1 Misamu 5 - La Sainte Bible en Langue Yipunu

Bategula baRuben

¹ Ruben amaba tsomi Jacob tumba anosumuna tangi taji andi kabogu buvunda buandi bumavegu ombu Joseph agumaba muana Jacob wandi. Kabogu Ruben asamamuegengulu tsomi Jacob.

² Juda agumaba na mangolu maneni va gari baana bataji bandi; muana kaga amapalila mu mukuta andi; tumba buvunda bumavegu ombu Joseph.

³ Miina mabaana bababaala baRuben agumaba tsomi Jacob amama: Hanok na Pallou na Hesron na Karmi.

⁴ Bategula baJoel ababa: Chemaya na Gog na Chimei

⁵ na Mika na Reaya na Baal

⁶ na Beera agumaba sefu jibaRuben amabegu ria Teglaih-Phalasar kaga jiAssyrie o buviga.

⁷ Baana bataji baBeera, basefu bamikuta miogu nana mimasonugulu mu bukulu buogu muna kula tsiogu ababa: agutega Yeiel mbana Zacharie

⁸ mbana Bela muana dibaala uAzaz mutegula uChema na mundelabongu uJoel. BaRuben bamatsananga o Aroer o tandu te no mukongu uNebo no Baal-Meon o banda.

⁹ O yiari ayi wisi epalili bamatsaninanga te no kodu kumu ubandila o Euphrate mujamba uBabylone mu mbari migamba miogu mimaba mipuela o bulongu buGalaad.

¹⁰ Va temu Saul bategula baBela bamatoga na baHagrie na bamababetsa; kabogu bamatsana mu mandagu mogu mamatsanda o yiari yiotsu ayi wisi epalili yiGalaad.

Bategula baGad

¹¹ Bategula baGad bamatsananga va nsungisini nogu o bulongu buBachan te no Salka o yiari ayi wisi epalili.

¹² Mikuta miJoel amimatsananga amimi: agutega Chafan, agumubeji Yanai mbana Chafat.

¹³ Va julu vana mikuta miemimi: Mikael na Mechoullam na Cheba na Yorai na Yakan na Zia na Eber.

¹⁴ Bamaba bategula baAbihail; miina mogu amama: Houri na Yaroa na Galaad na Mikael na Yechichai na Yado na Bouz

¹⁵ Ahi muana dibaala uAbdiel na mutegula uGouni amaba sefu jimikuta mieni.

¹⁶ Bategula baGad bamatsaninanga o biari biGalaad na biBachan te no biari abimabambana va mosi na mbura tsiotsu tsiukelisila bibulu biSaron te no masuka mogu.

¹⁷ Botsu bamasonugu mu bukulu buogu va temu Yotam amabila kaga jiJuda na va temu aji Jeroboam amabila kaga jiIsrael.

¹⁸ Baana bababaala baRuben na baGad na yiasi yimukuta uManasse bamaba na mangolu na bamabeganga bangubu na majenga na bamanonganga na pita, bamaguku notoga mavita; dutalu duogu dumaba magumana na tosini jina na yisambuali yikama na magumasiamunu abamaba bawelimina uwenda o divita.

¹⁹ Bamatoga divita na baHagrie na bamatoga wandi na bategula baYetour na baNafich na baNodab.

²⁰ Bamasambila Nsambi ava bamatoyilanga na Nsambi amabagulu na bamabetsa baHagrie na botsu abamatoga nogu.

²¹ Bamabonga migamba miogu: magumaranu matosini tsibasamo na kama beji na magumaranu matosini tsibindombu na tosini beji tsibaburu na kama jitosini tsibatu.

²² Batu bapuela bamaboku mu mbari divita dieni dimaruyila o Nsambi. Kabogu bamatsaninanga o biari bibaHagrie na basamavinga mbura te na vana bamabegulu o buviga.

Bategula baManasse o disimu digunu diJourdain

²³ Yiasi yiyifumba yiManasse bamatsananga muna bulongu ubandila o Bachan te no Baal-Hermon no Senir no Hermon o banda; bamabanga tindi bapuela.

²⁴ Amama la miina mabasefu bamikuta mibataji bogu: Efer na Ichei na Eliel na Azriel na Iimeya na Hodavia na Yadiel. Botsu bamaba batu bamangolu abamadumusungu.

²⁵ Tumba bifumba biRuban na Gad na yiasi yiyifumba yiManasse basamalasa Nsambi bataji bogu ubueji na bamakebivisa na bansambi bangana babisi bulongu aba Nsambi amalebungila va misu mogu.

²⁶ Kabogu Nsambi amasalisa bakaga baAssyrie Poul na Teglath-Phalasar na bamababega baviga te no Hala na Habor na Hara no mujamba uGozan, aguna betsanini te na namunyi.

Bategula baLevi; bavagulitsi bapagu

²⁷ Miina mabaana bababaala baLevi amama: Guerchon na Quehat na Merari.

²⁸ Miina mabaana bababaala baQuehat amama: Amram na Issar na Hebron na Ouziel.

²⁹ Amram amabura baana bababaala babeji miina mogu amama: Aaron na Moise na yibusi yiogu Miriam. Miina mabaana bababaala baAaron amama: Nadab na Abihou na Elazar na Itamar.

³⁰ Elazar akabura Pinhas na Pinhas akabura Abichoua

³¹ na Abichoua akabura Bouqui na Bouqui akabura Ouzi

³² Ouzi akabura Zeraya na Zeraya akabura Merayot

³³ Merayot akabura Amaria na Amaria akabura Ahitoub

³⁴ Ahitoub akabura Sadoc na Sadoc akabura Ahimaas

³⁵ Ahimaas akabura Azaria na Azaria akabura Yohanan

³⁶ Yohanan akabura Azaria. Azaria agumasa-langa yisalu yibuvagulitsi bupagu o Ndagu Nsambi aji Salomon amarungisa o Jerusalem.

³⁷ Azaria akabura Amaria na Amaria akabura Ahitoub

³⁸ Ahitoub akabura Sadoc na Sadoc akabura Challoum

³⁹ Challoum akabura Hilquia na Hilquia akabura Azaria

⁴⁰ Azaria akabura Seraya na Seraya akabura Yossadac.

⁴¹ Yossadac amabegu na Nabucodonosor o buviga ava Fumu amasingisa bisi Jerusalem na baJuda ukotusu o buviga.