1 Misamu 23 - La Sainte Bible en Langue Yipunu

David ugaba egabi bisi Levi bakabu

¹ David anonuna amasola muana andi Salomon uba kaga jiIsrael.

² Amayegukiga basefu botsu baIsrael na bavagulitsi bapagu na bisi Levi.

³ Bamasansama bisi Levi ubanda abakavu na magumarieru mabilima nesi uviolila; dutalu duogu dumaba magumarieru na yinana yitosini.

⁴ David amasola magumabeji na tosini jina usala bisalu biNdagu Nsambi; tosini yisiamunu uba basonitsi na bansonsi;

⁵ tosini jina uba bakelisi bamakotulu na tosini jina bamavegu yisalu uyitsanga Fumu na bisigu abimavagu na David.

⁶ David amagaba bisi Levi makabu, diwendi rie: dikabu diGuerchon na diQuehat na diMerari.

⁷ Guerchon akabura Ladan na Chimei.

⁸ Ladan akabura baana barieru bababaala: Yehiel tsomi mbana Zetam na Joel.

⁹ Chimei akabura baana barieru: Chelomit na Haziel na Haran abamaba basefu bamikuta miLadan.

¹⁰ Chimei amabuesa ubura baana bana bababaala: Yahat na Ziza na Yeouch na Beria.

¹¹ Yahat amaba tsomi na Ziza agumubeji; Yeouch na Beria basamabura baana bapuela, jogu bamaba mukuta umosi mu sansama.

¹² Quehat akabura baana bana bababaala: Amram na Issar na Hebron na Ouziel.

¹³ Baana bababaala baAmram: Aaron na Moise. Aaron amapasulu uwakusu ombu Nsambi jogu na bategula bandi ukipanga Mbura Ajivu Tindi Yingitsi te na mutubu; uvagulanga bima bimbunga jiboti va gusu Fumu; usalanga yisalu yiandi; nogabilanga batu miula miFumu te na mutubu.

¹⁴ Mbe ka Moise agumaba mutu Nsambi baana bandi bababaala bamatalu mu yifumba yiLevi.

¹⁵ Baana bababaala baMoise: Guerchom na Eliezer.

¹⁶ Muana dibaala uGuerchom: Chebouel tsomi.

¹⁷ Eliezer akabura muana dibaala umosi, Rehabia; Eliezer asamabura baana bababaala basusu tumba baana baRehabia bamaba bapuela.

¹⁸ Muana dibaala ulssar: Chelomit tsomi.

¹⁹ Baana bababaala baHebron: Yeria tsomi na Amaria agumubeji na Yaziel agumurieru na Yecamam agumuina.

²⁰ Baana bababaala baOuziel: Mika tsomi na Issia agumubeji.

²¹ Baana bababaala baMerari: Mali na Mouchi. Mali akabura baana babeji bababaala: Elazar na Quich.

²² Elazar amafu tsiri ubura baana bababaala tumba amabura baana babagetu aba baana bababaala baQuich muana taji andi bamawela.

²³ Baana bababaala baMouchi: Mali na Eder na Yeremot.

²⁴ Abana la bategula babisi Levi muna mikuta miogu na basefu bamikuta nana bamasamununu ava bamatalulu na miina mogu. Ubanda na magumabeji mabilima bamasalusu o Ndagu Nsambi.

²⁵ Diwendi rie: David amavosa rie: Fumu Nsambi Israel amavega batu bandi duvotsu na botsananga mutubu o Jerusalem.

²⁶ Bisi Levi bagomuenangulanga Ndagu Yibenguna jitsanda ne bisalulu biotsu biyionyi.

²⁷ David amasita na diambu diedidi rie: Bisi Levi basansumu ubanda na jogu abakavu na magumabeji mabilima.

²⁸ Yisalu yiogu yimaba o tsi durumu dubategula baAaron o Ndagu Nsambi. Jogu bamakipanga ndombili na bibuku bimandagu na duliomusu dubima biotsu biyingitsi na bisalulu biotsu bisusu biMbura Nsambi,

²⁹ mapa mapagu, pagu jitsangu na mapa mageyi amagaa na dufunusu na mapa mageyi magangu mamunongu na munongu na bietsu biotsu biutsira nesi biusakama.

³⁰ Bakelasanga kedi tsiotsu na tsisiga tsiotsu va gusu Fumu umuyitsanga nomudodisanga,

³¹ yisalu yiogu yiuba ukelasanga temu tsiotsu va gusu Fumu uvagulanga pagu tsiotsu tsiunyensa atsimasonugu mu migaga atsimavagululungu Fumu mu bilumbu bibatsona na bisusungi na bibafeta.

³² Jogu bokipanga Ndagu Yibenguna na Mbura Nsambi na baana bataji bogu abavu bategula baAaron bokipanga yisalu yiNdagu Nsambi.