1 Pierre 3 - La Sainte Bible en Langue Yipunu

Bagatsi na balumi

¹ Munongu mosi bagetu kesunsanu o tsi durumu dubalumi benu. Pa duivayi nana, bamosi abamalebusa Mambu maNsambi bogobulu

² ava belabili bukoongu bubagatsi bogu.

³ Jenu bagetu, duyajabunu mu diambu dimipanda na misanga milora na bilinga biboti

⁴ tumba jabunuanu mu diambu dimirima misunda amigopindusu mutubu na mu diambu dibuvolambombu abivu biwelimina na Nsambi.

⁵ Anana makoongu mabagetu abamavayila Nsambi yitu bamavayilanga, diwendi rie: bamakesunsa o tsi durumu dubalumi bogu

⁶ nana Sara omadedilanga Abraham na amamunengilanga fumu andi. Dedi mosi jenu bagetu duji baana bandi pa duivayi maboti na pa duna mirima misunduga.

⁷ Jenu balumi, lasanu bagatsi benu yingeba mu mbari baji badeda; bayitsianu mu mbari jogu wogu bodila monyu uNsambi va mosi nenu. Dukanganu mamana yiri tsambu tsienu tsiugulunu.

Warilanu maguga mu diambu didusungugu

⁸ Merianu, banu murima umosi na rondasananu nana baana bataji na lasasananu yingeba na banu na buvolambombu.

⁹ Duyagabusila pila na duyasiengasana tumba gabusanu maboti ombu jogu abedusiengi mu mbari Nsambi amavosa nana ava amavanginina nenu.

¹⁰ Nana Bisonu bisonugulu rie: Pa mutu erondi utsana buranga nolabanga nsangu ayamuevosa kulini na ayamuefura.

¹¹ Abusi mabi novaganga maboti, arondi uba na duvotsu.

¹² Mu mbari Fumu agelibini basungama na matuji mandi mavu limba ugulu tsambu tsiogu. Tumba Fumu Nsambi eiliyili bavayitsi bamasumu nsima.

¹³ Kabogu anyi orungula uduvayila dibi pa duivayi maboti na murima mosi?

¹⁴ Ka muna nsangu ji dulaba pa dulaba maguga mu mbari duji basungama! Duyaduma batu na duyalaba keri.

¹⁵ Gobisanu Christ na muvayianu Fumu enu. Temu tsiotsu banu dukunsama uwagula batu abetsundi na ditasa adivu nenu.

¹⁶ Tumba bawagulianu na buranga na duvotsu. Mirima mienu mibi misunda yiri batu abodufuengilila bolaba yisonyi mu mbari bolaba yiri nsanunu tsienu tsivu tsiwelimina na Christ.

¹⁷ Pa Nsambi erondi yiri dulasu maguga mu diambu dimaboti menu, adina tsiri diambu tumba ulaba maguga mu mbari dumavaga dibi, adina digaa diwelimina nandi.

¹⁸ Christ jaʼ beni amadufuila; amafuila temu mosi buandi mu diambu dimasumu motsu, jandi aguvu uboti amafuila batu babi yiri otubega ombu Nsambi. Nyiina, dunyuru duandi dumafu tumba dumagabusu monyu na Yinyunyi yiNsambi.

¹⁹ Yinyunyi yieni jaʼ beni amayelonsa binyunyi abimaba bikapu.

²⁰ Binyunyi bieni bimaba bibatu abamabusa diufi diNsambi ava amabavivila na pugu temu eni jiotsu aji Noe amagominina dikumbi. Yika mua pesu batu, diwendi rie: yinana buandi bamakota o dikumbi na bamagobulu mu mamba.

²¹ Mamba meni mamaba yibagunu yibatema. Batema ajigobuli tsiri mu mbari jisusi nyuru tumba mu mbari jisusi mirima va gusu Nsambi. Batema eni jiurungula udugobula mu mbari Jesus Christ amarambuga o dufu.

²² Ubanda vana amamatila o julu aji va mabaala maNsambi na erumi biansa na biotsu bisusu abivu o julu.