1 Samuel 12 - La Sainte Bible en Langue Yipunu

Samuel uganina eganini baIsrael

¹ Mbana Samuel amatsingula baIsrael rie: Nyimadedila diufi dienu na nyimadubiatsila kaga.

² Ubanda namunyi duvu na kaga aji dudukanga, menu nyimanuna na nyimasobila na baana bami bababaala baka nenu. Nyimaduwendisanga ubanda va bufudu buami te na yilumbu yieyiyi.

³ Meʼ janduʼgu; nsingisilianu bumbeji va gusu Fumu na va gusu kaga aji amasola. Ombu nyi nyimadayila ngombi? Ombu nyi nyimadayila buru? Anyi amafuta yiri ngokipa mabi mandi? Ditubulilianu na nyufuta.

⁴ BaIsrael bamawaka rie: Gusamatukambisa na gusamatulasa dikasi na gusamapatula mutu yima.

⁵ Samuel amabuela rie: Fumu na kaga aji amasola bavu bambeji namunyi yiri jenu dusamatasuna na diambu. Jogu bamawaka rie: Anana, bavu bambeji.

⁶ Mbana Samuel amabuela rie: Fumu avu mbeji, jandi agumasola Moise na Aaron nopalisa bataji benu o Egypte.

⁷ Retsamanu! Nyirondi udutabulila bunsonsi va gusu Fumu mu diambu dimaboti motsu ama Eumu amadusingisa jenu na bataji benu.

⁸ Taji enu Jacob anotola o Egypte bataji benu bamatatila Fumu la dibandu Fumu amasindiyila Moise na Aaron abamayepalisa bataji benu o Egypte na bamayibatsanisa va mbura ejiji.

⁹ Tumba bamalibana Fumu Nsambi ogu agumabawakisa ombu Sisra, yivunda yibagora baHassor, nʼombu baPhilistin nʼombu kaga jiMoab abamabatoyisa nobabetsa.

¹⁰ Bamamuetatila Fumu rie: Jetu tumavaga dibi mu mbari tumaliyila Fumu nsima nosalila baBaal na baAstarte. Kokolu tuwaki kalala ombu bavinitsi betu na tugusalilanga.

¹¹ Fumu amasindiga Gedeon na Bedan na Jefte ne menu Samuel; amaduwaka kalala ombu bavinitsi benu abamadukanda na dumatsananga sui.

¹² Mbana ava dumalabila yiri Nahach kaga jibaAmmon amadutumuna, dumavosa nami rie: Tuirondi kaga aguturuma na diuleba Fumu Nsambi enu amaba kaga enu.

¹³ Kabogu kaga aji dumasola ajiji, aji dumaponda. Fumu amadubiatsila kaga enu.

¹⁴ Ne nana pa duidumi Fumu na pa duimusalili na pa duidedili diufi diandi na pa dugaa mimbini mu diambu dimaruma maFumu pa dumanamana na Fumu Nsambi enu jenu botsu na kaga enu duba sui;

¹⁵ tumba pa dugededili Fumu na pa duvu mimbini mu diambu dimaruma mandi; Fumu odulasanga maguga dedi mosi nana amalasilanga bataji benu.

¹⁶ Lekelanu vava nolaba yimaga ayi Fumu ovaga va misu menu.

¹⁷ Tugaa va temu dutsonsugu duble? Nyusambila Fumu, jandi osindiga yidumi na mfula yiri dujaba duna mbela jineni va gusu Fumu mu mbari dumaronda kaga.

¹⁸ Samuel amasambila Fumu, muna yilumbu yieni Fumu amasindiga bidumi na mfula. Batu botsu bamagaangu na goma jineni jiFumu na jiSamuel.

¹⁹ Batu botsu bamalenda Samuel rie: Sambila Fumu agu mu diambu dietu mu mbari tukefu; va julu mabi metu motsu tumaroyisa mbela ava tumavondila kaga.

²⁰ Samuel amatsingula batu rie: Sunsanu mirima! Diuleba dumavaga dibi dieni duyaliyila Fumu nsima, musalilianu na murima umosi.

²¹ Duyamuliyila nsima mbe dufubana na bakosi abagaa na tsongu abagejabi nesi uwamusa nesi uwaka mutu kalala mu mbari bakosi bavu.

²² Mu diambu dididuma didiina diandi, Fumu agoliyila batu bandi nsima, Fumu jaʼ beni amaronda uduvaga batu bandi.

²³ Mbe ka menu ngaa na ditasa udunda usambila mu diambu dienu, pa nyudivaga dibi nyivayi! Nyudulonsa nsila jiboti na jisungama.

²⁴ Tumba jenu dumanu Fumu na musalilianu na usigama na murima umosi; labatianu munongu mangolu ama esalisi va gari enu.

²⁵ Tumba pa duivayi mabi, dubungana, jenu botsu na kaga enu wandi.