1 Samuel 1 - La Sainte Bible en Langue Yipunu

Anne o Ndagu Nsambi jiSilo

¹ Vamaba dibaala adimaba muisi Ramataim-Sofim, diina diandi Elcana agumaba muana dibaala uYeroam muana dibaala uElihou muana dibaala uTohou muana dibaala uSouf muisi Efraim.

² Jandi amawela bagatsi babeji: Anne na Peninna; Peninna amabura baana tumba Anne asamabura.

³ Yilima na yilima Elcana amarambuyilanga o Rama uwenda o Ndagu Nsambi o Silo uyeyitsa Fumu Mabadi noyemuvagulila pagu. Baana bababaala baHeli, Hofni na Pinhas bamaba bavagulitsi bapagu baFumu vana.

⁴ Yilumbu ayi Elcana amavagulila pagu andi, amavega mugatsi andi Peninna na baana bandi bababaala na babagetu makabu mogu.

⁵ Tumba amavega Anne dikabu dineni; amarondanga Anne diuleba Fumu amamuvaga yinguma.

⁶ Pala andi amamukibisanga na mambu amamamurombisanga unyonga mu mbari Fumu amamuvayila yinguma.

⁷ Anana dimabilanga bilima biotsu. Temu na temu ava Anne amawendilanga o Ndagu Fumu Peninna amamukibisanga munongu mosi. Kabogu amalilanga na asamajanganga,

⁸ Mulumi andi Elcana amamuwivulaanga rie: Anne dibandu yi guililili na dibandu yi gugeji? Dibandu yi guvu na murima utsira? Je durondu duami ombu gagu dugevioyi yigumi yibaana bababaala?

⁹ Banomana uji nonu Anne amarelama uweʼ o Ndagu Nsambi. Heli, muvagulitsi upagu amaba atsana va dikotulu diNdagu Nsambi o Silo.

¹⁰ Na munyongu uneni Anne amasambila Fumu na amalila tindi ulila. Amavangana pangini ava amasambilila rie:

¹¹ Fumu Mabadi! Kokolu tsiagu, legengilati maguga mami! Guyandibana, ndasi yingeba! Peyi muana umosi udibaala, mbana nyumuwakisa ombu gagu mutubu na agofugu via.

¹² Mu mbari amatsinga usambila va gusu Fumu, Heli amamugengilanga.

¹³ Anne amasambilanga o tsi murima na amabodiganga bilila bimunu tumba diufi diandi disamagulunungu. Heli amatasa yiri amaba na dilangi,

¹⁴ na amamuwivula rie: Temu yi gumanina ulanga? Tsie dundi malangi!

¹⁵ Anne amamugabusila rie: Nesi, fumu ami, nyilabi tindi munyongu, nganu malamu tumba murima ami nyidibulili Fumu.

¹⁶ Guyakengila nderi nyivu mugetu ukulini; diguga na munyongu bimapiolila.

¹⁷ Heli amamuevosa rie: Wenda na buranga, Nsambi Mabadi amagulu dusambu duagu!

¹⁸ Anne amawaka rie: Kokolu tsiagu guyandibana! Amayenawenda. Mbana amaji na asamamueba na murima utsira.

¹⁹ Ava kedi baElcana banomana uyitsa Fumu bamayenagabuga o dimbu diogu o Rama. Elcana amafubana yitsiga na mugatsi andi Anne na Fumu amawagula dusambu duAnne.

Duburu duSamuel na nana amabanguyila

²⁰ Anne amadila dimi na amabura muana dibaala agu amaluga Samuel, amavosa rie: Nyimamuvonda Fumu.

²¹ Elcana amamuewenda na bisi ndagu andi uyevagulila Fumu pagu jiyilima na yilima noyedugusu pangini aji amavangana.

²² Tumba Anne asamawenda, amatsingula mulumi andi rie: Ava muana obusila mabenyi mbana nyumubega uyemuwakisa ombu Fumu na otsananga vana mutubu.

²³ Elcana amawaka rie: Vaga adi guilabi diwelimina! Mukelisi te na obusa mabenyi. Fumu awarisi mambu mandi! Kabogu Anne amasiala unuisa muana andi.

²⁴ Anomubusisa mabenyi, bamamubega nogu va mosi na mulumi ngombi agukavu bilima birieru na saku jimosi jifufu na tsuva mosi jimalamu. Amamubega o Ndagu Fumu o Silo: ava muana mbe akivu ditambara.

²⁵ Bamavagulila Fumu mulumi ngombi pagu jiunyensa mbana bamayevetsiga muana ombu Heli.

²⁶ Anne amavosa na Heli rie: Tanguji gugetangimini tumba nyivu mugetu agumalesambila Fumu va misu magu.

²⁷ Nyimasambilila mu diambu dimuana egugu, Fumu amagulu dusambu duami.

²⁸ Kabogu nyirondi umuwakisa ombu Fumu; abi uFumu te na dufu duandi. Avana baElcana bamamueyitsa Fumu.