1 Pierre 5 - La Sainte Bible en Langue Yipunu

Bungulanu batu abamaduvegu na Nsambi

¹ Nyilonsi bivunda abivu nenu mu mbari menu wami nyiji yivunda. Nyiji mbeji mu diambu dimaguga maChrist na menu wami nyivivi bundumba abulabana; kabogu guluanu rie:

² Bungulanu batu aba dumavegu na Nsambi tsiri mu mbari dumabamugu tumba mu mbari dumaronda. Duyasala mu diambu dimbongu tumba mu mbari dumakevega na murima umosi.

³ Duyatsoyisa jogu abavu o tsi durumu duenu tumba balasianu adivu diwelimina na Nsambi.

⁴ Ava yivunda yiMukelisi bindombu oruyila dudila kaba tsibundumba atsigekuduyi.

⁵ Munongu mosi jenu bafudu kesunsanu o tsi durumu dubivunda. Jenu botsu lasasananu buvolambombu mu mbari Bisonu bisonugu rie: Nsambi etutsi bango dunangu tumba elasi mavolambombu maboti mandi.

⁶ Kabogu kesunsanu va gusu Nsambi na jandi odumatisa va temu jiwelimina.

⁷ Mutsingulianu maguga menu motsu mu mbari jandi edukelisi.

⁸ Banu sui na lubuganu. Nana magena eleyili ayi oji munongu mosi diabu ojivu muvinitsi enu, eduleyi.

⁹ Mututsianu na jabanu yiri purulu tsiotsu tismalelabana na baana bataji benu abavu yiari na yiari.

¹⁰ Nsambi aguvu na maboti motsu amadunengila o bundumba buandi ufubana mirima na Jesus Christ. Kabogu dunolewarila mua maguga jandi beni odudugusu na odubuesa mangolu na oduwarisa yiri dugokungusu.

¹¹ Ombu gandi uvu mangolu mutubu! Amen!

Pierre ebaganini

¹² Jetu na Silas tuidusonini mua mambu memama mu mbari jandi wandi avu muana taji na aji asigama. Nyisiti na adidi rie: Maboti maNsambi ama dumadila mavu tindi maboti. Warisanu amavu nenu!

¹³ Bisi dibundu diBabylone bedutindili mambolu na Marc muana taji ami wandi edutindili mambolu.

¹⁴ Jenu adumafubana mirima na Christ vegasananu mambolu na bumbasananu. Duvotsu dubi nenu!