Nsambi ubusa ebusi Saul

¹ Samuel amatsingula Saul rie: Fumu amansindiga ugubiatsa kaga jibaIsrael kabogu gulu adi Fumu evosi.

² Fumu mabadi maIsrael jandi rie: Ngelibini adi Amalec amavayila baIsrael ava amabadibiyila nsila upala o Egypte.

³ Tsie wenda yekilisa baAmadec nopansa biogu biotsu; guyabalasa yingeba. Bokisa nesi dibaala nesi mugetu nesi ngebi nesi muana kali nesi bangombi nesi bindombu nesi basamo na baburu.

⁴ Saul amagukiga bagora o Telem na amabatala; vamaba kama beji tsitosini tsibagora na yigumi yitosini tsibaJuda.

⁵ Saul amababega te no musiengi uAmalec na amaramba murambu vana yibususu.

⁶ Amaruma baQuenie rie: Gusuganu, kakananu na baAmalec yiri ngodubunga va mosi nogu mu mbari dumalasa baIsrael yisagumunu ava bamapalila o Egypte.

⁷ Quenie bamakakana na baAmalec. Saul amabelisa baAmalec ubandila o Havila te no Chour aguvu na nsungisini na Egypte.

⁸ Bamagaanga bu-Agag kaga jiAmalec na bamaboka batu botsu basusu.

⁹ Tumba Saul na bagora bandi bamakelisa Agag na bindombu abiboti na bangombi ababoti na baana babindombu ababoti na baana babindombu bavonga na biotsu abimaba biboti; basamaronda ubibunga, bamabunga yika abibiva na abigaa na tsongu.

¹⁰ Fumu amatsingula Samuel rie:

¹¹ Mbe nyisamasola Saul kaga; amandiyila nsima na agekelisi mambu mami. Samuel amanyoga na amatatila Fumu mukolu uotsu.

¹² Amarelama kedi jineni uyebengnsana Saul. Na bamayemutsingula rie: Saul amawenda o Carmel uyerunga yirangumunu; mbana amayenawenda o Guilgal.

¹³ Samuel amarasuna Saul agumamutsingula rie: Fumu agugabili miula! Nyimadugusu diruma diFumu.

¹⁴ Samuel amamuwivula rie: Kabogu bindombu na bangombi abi nyigulu ugumba bigumbi agunyi biruyisini?

¹⁵ Saul amawaka rie: Bagora bamabeyila bindombu abiboti na bangombi ababoti bibaAmalec yiri bobivagulila Fumu Nsambi agu pagu na bisusu tumaboka.

¹⁶ Samuel amatsingula Saul rie: Vana dedi! Nyugutubulila adi Fumu atsinsingula na mukolu egugu. Saul amamuwaka rie: Ka vosa!

¹⁷ Samuel amamuwivula rie: Tsie gumaleba ngebi; gugelabi yiri namunyi guka yivunda yibaIsrael? Tsia Fumu amagubiatsa kagajiIsrael?

¹⁸ Fumu amaguruma rie: Wenda yebunga baAmalec abavu bango masumu; gukatoga nogu te na guboka botsu.

¹⁹ Dibandu yi gusamagululu diufi diFumu? Dibandu yi gumabongila abimakindu novaga adigaa diwelimina va gusu Fumu?

²⁰ Saul amawaka Samuel rie: Nyimadugusu diruma diFumu na buranga na nyimaduka adi Fumu amandonsa. Nyimabega bu-Agag kaga jiAmalec na nyimaboka baAmalec.

²¹ Pa bagora bami bamabonga bindombu biboti na bangombi baboti mu abimakindu na mugeli, bamadivaga uvagulila Fumu Nsambi agu pagu o Guilgal.

²² Samuel amawivula rie: Je Fumu elabi ubueji na pagu tsiunyensa na pagu vo ava mutu ededili diufi diandi? Nesi! Jandi erondi dululu uviolila pagu tsiunyensa na erondi dukelusu dumambu mandi uviolila matsi mabalumi babindombu.

²³ Bumbini buvu dedi na disumu dimavanda; murima ugala uvu dedi na disumu di-ugoma bakosi. Mu mbari gumabusa udedila mambu maFumu jaʼ wandi amagubusa na bukaga buagu.

²⁴ Mbana Saul amagamuga rie: Nyina mbela; nyimalevula diruma diFumu na nyisamadedila malongi magu; nyimaduma bagora na nyimagululu diufi diogu.

²⁵ Kokolu tsiagu, tanda disumu diami; tʼwendi nyirondi uyegudama va gusu Fumu!

²⁶ Samuel amavosa rie: Ngowenda nagu; gumabusa mambu maFumu na Fumu amagubusa wandi; gugomueba kaga jiIsrael.

²⁷ Samuel amabanda ugabuga, Saul amamugaanga mu mulemba uyijungi yiandi te na yimapasiga.

²⁸ Samuel amamutsingula rie: Namunyi Fumu egupatuli bufurnu buIsrael abu eveyi ombu mutu ususu aguvu uwelimina uviolila ndeju.

²⁹ Jandi Aguvu Mangolu MaIsrael agefuri na agevinsi kingu nana mutu evinsili kingu.

³⁰ Saul amamuevosa rie: Nyina mbela! Kokolu tsiagu guyandasa yisonyi va gusu bivunda na va gusu baIsrael; tʼwendi nyuyegudama va gusu Fumu Nsambi agu.

³¹ Samuel amawenda na Saul na Saul amagudama va gusu Fumu.

³² Mbana Samuel amaruma rie: Mbeyilianu Agag kaga jibaAmalec. Agag amawenda na nsangu; amatasa rie: Ngomueboku.

³³ Samuel amavosa rie: Dedi mosi nana gumalitsila bagetu ava gumabokila baana bogu, nguji agu wandi olila namunyi mu mbari muana andi ufu efu.

³⁴ Mbana Samuel amaboka Agag va gusu Ndagu Nsambi o Guilgal. Samuel amawenda o Rama; Saul amayenagabuga o ndagu andi o Guibea.

³⁵ Te na Samuel amafu asamamuelabana na Saul. Samuel amamunyonganga; Fumu jaʼ beni amalaba uvura mu mbari amasola Saul uba kaga jiIsrael.