1 Pierre 2 - La Sainte Bible en Langue Yipunu

Dimanyi adimasolu na Nsambi

¹ Kabogu dundanu mambu mabi: ufura na penda na ngusu na bisiengu.

² Nana baana bakali berondili mabenyi munongu mosi jenu wenu rondanu mambu maYinyunyi yiNsambi yiri dubanguga nogobulu.

³ Bisonu bisonugu rie: Dumalaba, Fumu aji muboti.

⁴ Bambananu na Fumu ojivu monyu na ojivu nderi dimanyi adimabusu na barungitsi tumba dimasohi na Nsambi na dimaba na tsongu ombu gandi.

⁵ Jenu wenu duvu nderi mamanyi ama Ndagu Nsambi jirungulu na duvu bavagulitsi bapagu abovagula pagu atsilasi Nsambi ubueji atsiuvagululu mu diina diJesus Christ.

⁶ Guluanu Bisonu bisonugurie: Nyisoli dimanyi adi nyusunsa o Sion, adina diuba na tsongu. Jandi oyidivayili yitu agokambulu.

⁷ Kabogu ombu genu adumadivayila yitu dimanyi diedidi dina tsongu tumba ombu jogu abasakadivayila yitu: Nsambi amabalubusa rie: Dimanyi adimabuagu na barungitsi, diyu tindi adiviolila ubueji.

⁸ Bisonu bisusu bisonugu rie: Dimanyi diedidi diudukusu batu mabaku na dionyi diberusi batu. Labatianu munu uNsambi usamabonduga ya tsi! Bamatsunguga mu mbari basamavayila Mambu maNsambi yitu.

⁹ Tumba jenu duvu batu abamasolu na Nsambi na duvu bavagulitsi bapagu, diwendi rie: dumusalila mu mbura tsiotsu. Va julu vana dumasolu na Nsambi jaʼ beni usamuna Mambu mandi amavu na mangolu. Divu nderi amadugusula o pisama jimasumu na amaduviosa o yijalala!

¹⁰ Jenu adusamaleba batu baNsambi va kala namunyi duka batu bandi, jenu adusamalelasu yingeba namunyi dumalasu yingeba.

Basalitsi baNsambi

¹¹ Bambatsi badurondu, jenu aduvu benyi na balinsi mu bulongu buebubu, riyidulubusi rie: Duyaba na nsala tsibi atsigayini na tsiYinyunyi yiNsambi.

¹² Tsananu na buranga va gari abageduki Nsambi yiri ne pa bodufuengilila, bifu bienu biuba biboti na bododisa Nsambi ava yilumbu yiandi ayi oruyila.

¹³ Duijabi Fumu, kabogu kesunsanu o tsi durumu dubarumitsi: nesi kaga aguvu na durumu

¹⁴ nesi bivunda abimasindugu nandi ukilisa batu babi nolasa bango maboti ubueji.

¹⁵ Mu mbari Nsambi erondi yiri maboti menu mobagaanga leli.

¹⁶ Tsananu nana batu abamajegusu tumba duyasalisa dujegusu duenu nana nderi duvu na musuga uvaga masumu. Jabanu yiri duji basalitsi baNsambi.

¹⁷ Gobisanu batu botsu! Rondanu baana bataji baChrist. Dumanu Nsambi! Gobisanu kaga bulongu.

Maguga maJesus melasi nsfla ajivu jiwelimina

¹⁸ Basalitsi kesunsanu o tsi durumu dufumu tsienu nobayitsa, tsiri yika ava bedulasilimaboti buandi tumba ava bedulasili maguga wandi.

¹⁹ Pa duisingi ulasu maguga ne pa dusakavaga diambu, Nsambi odukakisa mu mbari dumadivaga udugusu duganu duandi.

²⁰ Pa duiwarili maguga mu mbari dumatsimbu, adina diambu? Tumba pa duiwarili maguga ava dumavayila maboti, adina digaa diwelimina na Nsambi?

²¹ Nsambi amadunengila usala yisalu yieyiyi mu mbari Christ jaʼ beni amawarila maguga mu diambu dienu. Amadulasa nsila yiri jenu duvioyilanga muna;

²² asamavaga masumu na asamadunsa ne mutu mosi.

²³ Anosiengu jandi asamagabusa bisiengu; anolasu maguga asamavaga mapemi; tumba amavayila Nsambi oyitabuli bunsonsi yitu.

²⁴ Ava jandi amafuila va kurusu, masumu metu mamatsiemuga vana, la dibandu tumarungulila utsana abasungama. Mu diambu dimapura mandi jenu dumabeluga.

²⁵ Dubetsi nderi bindombu abimatsiemuga tumba dumagabusu uduka mukelisi unyunyi tsienu.