1 Misamu 24 - La Sainte Bible en Langue Yipunu

Makabu mabavagulitsi bapagu

¹ Bategula baAaron bamaba makabu mana. Aaron akabura baana bana bababaala: Nadab na Abihou na Elazar na Itamar.

² Nadab na Abihou bamareyila taji ogu ufu na basamabura baana bababaala; Elazar na Itamar bamasalanga bisalu bibuvagiilitsi bupagu.

³ David na musuga uSadoc mutegula uElazar na musuga uAhimelek mutegula uItamar amagaba bavagulitsi bapagu dikabu dikabu na yisalu yisalu.

⁴ Mu baana baElezar mumaba baana bababaala bapuela uviolila baana bababaala baItamar la dibandu bamagabu bategula baElazar yigumi na makabu masiamunu na baItamar yinana yimakabu.

⁵ Bamabasola na mbanda, botsu bamaba dedi mu mbari va gari ogu bamaba basefu baMbura Nsambi na basefu baNdagu Nsambi mu mukuta uElazar na mu mukuta ultamar.

⁶ Chemaya muana dibaala uNetaneel muisi Levi amaba musonitsi agumabasona va gusu kaga na baana bakaga na va gusu bavagulitsi bapagu Sadoc na Ahimelek muana dibaala uAbiatar na va gusu basefu bamikuta mibataji bogu na bavagulitsi bapagu na bisi Levi. Bamabuaga mbanda o yifumba yiElazar na jisusu o yifumba yiltamar.

⁷ Mbanda jitega jimagaanga Yoyarib mbana jimubeji Yedaya,

⁸ ajimurieru jimagaanga Harim na ajimuina jimagaanga Serim,

⁹ ajimuranu jimagaanga Malkia na ajimusiamunu jimagaanga Miamin,

¹⁰ ajimusambuali jimagaanga Haccos na ajimunana jimagaanga Abia,

¹¹ ajimufu jimagaanga Yechoua na ajimugumi jimagaanga Chekania,

¹² ajimugumi na mosi jimagaanga Eliachib na ajimugumi na beji jimagaanga Yaquim,

¹³ ajimugumi na yirieru jimagaanga Houppa na ajimugumi na muina jimagaanga Yechebaba,

¹⁴ ajimugumi na yiranu jimagaanga Bilga na ajimugumi na yisiamunu jimagaanga Immer,

¹⁵ ajimugumi na yisambuali jimagaanga Hezir na ajimugumi na yinana jimagaanga Happisses,

¹⁶ ajimugumi na yifu jimagaanga Petahia na ajimagumabeji jimagaaanga Ezekiel,

¹⁷ ajimagumabeji na jimosi jimagaanga Yakin na ajimagumabeji na beji jimagaanga Gamoul,

¹⁸ ajimagumabeji na yirieru jimagaanga Delaya na ajimagumabeji na jina jimagaanga Maazia.

¹⁹ Anana bamakotusulu mu bisalu biogu yiri bokotanga o Ndagu Nsambi uyesalanga yisalu nana migaga mimakunsulu na taji ogu Aaron nana Fumu Nsambi Israel amamuveyila maruma.

Bisi Levi basusu

²⁰ Ababa basefu basusu bamukuta uLevi: Va gari bategula baAmram Choubael na va gari baChoubael Yedia,

²¹ va gari bategula baRehabia Issia tsomi jiyifumba yiandi.

²² Va gari bategula balssar Chelomot na va gari baChelomot Yahat.

²³ Baana bababaala baHebron: Yeria agutega, Amaria agumubeji na Yaziel agumurieru na Yacanmam agumuina.

²⁴ Baana bababaala baOuziel: Mika. Va gari bategula baMika Chamir.

²⁵ Va gari bategula balssia muana taji uMika Zacharie.

²⁶ Baana bababaala baMerari: Mali na Mouchi na Yazia;

²⁷ bategula baMerari mu muana andi udibaala Yazia: Choham na Zakour na Ibri.

²⁸ Muana udibaala uMali: Elazar agusamabura baana bababaala

²⁹ na Quich agu Yerameel amabura muana dibaala umosi.

³⁰ Baana bababaala baMouchi: Mali na Eder na Yerimot. Abana la baana bababaala baLevi muna bifumba bibataji bogu.

³¹ Jogu wogu, dedi mosi na baana babataji bogu, baana bababaala baAaron bamabuaga mbanda va gusu kaga David na Sadoc na Ahimelek na basefu bamikuta mibatji bogu na bavagulitsi bapagu na bisi Levi. Anana bamavayilanga na kadi sefu jimukuta yeri bivunda yeri bangebi.