1 Misamu 20 - La Sainte Bible en Langue YipunuJoab upatula epatuli misiengi uRabba ( 2 Sam 11.1 ; 12.26-31 ) 1 Va yitsubi vana temu aji bakaga bamawendilanga o utoga mavita, Joab na bagora bandi na bagora baIsrael botsu bamawenda uyebunga baAmmon noyekanda Rabba. Tumba jaʼ beni David amasiala o Jerusalem. Joab amabelisa Rabba na amagubunga. 2 David amavula kaga jibaAmmon dugaba; utsira uduonyi umaba magumana makilu tsilora na dumaba dunamugu mamanyi madufunu duneni, duonyi dumaduisu David. Bamabega bipuela bipuela abi bamakinda o musiengi. 3 David amaruma bagora upalisa bisi musiengi, amabakotisa mu buviga bubisalu biranga: bibiwasu na bibatsiengu na bimumbi; amavayila misiengi miotsu mibaAmmon munongu mosi. David na bagora botsu bamagabuga o Jerusalem. Divita na baPhilistin ( 2 Sam 21.18-22 ) 4 Adina dinovioga vamamueba divita disusu na baPhilistin o Guezer. Mbana Sibkai muisi Houcha amaboka Sippai mutegula ubaRefaie. Kabogu baPhilistin bamasundusu. 5 Vamamueba divita disusu na baPhilistin. Elanan muana dibaala uYair amaboka Lami muana taji uGoliath muisi Gat agumaba na dikongu adi pandi jimaba nderi munongu umubuangitsi. 6 Vamaba divita disusu o Gat aguna umaba gora ajimaba na yirela yisakama ajimaba na milembu misiamisimunu mu makaka na mu makulu, diwendi rie: magumabeji na milembu mina, jaʼ wandi amaba mutegula ubaRafaie 7 Jandi amasienganga baIsrael; kabogu Yonatan muana dibaala uChamma agumaba muana katsi uDavid amamuboka. 8 Bagora beni bana bamaba baRafaie bisi Gat; botsu bamaboku na David na bagora bandi. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon