1 Misamu 26 - La Sainte Bible en Langue Yipunu

Makabu mabakelisi bamakotulu

¹ Bakelisi bamakotulu bamaba dikabu wandi. Mechelemia muana dibaala uCore mutegula uAbiassaf mu mukuta uCore,

² akabura yisambuali yibaana bababaala: Zacharie tsomi andi mbana Yediael na Zebadia na Yatniel

³ na Elam na Yohanan na Eliohenai.

⁴ Obed-Edom akabura yinana yibaana bababaala: Chemaya tsomi andi mbana Yozabad na Yoa na Sakar na Netaneel

⁵ na Ammiel na Issakar na Peoultai. Nsambi amagabila Obed-Edom miula.

⁶ Tsomi andi Chemaya amabura baana bababaala abamarumanga ndagu taji ogu mu mbari bamaba babaala bamangolu.

⁷ Baana bababaala baChemaya: Otni naRefael na Obed na Elzabad na baana bataji bogu abamayitsu: Elihou na Semakia.

⁸ Botsu bana bamaba baana babaala baObed-Edom, jogu na baana bogu bababaala na baana bataji bogu bamaba babaala abamaba bawara na tindi mangolu mu bisalu, dutalu duogu dumaba magumasiamunu na babeji baObed-Edom.

⁹ Dutalu dubaana bababaala na baana bataji baMechelemia dumaba yigumi na yinana, botsu bamaba babaala bamangolu.

¹⁰ Hossa mu mukuta uMerari akabura: Chimri agumadila mbura jitega diuleba asamaba tsomi andi, taji amamuvega mbura jitega,

¹¹ mbana Hilquia na Tebalia na Zacharie, dutalu dudikabu diHossa dumaba yigumi na barieru.

¹² Basefu na bisi dikabu dibakelisi bamakotulu bamasala va mosi o Ndagu Nsambi.

¹³ Bamabuaga mbanda mu kadi dikotulu diNdagu nesi bangebi nesi bivunda nana mikuta mabataji bogu.

¹⁴ Mbanda jidikotulu diyiari ayi wisi epalili jimagaanga Chelemai. Bamamuebuaga mbanda ajimagaanga muana andi Zacharie agumaba mutu diela, mbura andi jimaba jidikotulu diyiari yibanda.

¹⁵ Mbanda jidikotulu diyiari yitandu jimagaanga Obed-Edom na baana bandi bababaala bamadila bisuegulu.

¹⁶ Mbanda jidikotulu diyiari ayi wisi ewendisini jimagaanga Challeket o yiari yinsila ajimata. Bakelisi bamakotulu bamavegu mbura yilumbu na yilumbu:

¹⁷ O yiari ayi wisi epalili umaba baana babisi Levi basiamunu; o banda bamaba bana, o tandu bamaba bana no bisuegulu, babeji o yimosi na babeji o yisusu;

¹⁸ o nsima dikusa o yiari ayi wisi ewendisini bana o yiari yinsila na babeji o gari ndagu ajimaba o nsima dikusa.

¹⁹ Amama mamaba makabu mabakelisi bamakotulu abamaba baana bababaala baCore na baMerari. Bisalu bisusu bibisi Levi bamosi

²⁰ Bisi Levi basusu bamakelisanga bisuegulu biNdagu Nsambi bibima abimawakusu ombu Nsambi

²¹ Bategula baLadan mu mukuta uGuerchon, basefu bamikuta mibataji bogu bamaba: Yehieli

²² na Zetam na muana taji andi Joel; jogu bamakelisa bisuegulu biNdagu Nsambi.

²³ Mu mikuta miAmran na Issar na Hebron na Ouziel,

²⁴ Chebouel mutegula uGuerchom agumaba muana dibaala uMoise, amaba yivunda yibakelisi babisuegulu biNdagu Nsambi.

²⁵ Mu jandi mumapalila: Eliezer muana taji uGuerchom, na Rehabia tsomi andi mbana Yechaya na Yoram na Zikri na Chelomit.

²⁶ Chelomit na baana bataji bandi abamakelisanga bisuegulu bibima biNdagu Nsambi abi kaga David na basefu bamikuta mibataji na basefu babatosini na babakama na bivunda bibagora bamawakisa.

²⁷ Abi bamawakisa bamabidilila o mavita; bamabiveyila ukelisa Ndagu Nsambi.

²⁸ Biotsu abi mubiyitsi Samuel na Saul muana dibaala uQuich na Abner muana dibaala uNer na Joab muana dibaala uSerouia bamawakisa ombu Fumu bimakelusungu na Chelomit na baana bataji bandi.

²⁹ Kenania na baana bandi bababaala mu mukuta ulsssar bamasalanga o gusu kana utabulilanga baIsrael bunsonsi.

³⁰ Hachabia na tosini na yisambuali yikama tsibabaala bamukuta uHebron bamakelisanga Israel o disimu dimosi diJourdain o yiari ayi wisi epalili; bamakipanga bisalu biFumu na bikaga wandi.

³¹ Yeria amaba sefu jimukuta uHebron. Mu yilima yimagumana yidurumu dukaga David bamalaba bisi mukuta eni o yiari yiYazer o Galaad; bamaba babaala bamangolu.

³² Va gari ogu kaga David amasola tosini beji na yisambuali yikama urumanga nokipanga mambu maNsambi na mambu mandi; bamatsana o yiari yiRuben na yiGad na yiyiasi yiyifumba yiManasse.