1 Misamu 28 - La Sainte Bible en Langue YipunuDavid usulasana esulisini Salomon yivinga yiandi 1 David amanengila basefu botsu baIsrael: basefu babifumba na basefu bamakabu mabisalu bikaga na bivunda bibatosini na bivunda bibakama na botsu abamakelisanga bisalu biandi biotsu na baana bandi bababaala na mivangu na baneni na babaala bamangolu. 2 Kaga David amarelama na amavosa rie: Baana bataji bami na batu bami, kululuatianu! Nyimaba na ditasa urungisa Ndagu jiusunsila yigara yipangini yiNsambi ayivu yisunsulu yimakulu mandi. Nyimagukiga birungula ujirunga. 3 Tumba Nsambi amakandisa rie: Guyatungila Ndagu aji nyutsaninanga mu mbari ndeʼ guvu mungo mavita na gumawitila malungu mapuela. 4 Fumu Nsambi Israel amansola o ndagu taji ami yiri nyuba kaga te na mutubu; jaʼ beni amasola Juda uba sefu, amasola ndagu taji ami mu mukuta uJuda la menu agu amaronda urumanga Israel jiotsu. 5 Fumu amapega baana bapuela bababaala, va gari ogu amasola muana ami Salomon utsananga va yitsiga yibufumu buFumu o Israel. 6 Amansingula rie: Muana agu Salomon orungila Ndagu va mosi na ndombili tsiami; nyimamusola uba muana ami na nyuba taji andi. 7 Nyuwarisa bufumu buandi te na mutubu pa okevega ukelisanga maruma mami motsu nana evayilingi namunyi. 8 Kabogu va misu mabaIsrael botsu na dibuli diFumu na va gusu Fumu Nsambi etu nyidulembiyila ukelisa noduka migaga miFumu Nsambi enu na mirima mienu miotsu yiri dudila bulongu buboti abu dusila disiala ombu baana benu bababaala te na mutubu. 9 Ndeʼ Salomon muana ami duka Nsambi taji agu nomusalila na tindi murima agu uotsu mu mbari Fumu ejabi mirima miotsu na ejabi matasa ne mbe masakatasu. Pa gumuromba, okelasa ombu gagu; tumba pa gumuliyila nsimajaʼ wandi ogubuaga mutubu. 10 Rangimina yiri Fumu amagusola umurungila Ndagu ajiuba Mbura Nsambi. Manina mangolu na salanga! David ulasa elasi Salomon nana orungisila Ndagu Nsambi 11 Mbana David amalasa muana andi Salomon nana orungisila Ndagu na nana ogabila bibuku biotsu nesi bijulu nesi bitsi nesi yilundulu nesi Mbura Yingitsi. 12 Amamulasa motsu nana amatasila mu ndombili tsiNdagu Fumu na bibuku biyiari na yiari na bilundulu bibima biNdagu Nsambi na bilundulu bibima abimawakusu ombu Nsambi, 13 na nana okotisila bavagulitsi bapagu na bisi Levi mu bisalu biNdagu Nsambi na bisalulu biotsu abimavegu usala bisalu biotsu bijionyi. 14 Amamujabisa adivu diwelimina mu kadi yima yilora nesi lora jivema, diwendi rie: dutalu dukilu 15 na dumangasa malora na dubalambi balora na dumangasa malora jivema na dubalambi balora jivema. 16 Amamujabisa dutalu dulora dukadi tavula jimapa mapagu na dutavula tsilora jivema. 17 Amamujabisa dutalu dulora dumisomu na bansienga na mamoyi na bipela na bipela bilora jivema. 18 Amamujabisa dutalu dulora duyinyensulu yipagu jibima bimbunga jiboti. Mbana amamulasa nana ovayila dikalu na bibagunu bibiansa bilora abimasamba mapapi mogu nokubiga yigara yipangini yiNsambi. 19 David amatubula rie: Fumu jaʼ beni amapega diela dimotsu. 20 Mbana David amabuela rie: Muana ami manina mangolu, guyadeda! Salanga! Guyaregama na guyalaba goma mu mbari Fumu Nsambi aguvu Nsambi ami obanganga nagu. Agogusila na agogubusa te na gumana bisalu biotsu biNdagu andi. 21 Anana bavagulitsi bapagu na bisi Levi bokotosulu mu yisalu yiotsu yiNdagu Nsambi nesi babaala botsu abavu na mirima misunda na buketi mu minongu miotsu mibisalu na basefu na batu botsu bawelimina udedila maruma magu bosalanga nagu. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon